Ձեր վստահելի աղբյուրը

Մարզահամերգային համալիրը, կառավարության որոշմամբ, վաճառվել է մի ընկերության, որը մեկ ամսվա պատմություն էլ չունի: Էլեկտրոնային ռեգիստրից  տեղեկանում ենք, որ «ՆՏԱԱ ԻՆՎԵՍՏՄԵՆՏ ԳՐՈՒՊ» ՍՊԸ-ն գրանցվել է նախորդ ամսվա 20-ին: Հիմնադիրը Արմեն Զավենի Գևորգյանն է:


Համալիրի վաճառքը նման ընկերությանն ու նման գնով հարցեր է առաջացրել հասարակության ներկայացուցիչների մոտ: Կառավարության որոշման մեջ ամեն ինչ չէ, որ ասված է:

Ֆեյսբուքյան օգտատերերից Աշոտ Խուրշուդյանը գրում է. «Ավելի ուշադիր կարդացի կառավարության որոշումը Համալիրը օտարելու մասին։ Դժվար չի կարդալը, հիմնավորումը մի նամակ է՝ տրված ՍՊԸ կողմից. ՍՊԸ-ն բացվել է մի ամիս առաջ։
2 էջանոց նամակ, ու համալիրը քոնն է, կողքի հողերը նույնպես, ու ձեռի հետ էլ թույլատրած է կողքի հողերում կառուցապատում անես, որ 2 տողով նշածդ սարքես։
Երիտասարդական պալատը հիշու՞մ եք։ Չեմ ասում քանդելու են համալիրը, չէ, պարտավորվել են պահել, բայց ի՞նչ են կառուցապատելու՝ հայտնի չէ։ Նախագիծ չկա, գծագիր չկա, նույնիսկ հայտնի չի, թե ՍՊԸ-ն միջոցներ ունի՞, թե՞ չունի. կարող է հերթական տիեզերագնացն է, էն որ լույսի արագությունը գերազանցել էր։ Հիմա մի նամակ էլ ես սենց ուղարկեմ, մի հող էլ ես ուզեմ, խոստանամ, որ բան-ման կկառուցեմ՝ կառավարությունն անմիջապես որոշու՞մ է կայացնելու։
Չէ, մենք չունենք իշխանություն, սենց բարդակ շատ շուտվանից չէի տեսել, երբ, օրինակ, մարդիկ պետության անունից վարկ էին վերցնում ու անձնական օգտագործում։ Գլորվել ենք ետ, շատ-շատ ենք ետ գլորվել»:
Ավելացում
Մոռացա նշել, որ հաշվեկշռային մոտ 60 միլիոն դոլարանոց համալիրն օտարվում է 30 միլիոնով։ Ու գոնե գրած չի թե ինչու հենց այդքան։ Չկա էլի, գրած չի ...»:

Կառավարության որոշման հավելվածը՝ ներդրումների վերաբերյալ Ճարտարապետների միության նախագահ Մկրտիչ Մինասյանին չի  բավարարում: Նա խնդրել է, որ իրեն տրամադրեն ընկերության ներդրումային ծրագիրը, որտեղ մանրամասն նշված է լինելու, թե այդ կառույցները որտեղ են լինելու:

«Ես ուզում եմ իմանալ, տեղանքը որտե՞ղ են հատկացնելու, թե ի՞նչ հեռավորության վրա են գտնվելու համալիրից, համալիրը ի՞նչ փոփոխությունների կարող է ենթարկվել: Այս ամեն ինչը պետք է ճշտվի, թե չէ նրանց կախարդական գորգը ինձ ոչինչ էլ չի տալիս»,-Panorama.am-ին ասաց Մկրտիչ Մինասյանը:

Նկատենք, որ կառավարության որոշման՝ ներդրումների վերաբերյալ հավելվածում ասված է. «Համալիրի ճարտարապետական լուծումները լինելու են կախարդական գորգի թեմաներով, որը յուրաքանչյուր ծնող ցանկանում է վայելել իր երեխաների հետ և դարձնել երկար տարիների հիշողություններ»:

Մինասյանին այնքան էլ չի հետաքրքրում, թե ով է համալիրի նոր սեփականատերը, դա, ասում է, կառավարության գործն է: Իրեն ու գործընկերներին առավել շատ հետաքրքրում է, թե ի՞նչ է լինելու համալիրի ճարտարապետական տեսքի հետ.

«Ձևափոխություններ չի կարելի անել, կարելի է  վերանորոգել, որոշ տեղերում տանիքը սարքել: Բայց չի կարելի այնպիսի միջամտություններ անել, որն արգելվում է Հուշարձանների մասին օրենքով: Դա 100 տոկոսանոց հարց է, ինձ մտահոգում է, թե ընտանեկան հյուրատներն ու հյուրանոցները ո՞ր հատվածում են տեղավորելու: Քանի որ համալիրին շատ մոտ լինելն է վտանգավոր, և հեռու լինելը, Եղեռնի հուշարձանն է այնտեղ, կանաչ ու անտառածածկ տարածք կա այնտեղ»:

«Օրինաց երկիր» խմբակցության ղեկավար Հեղինե Բիշարյանը կարծում է, որ Երևանի խորհրդանիշներից մեկի՝ ճարտարապետական հերթական հոյակերտ կառույցի անխիղճ ու անտրամաբանական աղավաղման դեպքին ենք ականատես լինելու:

«Բավական մտահոգիչ է, որ ըստ ծրագրի, Մարզահամերգային համալիրի կողքին կկառուցվեն հյուրանոցներ, ռեստորաններ, խանութներ և որքան էլ տարօրինակ հնչի՝ խաղատուն:
Իսկ հարցի բարոյական կողմը՝ ո՞ւմ խելքառատ գլխում է ծագել Ցեղասպանության զոհերի հուշակոթողի մոտ զվարճանքի վայր ստեղծելու այդ «փառահեղ» գաղափարը:
Նաև ակնհայտ է, որ այդ համալիրը կառուցվելու է կանաչ տարածքներ ոչնչացնելու միջոցով:
Ինչև, մենք արդեն գործ ունենք կայացած փաստի հետ:
Հ.Գ. Կառավարության՝ ամեն շարժական և անշարժ առարկա վաճառելու մոլուցքն արդեն վաղուց անցել է տրամաբանության բոլոր սահմանները»,-գրել է պատգամավորը:

Քաղտեխնոլոգ Կարեն Քոչարյանն էլ համալիրի վաճառքի վերաբերյալ գրել է.   «Ցեղասպանության 100-րդ տարելիցի կապակցությամբ որոշվել է Ծիծեռնակաբերդում կառուցել կազինո։ Այնպես որ, «Հիշում ենք և խաղում»»: