Մարզահամերգային համալիրի ներկայացուցիչ. Ամեն ինչ արվում է նախկին գործարքի մութ մասերը փակելու համար

Վերլուծություններ 13:08 21/08/2014

Մարզահամերգային համալիրի ներկայացուցիչ. Ամեն ինչ արվում է նախկին գործարքի մութ մասերը փակելու համար

«Այս ամեն ինչը օրինական չէ: Ամեն ինչ արվում է նախկին գործարքի մութ մասերը փակելու համար»,- Երևանի Կարեն Դեմիրճյանի անվան մարզահամերգային համալիրը պարտքի դիմաց պաշտպանության նախարարության հաշվեկշռին հանձնելու կառավարության այսօրվա կայացրած որոշումն Panorama.am-ի հետ զրույցում այսպես գնահատեց Մարզահամերգային համալիրի ներկայացուցիչ Կորյուն Գրիգորյանը:

Հիշեցնենք, որ նման որոշում ընդունվել է կառավարության այսօրվա նիստում: Ֆինանսների փոխնախարար Պավել Սաֆարյանն ասել է, ԴԱՀԿ-ի կողմից առաջարկվել է պարտքի դիմաց ընդունել համալիրի գույքը և նրա սեփականության իրավունքը գրանցել ՊՆ-ի հաշվեկշռին:

Հիշեցնենք նաև, որ արդեն յոթ անգամ ԴԱՀԿ-ի կողմից հանվել էր աճուրդի` գինը 9 մլրդ 350 000 000.0 դրամից հասցնելով մինչև 10 միլիարդ 283 միլիոն 383 հազար 350 դրամ: Բայց գնորդ այդպես էլ չհայտնվեց:

Կառավարության որոշման մեջ նշված է.

««Կարեն Դեմիրճյանի անվան մարզահամերգային համալիր» ՓԲԸ բյուջետային վարկի պարտքի (10,207,755,910 դրամ) և նախապես վճարված պետական տուրքի գծով դատական ծախսերի (204,155,118 դրամ) բռնագանձման հարկադիր կատարման վարույթի շրջանակներում ԵԿԴ 0191/04/14 սնանկության գործով ՀՀ ֆինանսների նախարարության մորատորիում չտարածելու մասին 04.08.2014թ ծանուցման հիման վրա դատական ակտերի հարկադիր կատարման ծառայության կողմից 2014թ օգոստոսի 14-ից հայտարարած՝ անշարժ գույքի հերթական էլեկտրոնային աճուրդը գնորդ չլինելու հիմքով չկայանալու դեպքում ընդունել հարկադիր կատարողի առաջարկը պարտքի դիմաց 10,283,383,350 դրամ (ներառյալ ԱԱՀ) գնով անշարժ գույքի (ՀՀ, քաղաք Երևան, Կենտրոն համայնք, Ծիծեռնակաբերդի զբոսայգի մարզահամալիր հասցեում գտնվող անշարժ գույքը, բաղկացած` 46335.7 քմ մարզամշակույթային կենտրոնից, 40.0 և 50.0 քմ օժանդակ շինություններից, 2800.0 քմ ջրավազաններից և աստիճանից, 3851.3 քմ ջրավազանից և 9,559587 հա սեփական հողամասից) ընդունման մասին, հարկադիր կատարողի հետ կնքել գույքը հանձնելու մասին պայմանագիր և ապահովել անշարժ գույքի նկատմամբ պետության սեփականության իրավունքի գրանցումը` պայմանագրի նոտարական վավերացման և ծագող իրավունքների գրանցման ծախսերը կատարելով ՀՀ պետական բյուջեով նախարարությանը հատկացված միջոցների հաշվին: Սույն որոշման 1-ին կետի համաձայն պետության սեփականության իրավունքի գրանցումից հետո անշարժ գույքն ամրացնել ՀՀ պաշտպանության նախարարություն պետական կառավարչական հիմնարկին, հաշվեկշիռ մուտքագրելով 10,411,911.0 հազար դրամ ձեռքբերման արժեքով»: Ըստ որոշման, գույքը պետք է օգտագործել նպատակային նշանակությանը համապատասխան: Ներկայացվող նախագծի ընդունումը պայմանավորված է «Կարեն Դեմիրճյանի անվան մարզահամերգային համալիր» ՓԲԸ բյուջետային վարկի պարտքի (10,207,755,910 դրամ) և նախապես վճարված պետական տուրքի գծով դատական ծախսերի (204,155,118 դրամ) բռնագանձման հարկադիր կատարման վարույթի շրջանակներում ԵԿԴ 0191/04/14 սնանկության գործով ՀՀ ֆինանսների նախարարության մորատորիում չտարածելու մասին 04.08.2014թ ծանուցման հիման վրա դատական ակտերի հարկադիր կատարման ծառայության կողմից 2014թ օգոստոսի 14-ից հայտարարած՝ անշարժ գույքի հերթական էլեկտրոնային աճուրդը գնորդ չլինելու հիմքով չկայանալու և պարքտի դիմաց 10,283,383,350 դրամ գնով անշարժ գույքի ընդունման մասին հարկադիր կատարողի առաջարկով»:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: