Ձեր վստահելի աղբյուրը

Ազգային ժողովի Էթիկայի հանձնաժողովը 2015 թվականը անհամեմատ հանգիստ է սկսել. մինչ այժմ պատգամավորների էթիկայի խախտման վերաբերյալ ԱԺ Հանրապետական խմբակցության անդամ Արփինե Հովհաննիսյանի ղեկավարած հանձնաժողովը դիմում չի ստացել:

-Էթիկայի հանձնաժողովը տարին, կարծես, հանգիստ է սկսել, գոհ ե՞ք: 
-Էթիկայի հարցերով զբաղվող յուրաքանչյուր մարմնի համար չդժգոհելու առիթ պետք է լինի Ձեր կողմից նշած հանգստությունը, քանի որ յուրաքանչյուր երկրում էթիկայի հանձնաժողովի ծանրաբեռնված աշխատանքը չի կարող համարվել ցանկալի երևույթ:

-Էթիկայի հանձնաժողովը, Ձեր նախագահության ժամանակաշրջանում պատգամավորների էթիկայի խախտմանը վերաբերող դիմումներ չի ստացել: Ինչո՞վ եք դա բացատրում: Արդյունքում հանձնաժողովը մի տեսակ անգործության չի՞ մատնված:
-ՀՀ Աժ կանոնակարգի համաձայն էթիկայի հանձնաժողովը կազմավորվում է յուրաքանչյուր հերթական նստաշրջանի առաջին քառօրյայի ըթացքում: Նախորդ նստաշրջանում ձևավորված էթիկայի հանձնաժողովը, որի նախագահը կրկին ես էի, քննել է մեկ գործ: Այս նստաշրջանում ձևավորված հանձնաժողովը դեռևս որևէ գործ չի քննել, քանի որ այն նոր է սկսել իր գործունեությունը: Բացի դրանից կարծում եմ, որ հանձնաժողով դիմելը ինքնանպատակ չպետք է լինի: Վերջին շրջանում, եթե նույնիսկ հետևենք մամուլի հաղորդագրություններին, մի շարք գործոններուվ պայմանավորված ակնբախ խախտումներ չեն արձանագրվել, իմ մոտեցմամբ նաև դա է դիմումների բացակայության պատճառը: Ինչ վերաբերում է անգործությանը, ես այն համոզմունքին եմ, որ հանձնաժողովի աշխատանքը չի սահմանափակվում միայն դիմումների քննարկմամբ, մեր կողմից անընդհատ որոնվում են միջոցներ հանձնաժողովի գործունեության արդյունավետությունը բարձրացնելու, կիրառվող ընթացակարգերը կատարելագործելու համար: Նշված նպատակներին հասնելու համար մենք համագործակցում ենք նաև մեր արտասահմանյան գործընկերների հետ: Այսինքն՝ նույնիսկ դիմումների բացակայության պայմաններում, հանձնաժողովը անգործության չի մատնվում:

-Իսկ հնարավո՞ր է Հանձնաժողովի նկատմամբ վստահության պակասով է պայմանավորված, որ պատգամավորները վերջին շրջանում չեն դիմում Հանձնաժողովին:
-Ինչպես ցանկացած կառույցի պարագայում, էթիկայի հանձնաժողովի դեպքում ևս, չի կարելի բացառել վստահության պակասը, սակայն խնդիրը այլ հարթությունում է: Հայաստանյան մտածողության մեջ կա պատասխանատվության վերաբերյալ հստակ դիրքորոշում, այն է՝ պատասխանատվությունը պիտի լինի ավելի շոշափելի, ավելի նյութական: Մեր մոտ իրավական ձևակերպում ստացած բարոյական պատասխանատվության միջոցները այդքան էլ չեն կարևորվում: Էթիկայի հանձնաժողովի դերը անձի խախտումները բարձրաձայնելն է, հասարակության ուշադրություն հրավիրելը, ինչպես շատ երկրներում, Հայաստանում ևս: Ավելին էթիկայի հանձնաժողովը չի կարող անել, ուստի բազմաթիվ դեպքերում առավել շոշափելի, նյութական հետևանքների բացակայությունն է, որ անձանց հետ է մղում հանձնաժողով դիմելուց:

-ՀԱԿ-ը Ձեր նախագահության շրջանում էլ շարունակեց բոյկոտել Հանձնաժողովի աշխատանքները, Ձեր կարծիքով, ինչո՞վ է պայմանավորված այդ համառությունը:
-Այս հարցի հասցեատերը ես չէ, որ պետք լինեմ, ուստի կարծում եմ ավելի նպատակահարմար կլինի համառության պատճառները պարզել ՀԱԿ խմբակցությունից:

Նշենք, որ ԱԺ Էթիկայի հանձնաժողովում պատգամավորների վարքագծի կանոնների խախտման վերաբերյալ դիմումների բում եղավ 2013 թվականին ԱԺ երկու նստաշրջանների ժամանակ, երբ Հանձնաժողովի նախագահ եղավ սկզբում Նիկոլ Փաշինյանը, այնուհետև՝ նախկին պատգամավոր Դավիթ Հարությունյանը: Այդ տարի հանձնաժողովը կայացրել է 14 որոշում, 2014-ին՝ 4 որոշում: Արփինե Հովհաննիսյանը արդեն 2 նստաշրջան է՝ ղեկավարում է ԱԺ Էթիկայի հանձնաժողովը և այդ ընթացքում ստացել ու որոշում են կայացրել միայն մեկ դիմումի վերաբերյալ (դիմողը եղել է Զարուհի Փոստանջյանը):