Ձեր վստահելի աղբյուրը

«Բարգավաճ Հայաստանի» նախագահ Գագիկ Ծառուկյանի` Այգեպար գյուղին նվիրած անիվավոր տրակտորը իսկական պատուհաս է դարձել: Այդ մասին Տավուշի մարզ այցելած փոքրաթիվ լրագրողների հետ զրույցում հայտարարեց սահմանամերձ Այգեպար գյուղի գյուղապետ Անդրանիկ Այդինյանը` պատասխանելով հարցին, թե որն է գյուղի ամենամեծ խնդիրը:

«Վայ ձեզ մատաղ, ես չեմ կարող պատկերացնել, որ կարելի է էդ բարերար մարդու` Ծառուկյանի ասածները գետնին տապալել, իրա էդ կատարած աշխատանքը ոտնահարել», -հավելեց գյուղապետն ու պատմեց, որ «Բարգավաճ Հայաստան» կուսակցության Բերդի տարածաշրջանի կառույցի ղեկավար Նինա Ադամյանն ասել է, թե տրակտորը գյուղապետարանին հատկացված չէ, այլ գյուղին, ու «մենք էլ ինչ կուզենք, կանենք»: «Մարդ չի հասկանում, եթե Ծառուկյանն ասում ա գյուղացու կողքին կանգնած ենք, գյուղացուն ուզում ենք հույս տալ ու որ Նինա Ադամյանը Ծառուկյանի անունից ասում ա, թե իրավունք չունեն, որ անիվավոր տրակտորն օգտագործեն, էլ ինչի՞ ա պետքը, եթե տրակտորը մեզ ա հատկացրել ու ամբողջ հեռուստատեսությամբ էլ հայտարարել ա էդ մասին: Կամ Նինա Ադամյանն է իր անունը ոտնահարում, կամ էլ ընկեր Ծառուկյանը տեղեկություն չունի ինչ է կատարվում»,- տարակուսանք է հայտնում գյուղապետ Այդինյանը:

Պարոն Այդինյանը նշեց, որ տրակտորի հետ կապված ցանկացած հարցի դեպքում, ասենք` ջրատար անցկացնելու համար, զանգում է ԲՀԿ տարածքային կառույցի ղեկավար Նինա Ադամյանին, սակայն ապարդյուն տրակտորները նպատակին չեն ծառայում: «Պետք ա անընդհատ զանգեմ Ծառուկյանին կամ Ադամյանին, որ ասեմ ասենք թե ջրատար ե՞ն կառուցում, որ նոր տրակտրո տրամադրե՞ն: Համայնքի ղեկավարն ա էդ խնդիրներով զբաղվողը, ոչ թե Նինա Ադամյանը», -նկատեց Անդրանիկ Այդինյանը:

Օրինակ, դեկտեմբերին գյուղում ոռոգման ներքին ցանցի ներդրման աշխատանքների ժամանակ ցանկացել են շահագործել տրակտորը, սակայն. «Գնացինք տրակտորը բերեցինք, որ շահագործենք, բայց Նինա Ադամյանն ասաց, թե դա ձեր ասելով չի, մենք ոնց կուզենք, կանենք: Գնացինք ստիպված ուրիշ գյուղից  տրակտոր բերեցինք», -ասաց գյուղապետը:

Նրա խոսքով, նույն վիճակն է նաև սահմանամերձ մյուս` Ներքին Կարմիր աղբյուր և Մովսես գյուղերում, և մանավանդ, հողագործության այս բուռն շրջանում տրակտորները գտնվում են ԲՀԿ-կան կնոջ հսկողության տակ:

Նշենք, որ լրագրողների այցը Տավուշի մարզի սահմանամերձ գյուղեր կազմակերպվել է Պատերազմի և խաղաղության լուսաբանման ինստիտուտի օգնությամբ: