Ձեր վստահելի աղբյուրը

Երևանի կենտրոնական հատվածներում երևանցիների համար երբեմնի սիրելի շինություններից այժմ կամ քանդած փոսեր են մնացել, կամ անկենդան ուրվականներ, կամ էլ …բազալտի հանքավայր:

Ավարտվում է քաղաքապետարանի կողմից նախապես հայտարարված ժամկետը, երբ Երևանի կենտրոնում շինաշխատանքները կիսատ թողած կամ ընդհանրապես աշխատանք չկատարած կառուցապատողները կարող էին ներդրումային հստակ ծրագիր ներկայացնել: Երևանի գլխավոր ճարտարապետ Նարեկ Սարգսյանը հայտարարել էր, որ այդ ծրագրերը ներկայացնելուց հետո կկնքվեն պայմանագրեր ժամկետների, օրացույցային գրաֆիկի, շինարարական աշխատանքների ավարտի վերաբերյալ:

Քաղաքապետարանից Panorama.am-ին փոխանցեցին, որ սահմանված մեկամսյա ժամկետը դեռ չի ավարտվել և այս պահին չեն կարող ասել` ովքեր են ծրագրեր ներկայացրել:

Մինչ քաղաքապետարանում վերջին շտրիխներն են արվում` Panorama.am-ը փորձեց ներկայացնել թիրախային համարվող գլխավոր կառույցների ներկայիս վիճակը:

«Երիտասարդական պալատը», որը ժողովրդի շրջանում հատնի է «կուկուռուզնիկ» անվանումով, քանդվեց 2006-ին և այժմ հողին է հավասարված: Panorama.am-ի թղթակցին և լուսանկարչին պահպանություն իրականացնող անվտանգության աշխատակիցները թույլ չտվեցին մտնել տարածք և լուսանկարել` ասելով, որ այն մասնավոր սեփականություն է: Նույնիսկ սպառնացին, որ«ջարդուփշուր կանեն» մեր լուսանկարչական ապարատը:

Իսկ տարածքը պատկանում է «Ավանգարդ Մոթորս»-ին, որի սեփականատերն էլ Էդվարդ Ավետիսյանն է: «Երիտասարդական պալատի» շուրջ 4,5 հա տարածքը «Ավանգարդ Մոթորս»-ը մրցույթով գնել է 2010-ին: Ճապոնական նախագծով պետք է կառուցվեր հյուրանոցային համալիրով InterContinental միջազգային բիզնես կենտրոնը, որը ներառելու էր նաև բնակելի շենքեր, ստորգետնյա ավտոկայանատեղի` 2000 ավտոմեքենա կայանելու հնարավորությամբ: Շինության մուտքը Տերյան փողոցից նախատեսված է եղել կառուցել շարժասանդուղքներով: Եվ այս ամենը պետք է կառուցվեր երեք տարում: Արդեն մոտենում ենք 2013 թվականին, սակայն քանդած «Երիտասարդական պալատի» տեղում շինարարական որ մի աշխատանքներ էլ չեն իրականացվում: Ավելին, տարածքի լողավազանն էլ են քանդել:

«Խայտառակություն է, մարդը, որը քանդեց, պարտավորություն ուներ սարքել նորը, չի սարքում: Ընդհակառակը, բազալտը կտրտում վաճառում են, իրեն երևի դա էր պետք: Լողովազանն են քանդել, որը ուրիշ սեփականատիրոջն էր, կարողացել է էդ մարդուն էնքան նեղի, որ սա էլ վաճառել է», -մեզ հետ զրույցում ասաց Երևանի ավագանու անդամ, ճարտարապետ Հրաչ Պողոսյանը: Քաղաքապետարանի տված վերջին հնարավորությունը, ըստ Պողոսյանի, օգուտներ չի տա: «Քանդում են ու վերջ, իրենցը միայն քանդելու գործն է», -ասաց Պողոսյանը:

Երևանի հնագույն Կոնդի թաղամասում երբեմնի գեղեցիկ «Դվին» հյուրանոցից անկենդան ուրվականն է մնացել, որի բնակիչներն ագռավներն են, իսկ տարածքը լցված է աղբով: «Դվին»-ը 1,5 հեկտար տարածքով 2003-ին 3 մլն դոլարով վաճառվել է «Կովկասյան կոմունիկացիոն խումբ» ընկերությանը, որի սեփականատերերից մեկը, ըստ մամուլում շրջանառվող լուրերի, ռուսական էստրադայի հայտնի աստղ Իոսիֆ Կոբզոնն է։ Վերջինն ի դեպ, պաշտոնապես ոչ հաստատել և ոչ էլ հերքել էր այդ լուրերը: Գնորդը խոստացել էր 5 տարում կառուցել 5 աստղանի հյուրանոց՝ ներդնելով առնվազն 30 մլն դոլար, սակայն մինչ այսօր որևէ լուրջ ներդրում չի իրականացվել:

«Դվին» հյուրանոցի շրջակայքում բնակվող կոնդեցիներն ասում են, որ «ղարաբաղցու սեփականաություն» է դարձել հյուրանոցը և այնքան են քանդած տեսել, որ հույս էլ չունեն, որ շենքը մի օր կգործի: «Ինչներիս ա պետք հյուրանոցը, թող մի հատ երեխաների համար խաղահրապարակ սարքեն, Կոնդում մի հատ հրապարակ չկա, որ երեխեքը խաղան: Առաջ էդ շատրվանները, որ կային, գնում նստում էինք դրանց կողքին ու հանգստանում», -մեզ հետ զրույցում ասում էր բնակիչներից մեկը:

Քաղաքային իշխանությունների թիրախում է նաև 1930-ականներին կառուցված և նախկին քաղաքապետ Երվանդ Զախարյանի որոշմամբ 2004-ին քանդված «Սևան» հյուրանոցի այժմյան սեփականատերը` «Կարուսել Իսթաբլիշմենթ» ընկերությունը, որի ղեկավարն է մեծահարուստ բրիտանահայ բարերար Վաչե Մանուկյանը: Այժմ տարածքը պատված է երկաթյա պատնեշով, իսկ դրանից այն կողմ քարքարոտ է, ու շինարարական աշխատանքներ չեն իրականացվում: «Սևան» հյուրանոցի ձախ կողմում արդարադատության նախկին նախարարությունն էր, որի շենքը վերջնականապես քանդվեց վերջերս, իսկ աջում` կրթության, գիտության նախկին նախարարությունը:

Քաղաքապետարանում վստահ են` «Սևան» հյուրանոցի հարցը պետք է լուծվի, որովհետև ինչպես վերջերս հայտնի դարձավ, որ արդարադատության նախկին շենքի տեղում շուտով կառուցվելու է արտգործնախարարության շենքը: Իսկ այդ պարագայում «Սևան» հյուրանոցը չի կարող շարունակել այդպես քանդված մնալ. տարածքի քաղաքաշինական լուծումը պետք է տրվի: Քաղաքապետարանի ու այժմ արդեն «Սևանի» տարածքի սեփականատեր մեծահարուստ Վաչե Մանուկյանի միջև համենայնդեպս նախկին քաղաքապետի օրոք հանդիպումներ եղել են, սակայն քաղաքապետարանի պաշտոնական հաղորդագրություններից հայտնի չէ` քանդված տարածքի ճակատագիրն ինչով կավարտվի: Քաղաքացիները ևս դժգոհ են «Սևան» հյուրանոցի ներկայիս վիճակից. Վերջերս նրանցից մեկը` Մանե Հակոբյանը լրատվամիջոցներով բաց նամակ էր հղել քաղաքապետին, Վաչե Մանուկյանին և զգուշացրել, որ տարածքը դարձել է զուգարան ու կոչ արել ուշքի գալ:

«Ինչո՞ւ և ի՞նչ իրավունքով է պարոն Վաչե Մանուկյանը որոշել մայրաքաղաքի սրտի մեջ ցանկապատել մի հսկայական տարածք ու բարձիթողության մատնել 16 տարի։ Ու ինչո՞ւ դա ոչ մեկին չի անհանգստացնում, զարմացնում ու զայրացնում։ Գլխավորը՝ ինչո՞ւ այդ խայտառակությունը չեն «նկատում» իրար հաջորդող քաղաքապետերը, ինչո՞ւ դա ոչ մի կերպ չեն տեսնում՝ իրենց էլիտար մեքենաների շարասյուներով անցուդարձ անող նախագահ–վարչապետներն ու այլ պաշտոնական անձինք», -գրել էր քաղաքացին:

Հաջորդ խոշոր սեփականատերը, որին ուղղակիորեն վերաբերում է քաղաքապետարանի հայտարարությունը, Աբովյան փողոցի 5/5 հասցեում գտնվող և «Մուլտի Գրուպ» կոնցեռնին պատկանող շենքն է: Այժմ այս շենքում բրենդային հագուստ վաճառող խանութներից մեկն է տեղակայված, և ինչպես մեզ հետ զրույցում փոխանցեց տարածքում աշխատողներից մեկը, այդ շենքը շուտով կքանդվի: «Մուլտի գրուպ» կոնցեռնի նախագահ Սեդրակ Առուստամյանը Panorama.am-ին ասաց, որ իրենք քաղաքապետարանին դիմել են` պայմանագիրը վերակնքելու համար: Նրա խոսքով, նոր ծրագրով, իրենք այժմ բանակցություններ են վարում «Կիլպինսկի» հյուրանոցային միջազգային ցանցի հետ: «Մենք մեր նախագիծը կանգնեցրել ենք և այժմ իրենց հետ համաձայնեցնում ենք նոր նախագիծ», -ասաց Առուստամյանը` նշելով, որ այդ հացեում իրենք ցանկանում են հյուրանոց կառուցել:

Հարցին, թե ինչո՞ւ մինչ այժմ չեն կառուցել ֆինանսաական միջոցնե՞րն էին սուղ, Առուստամյանն ասաց, որ մինչ այդ իրենք էին ծրագրել հյուրանոց կառուցել, սակայն հետո որոշեցին, որ «ճիշտը Կիլպինսկին է»: Բանակցությունները «Կիլպինսկի» միջազգային հյուրանոցային խմբի հետ, ըստ Առուստամյանի կավարտվեն գարնանը:

Ընդհանուր առմամբ, քաղաքապետարանի ներկայացրած թիրախային կառույցների ցանկում, բացի նշված խոշորագույն կառույցներից, կան ևս վեց կառույցներ` այարանամերձ հրապարակի մոտ նախկին «Բիլդ» ՍՊԸ-ն, Ավանում «Ալ Համռա Ռիել Հսթեյթ Դիվելոփմենթ ԼԼՍ» ընկերությունը, «Վալենսիա» ՀՁ ՍՊ ընկերությունը, «Սասնա երկիր» ՍՊԸ-ի Հաղթանակի կամրջի մոտ գտնվող հողամասերը, Կասկադում` Գաֆեսճյան կենտրոնը և ԵրՃՇՊՀ-ին հարող տարածքում գտնվող «Ռեգիոն ինվեստ» ՍՊԸ-ն:

Դեռ սեպտեմբերի 14-ին Երևանի գլխավոր ճարտարապետ Նարեկ Սարգսյանը հայտարարեց, որ այդ ընկերություններին տրվում է մեկամսյա ժամկետ, որը, ըստ տրամաբանության, կավարտվի հոկտեմբերի 14-ին: Նշված ժամկետում ծրագիրը չներկայացնելու դեպքում կնշանակի, որ տվյալ կազմակերպությունները հրաժարվում են քաղաքաշինական ծրագրերի իրականացումից: Եվ միայն այդ դեպքում, ինչպես հայտարարել էր Նարեկ Սարգսյանը, ՀՀ օրենսդրությամբ սահմանված կարգով կկիրառվեն պայմանագրով նախատեսված պատասխանատվության միջոցներ, կդադարեցվեն հողամասերի, շենքերի կամ շինությունների նկատմամբ առկա իրավունքները: Ավելին, հաշվի առնելով այդ տարածքների առանձնահատկությունները, առաջարկություն կներկայացվի կառավարություն` բացառիկ գերակա հանրային շահ ճանաչելու վերաբերյալ: Դրանից հետո տարածքները կփոխանցվեն քաղաքաշինական ծրագիրն իրականացնելու ցանկություն հայտնած իրավաբանական անձանց: