Ձեր վստահելի աղբյուրը

Պարտադիր կենսաթոշակային ֆոնդերի կառավարման լիցենզիա ստանալու համար ՀՀ կենտրոնական բանկին են դիմել ֆրանսիական «Ամունդի» ընկերությունը «Ակբա-Կրեդիտ Ագրիկոլ» բանկի հետ միասին և ավստրոգերմանական «Ցե-Կվադրատ» ներդրումային ընկերությունը «Տալանքս» խմբի անդամ՝ «Տալանքս ասեթ մենեջմենթ» ընկերության հետ: Այդ մասին տեղեկություն է տարածել Կենտրոնական բանկը:

2014 թվականի հունվարի 1-ից Հայաստանում ներդրվում է կենսաթոշակի պարտադիր կուտակային համակարգը. այսինքն յուրաքանչյուր աշխատող մարդ իր աշխատավարձի 5 տոկոսը պարտադիր կերպով վճարելու է կենսաթոշակային համակարգ: Իսկ կենսաթոշակային ֆոնդի կառավարիչներն էլ հենց քաղաքացու հավաքած գումարը կպահեն իրենց մոտ, մինչև կլրանա նրա կենսաթոշակային տարիքը:

Նշենք, որ Ազգային ժողովի կողմից ընդունված «Կուտակային կենսաթոշակների մասին» օրենքում ու դրան հարակից օրենքներում կատարված փոփոխությունների թիրախում հայտնվել են 1974 թվականից հետո ծնված ՀՀ քաղաքացիները:

«Երբ վերջնականապես կառավարիչները հայտնի դարձան, կզբաղվեն գովազդով: Իսկ հունվարի 1-ից հետո մեր քաղաքացիները կլրացնեն դիմում, թե իրենք որ ֆոնդին են ուզում մասնակցել և երբ եկավ աշխատավարձի ստանալու օրը, իրենք իրենց գումարից 5 տոկոս պակաս կստանան և այդ գումարը կփոխանցվի իրենց անձնական հաշվին, որը հետո կձևավորի նրանց կենսաթոշակը», -Panorama.am-ի թղթակցի հետ զրույցում սպասվող իրավիճակը պատկերավոր ներկայացրեց ԱԺ սոցիալական հարցերի մշտական հանձնաժողովի նախագահ Հակոբ Հակոբյանը (Թունելի Հակոբ)՝ նշելով, որ բացի աշխատավարձից պահումները, կեսաթոշակի ձևավորմանը մասնակից կլինի նաև պետությունը: Նրա խոսքով, քաղաքացին պարբերաբար հնարավորություն կունենա տեսնել իր հաշիվը: 

Այս բարեփոխումները ցանկալի չեն հասարակության մի ստվար հատվածի համար, և հարյուրավոր երիտասարդներ «Facebook» սոցիալական ցանցում «Ընդդեմ կենսաթոշակային համակարգի» անվանումով խումբ են ստեղծել ու պահանջում են հրաժարվել այդ համակարգը քաղաքացիներին պարտադրելուց:

«Բոլոր այն երիտասարդները, ովքեր դժգոհում են պարտադիր կուտակային կենսաթոշակային համակարգից, նրանք իրականում չեն պատկերացնում դա: Մենք՝ 74 թվականից առաջ ծնվածներս, մեր կենսաթոշակը չենք բարձրացնում, մեր մանկավարժների, բժիշկների, քաղծառայողի աշխատավարձը չենք բարձրացնում ու 20,7 միլիարդ փող ենք ներդրում համակարգի մեջ, որ ուղղենք իրենց անձնական հաշիվներին, որ բնակչությունը բարձր կենսաթոշակ ստանա: Ու այդ ամենից իրանք բողոքո՞ւմ են: Մենք մտածում ենք մեր երիտասարդների, մեր վաղվա սերունդի բարեկեցության մասին: Այսօրվանից վերցնում ենք դժվարությունը մեր վրա՝ իսկապես նրանց բարեկեցությունը ապահովելու համար», -ասաց ԱԺ ՀՀԿ-ական պատգամավորը:

Հիշեցնենք՝ Ազգային ժողովում այս փոփոխություններին ուղիղ մեկ տարի առաջ կողմ էին քվեարկել միայն ՀՀԿ-ն ու ՕԵԿ-ը: