«Անունը դնում են Տաթև համայնք, բայց չգիտես ինչի կենտրոնը լինելու է Շինուհայրը». Տաթևի գյուղապետ
Գորիսի տարածաշրջանի Տաթև գյուղը Հայաստանի հնագույն բնակավայրերից է, նշանավոր է Տաթևի վանական համալիրով: 2010թ-ին այստեղ բացվեց աշխարհի ամենաերկար «Տաթևի թևեր» ճոպանուղին, որի երկարությունը 5.7կմ է: Տաթևն այժմ էլ` զբոսաշրջության կենտրոն հանդիսանալով, մնում է սովորական, հոգսաշատ, իր խնդիրներով այլ գյուղերին չզիջող համայնքներից մեկը: Սակայն խնդիրներին ավելանում է ևս մեկը, կամ ինչպես համայնքի ղեկավարն է ասում` ամենալուրջ խնդիրը: Խոսքը համայնքների խոշորացման մասին է:
Հիշեցնենք, որ ՀՀ կառավարության որոշմամբ` մայիսի 17-ին Սյունիքի, Լոռու և Տավուշի մի շարք համայնքներ միավորելու նպատակով հանրաքվեներ կանցկացվեն:
Մասնավորապես, Սյունիքի մարզում նախատեսվում է միավորել Շինուհայր, Տաթև, Հալիձոր, Հարժիս, Սվարանց, Խոտ, Տանձատափ, Քաշունի համայնքները: Այսպիսով, հանրաքվեի միջոցով պետք է պարզեն, թե արդյոք բնակիչները համաձայն են, որ շրջակա համայնքները միավորվեն՝ կենտրոն ունենալով Շինուհայրը:
Տաթևի համայնքապետ Մուրադ Սիմոնյանը Panorama.am-ի թղթակցի հետ զրույցում նշեց, որ ինքը դեմ է խոշորացմանը, կարծում է, որ գյուղացիներն էլ դեմ կարտահայտվեն:
«Հանրաքվեի ժամանակ մարդիկ իրենց կարծիքը կհայտնեն, բայց ինձ թվում է, որ բոլորն էլ դեմ կլինեն: Խոշորացումը էս կարգի չեն անում: 8 գյուղ, իրարից շատ հեռու, միացնում են, ինչը ճիշտ չէ: Իրականում սա շատ մեծ խոշորացում ա: Եթե ուզում են խոշորացնեն, կարող էին մեր կողքի 3-4 փոքր գյուղերը գոնե միավորեին: Հիմա 8 գյուղ մավորում են, անունը դնում են Տաթև համայքն ու կենտրոնն էլ ուզում են, որ Շինուհայրը լինի»,-ասաց Մ.Սիմոնյանը:
Նրա խոսքերով` քննարկումներ եղել են, բայց գյուղապետերը հիմնականում դեմ են արտահայտվել համայնքների խոշորացմանը:
«Բայց մեր կարծիքը փոքր ա, հանրաքվե կանեն, եթե գյուղի բնակիչները կողմ եղան` կմիավորեն: Չնայած մարդկանց հետ խոսում ենք, տեսնում ենք, որ իրանք էլ են դեմ: Բայց ղեկավարությունն էլ ասում ա, որ Համաշխարհային բանկը համայնքների խոշորացման համար միջոցներ ա հատկացնում ու գյուղերում առկա խնդիրներին լուծում կտան: Ինչ ասեմ, իմ կարծիքը փոքր ա, որ իրանք որոշել են …»,- նկատեց Տաթևի գյուղապետը:
Մ.Սիմոնյանը միաժամանակ նշեց, որ եթե իրականում ՀԲ-ի կողմից ֆինանսավորումը ռեալ լինի, հնարավոր է, որ գյուղը զարգանա, բայց ինքը դեմ է գլոբալ խոշորացմանը:
«Անունը դնում են Տաթև համայնք, բայց չգիտես ինչի կենտրոնը պետք է լինի Շինուհայրը: Ես տաթևացի եմ ու դեմ եմ դրան, գյուղի ժողովուրդն էլ դեմ կլինի»,- ասաց նա` հավելելով, որ Տաթևից մինչև Շինուհայր մոտավորապես 20 կմ է, ինչը նշանակում է, որ ամեն մի թղթի, ամեն մի հարցի համար այդքան ճանապարհ պետք է անցնեն:
Բացի այդ, Մ.Սիմոնյանը կարծում է, որ խոշորացման արդյունքում խոշոր գյուղի հետ միավորվող փոքր գյուղերին քիչ ուշադրություն կդարձնեն:
Տաթևը 1000 բնակիչ ունի: Այստեղ գյուցաղիները հիմնականում զբաղվում են գյուղատնտեսությամբ, անասնապահությամբ, առանձին տնտեսություններ էլ զբաղվում են մեղվապահությամբ: Լինելով տուրիստական գոտի, տաթևցիները իրենց սեփական հարկի տակ հյուրընկալում են նաև զբոսաշրջիկներին:
Հարցին, թե կարող ենք ասել, որ այլ գյուղերի համեմատ Տաթևում մարդիկ քիչ թե շատ սոցիալապես ապահովված են, Մ.Սիմոնյանը նշեց, որ եթե մարդիկ կարողանան իրենց տները վերանորոգել, որպեսզի հյուրատների վերածեն, բնականաբար, մարդկանց սոցիալական վիճակը կլավանա:
«Բայց գումար չունեն, գոնե ցածր տոկոսադրույքով վարկեր տային, որպեսզի կառուցելով կամ վերակառուցելով սեփական բնակատեղին` գյուղացին զբաղվի փոքր բիզնեսով: Այդ կերպ նաև գյուղական տուրիզմը կզարգանա»,- ասաց Տաթևի գյուղապետը:
Նա նաև նշեց, որ Հայաստանի սոցիալական ներդրումների հիմնադրամի միջոցներով անցած տարի վերանորոգվել է գյուղի եռահարկ դպրոցի երկու հարկը: Վթարային վիճակում է նաև գյուղի մանկապարտեզը: Մ.Սիմոնյանի խոսքերով` եթե կարողանան դպրոցի առաջին հարկը վերանորոգել, գուցե դա ծառայի որպես նախակրթարան:
«Խնդիրները շատ են, բայց հիմա ամենակարևոր և լուրջ խնդիրը մեզ համար համայնքների խոշորացումն է»,- ասաց գյուղապետը:
Նախորդող հրապարակում`
Այդ ծրագիրը կքայքայի գյուղը. Հաղարծինի գյուղապետը դեմ է համայնքների խոշորացմանը
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
