Ձեր վստահելի աղբյուրը

Այս տարվա հունվարին Ռուսաստանից ստացված տրանսֆերտների ծավալը 2014թ. համեմատ նվազել է 2,3 անգամ: Անցած տարեվերջին նվազումը կազմում էր 30-40 տոկոս: Նման ցածր մակարդակ չի եղել նույնիսկ 2008-09թթ. ճգնաժամի ժամանակ: Ընդ որում, տրանսֆերտների զուտ ներհոսքը Ռուսաստանից նվազել է 3 անգամ:

«Տրանսֆերտների նման մակարդակի նվազումն անկեղծ ասած անակնկալ էր: Նախորդ տարվա հունվարի համեմատ Ռուսաստանից ստացված զուտ տրանսֆերտների ծավալը նվազել է 3 անգամ»,-Panorama.am-ի հետ զրույցում անդրադառնալով Ռուսաստանից Հայաստան տրանսֆերտների նվազմանը՝ ասաց տնտեսագետ Մեսրոպ Առաքելյանը:

«Նման ցուցանիշ չի արձանագրվել նույնիսկ 2008-09թթ. ճգնաժամի ժամանակ: Իհարկե, հունվարն այս առումով առանձնահատուկ ամիս է, սակայն կարծում եմ՝ այս տարի տրանսֆերտների նվազումը կլինի առնվազն 50 տոկոս»,-կարծիք հայտնեց տնտեսագետը:

Մ. Առաքելյանը նշեց, որ վերջին 10 տարիներին տրանսֆերտները լուրջ ազդեցություն ունեն Հայաստանի տնտեսության վրա։

«Հազարավոր քաղաքացիների եկամտի միակ աղբյուրը տրանսֆերտներն են։ Տրանսֆերտների նվազումն առաջին հերթին ազդելու է այդ քաղաքացիների կենսամակարդակի վրա, ինչը խորացնելու է աղքատությունը»,-ասաց Panorama.am-ի զրուցակիցը:

Տնտեսագետի կանխատեսմամբ, Ռուսաստանից Հայաստան ուղարկվող տրանսֆերտների նվազումն իր ազդեցությունն է ունենալու մակրոտնտեսական ցուցանիշների վրա, մասնավորապես տնտեսական աճի վրա։

«Հաշվի առնելով, որ վերջին մի քանի տարիներին տնտեսությունում արդեն ունեցել ենք լուրջ խնդիրներ, այս ճգնաժամը կունենա ավելի վատ հետևանքներ։ Կունենանք տնտեսական անկում, աղքատության աճ, արտաքին ապրանքաշրջանառության նվազում, ներդրումների նվազում»,-հնարավոր հետևանքները թվարկեց Մեսրոպ Առաքելյանը