Վերնիսաժի գործ. «Գոռի նկատմամբ բռնություն է կիրառվել, բավականին ակտիվ ու շարունակական»
ԲՀԿ-ական պատգամավոր Կարո Կարապետյանի (Յուվեցի Կարո) փեսա` Վերնիսաժում մայիսի 17-ին տեղի ունեցած կրակոցների գործով կալանավորված Գոռ Առաքելյանի առողջական վիճակը լավ է, բայց նրա մոտ հոգեբանական խնդիրներ կան:
«Սթրես է ապրում, այդ ամենը բացասական ազդեցություն է ունեցել նրա վրա», -Panorama.am-ի թղթակցի հետ զրույցում իր պաշտպանյալի վիճակը ներկայացրեց փաստաբան, Փաստաբանների պալատի անդամ Երեմ Սարգսյանը:
Այս գործի շրջանակներում կալանավորված է երկու անձ, սակայն փաստաբանը վստահ է, որ նրանց թիվը կավելանա ևս մեկով, և դա Վալերի Հովհաննիսյանն է լինելու, քանզի Գոռ Առաքելյանի մեղադրանքում հիշատակվում է նաև նրա անունը:
Նկատենք, որ օրերս Վալերի Հովհաննիսյանի պաշտպան Լևոն Բաղդասարյանը հայտարարել էր, որ իրենք նախաքննական մարմնից պահանջում են տուժող ճանաչել Հովհաննիսյանին, սակայն որևէ արձագանք չկա:
Հարցին, թե ըստ փաստաբանի, ինչու է հապաղում նախաքննական մարմինը Վալերի Հովհաննիսյանի վերաբերյալ որոշում կայացնելու հարցում, Երեմ Սարգսյանն ասաց, որ նախաքննական մարմնի փոխարեն չի կարող պատասխանել և հավելեց. «Հավանաբար, որոշում կայացնելու պահը չի հասունացել, բայց նույն հարցը ինձ էլ է հետաքրքրում: Ես կարող եմ մի բան ասել` իմ պաշտպանյալ Գոռ Առաքելյանի մեղադրանքում նաև Վալերի Հովհաննիսյանի վերաբերյալ գործողություններ են նշված և դրանք այնպիսի գործողություններ են, որոնք առաջին հայացքից հանցագործության հատկանիշներ են պարունակում: Քանի որ մենք գիտենք, որ Ներսես Մելքոնյանին մեղադրանք է առաջադրվել մի խումբ անձանց կողմից խուլիգանություն կատարելու համար, հետևաբար ենթադրվում է, որ նախաքննական մարմինը նույն մեղադրանքն էլ առաջադրելու է նաև Վալերի Հովհաննիսյանի նկատմամբ»:
Գործով վկա անցնող Վալերի Հովհաննիսյանի ներկայացուցիչ փաստաբանը օրերս ներկայացնելով կատարվածից մի դրվագ, հայտարարել էր, որ իր պաշտպանյալը հրազենային երկու վնասվածք է ստացել` մեկը մեքենայի մեջ, մյուսն էլ մեքենայից դուրս գալիս:
«Վալերի Հովհաննիսյանը ծեծի չի ենթարկել Գոռ Առաքելյանին, այլ եղել է ուղղակի վիճաբանություն», -հայտարարել էր Վալերիի ներկայացուցիչ Լևոն Բաղդասարյանը:
Երեմ Սարգսյանը, սակայն, պնդում է, որ իր գործընկերոջ այդ հայտարարությունը չի համապատասխանում իրականությանը. «Տպավորություն են ուզում ստեղծել, որ իրենք ընդամենը վիճել են, և Գոռը կրակոց է արձակել: Այդ հանգամանքը բացարձակապես իրականությանը չի համապատասխանում: Կարող եմ նշել այն, որ Գոռի նկատմամբ բռնություն է կիրառվել, բավականին ակտիվ ու շարունակական: Այն կարգի, որ Գոռը առաջին իսկ հարվածն ստանալուց հետո ասել է, որ թող երեխան ու կինը բարձրանան վերև, տուն: Սակայն դրանից հետո նույնիսկ չեն դադարեցրել ծեծը: Նստել է մեքենա, մեքենայից քաշելով հանել են ու նորից հարվածներ տեղացել նրա վրա, նորից բռնություն գործադրել Գոռի նկատմամբ: Այս ամենը խոսում է այն մասին, որ նրանք երկուսով են եղել ու ընդամենը վեճ չի եղել»:
Այս գործի շրջանակներում խուլիգանություն կատարելու կասկածանքով կալանավորված Ներսես Մելքոնյանի պաշտպանական կողմը կարծիք էր հայտնել, որ նախաքննական մարմինը, հավանաբար, փորձում է ինքնապաշտպանության հատկանիշներ վերագրել Գոռ Առաքելյանի արարքին: Այդ կապակցությամբ Երեմ Սարգսյանը նկատեց, որ Մելքոնյանի պաշտպանները լավ են հասկանում իրավիճակը, թե ինչ որակում կարող է ստանալ Գոռ Առաքելյանի արարքը ու փորձում են հայտարարություններ անել, որ նման բան չլինի:
«12-20 տարվա կամ ցմահ ազատազրկում նախատեսող հոդվածով անհիմն մեղադրանք է առաջադրված իմ պաշտպանյալին, և նա այժմ անհիմն կալանքի տակ է, թե փաստաբանները որտեղից են նման եզրահանգման եկել, բացարձակապես անհասկանալի է, նման տվյալ չկա», -հավելեց Երեմ Սարգսյանը:
Հարցին, թե պատգամավորի գործոնն արդյոք ազդում է նախաքննության վրա, Սարգսյանն ի պատասխան նկատեց, որ հակառակը, նույնիսկ խանգարում է:
«Մեղադրանքն անհիմն է այնքանով, որ ինքը սպանելու մտադրություն չի ունեցել. անձը եթե մտադրություն ունենար սպանելու, չէր կարող մոտիկից չսպաներ: Եթե պատգամավորի գործոնը ազդեր, այդ հարցը այլ լուծում կստանար: Ընդհակառակը կարծում եմ, որ այդ գործոնը խանգարում է», -հավելեց Սարգսյանը:
Հիշեցնենք` մայիսի 17-ին մեքենայի ճանապարհը բացելու շուրջ Վալերի Հովհաննիսյանի և Ներսես Մելքոնյանի հետ առաջացած վիճաբանության արդյունքում ԱԺ պատգամավոր Կարո Կարապետյանի փեսան` Գոռ Առաքելյանը, մի քանի անգամ կրակել է, ինչի հետևանքով 5 անձ տարբեր հրազենային վնասվածքներով տեղափոխվել էին հիվանդանոց: Գոռ Առաքելյանին մեղադրանքն առաջադրվել է ՀՀ Քրեական օրենսգրքի 34-104 հոդվածի 1, 6, 10 կետերի հատկանիշներով` «խուլիգանական դրդումներով սպանության փորձ շատերի կյանքի համար վտանգավոր եղանակով» և 235 հոդվածի 1-ին մասի հատկանիշներով` «ապօրինի կերպով ձեռք բերելը, իրացնելը, պահելը, փոխադրելը կամ կրելը» և նա կալանավորված է: Գործով կալանավորվել է նաև Ներսես Մելքոնյանը, որին մեղադրանքն առաջադրվել էր ՀՀ Քրեական օրենսգրքի 258-րդ հոդվածի 3-րդ մասի 1-ին կետի հատկանիշներով (մի խումբ անձանց կողմից խուլիգանություն կատարելը):
Հարակից հրապարակումներ`
Վերնիսաժում հնչած կրակոցներից վիրավորված Վալերի Հովհաննիսյանը մինչ այժմ տուժող չի ճանաչվել. Փաստաբան
Վերնիսաժի գործով ձերբակալվել է Ներսես Մելքոնյանը
Որտեղի՞ց Ալիկ Սարգսյանը գիտի, որ ցինիզմ է դրսևորվել. Փաստաբանի տարակուսանքը
Վերնիսաժի միջադեպի մասնակիցներից մեկը նախկինում դատված է եղել
Վերնիսաժում կրակոցների հետևանքով տուժածներից 2-ը շարունակում են մնալ վերակենդանացման բաժանմունքում
Վերնիսաժում կրակոցներ արձակած Գոռ Առաքելյանը երկու ամսով կալանավորվեց
«Աբսուրդ է, ցավալի իրականություն». Վերնիսաժի գործով 2-րդ անձը կալանավորվեց
Եթե պատգամավորի փեսան կալանավորված է, ապա մյուսներն էլ պետք է կալանավորվեն. Փաստաբանի դժգոհությունը
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
