Ձեր վստահելի աղբյուրը

Հոկտեմբերի 20-ին Եղվարդ-Երևան ճանապարհին տեղի ունեցած ավտովթարի հետևանքով մահացած Էդգար և Էդուարդ Հակոբյանների իրավահաջորդների ներկայացուցիչ, ՀՀ Փաստաբանների պալատի փաստաբան Մարատ Գինոսյանը վթարի կապակցությամբ հարուցված քրեական գործի նախաքննությունից դժգոհ չէ:

Հիշեցնենք` հարուցված քրեական գործի նախաննության շրջանակներում դերասան, երգիծաբան Վարդան Պետրոսյանին մեղադրանք էր առաջադրվել ՀՀ Քրեական օրենսգրքի 242-րդ հոդվածի 3-րդ մասի հատկանիշներով՝ «Ավտոմեքենա կամ մեխանիկական այլ տրանսպորտային միջոց վարող անձի կողմից ճանապարհային երթևեկության կամ տրանսպորտային միջոցների շահագործման կանոնները խախտելը որն անզգուշությամբ առաջացրել է երկու կամ ավելի մարդու մահ»: Նրա նկատմամբ որպես խափանման միջոց ընտրվել էր կալանքը և այժմ Վարդան Պետրոսյանը «Դատապարտյալների հիվանդանոց» քրեակատարողական հիմնարկում է:

Նախաքննության շրջանակներում կատարված դատաավտոտեխնիկակակն փորձաքննության եզրակացության համաձայն, ըստ փաստաբանի, արագության գերազանցումը նշվել է 71 և ավելի: Բայց փաստաբանն այլ կարծիքի է. «Հաշվի առնելով մեքենաների վնասվածքի բնույթը, իմ կարծիքով, խոսքը 70 կմ/ժ արագության մասին չի կարող լինել, այլ շատ ավելի` 100-ից էլ ավել կարող է լինել, որովհետև «ԲՄՎ» մակնիշի մեքենայի բախումից հետո «Նիվա» մակնիշի ավտոմենքենան 180 աստիճանով պտտվել է: Եթե արագությունը 60-70 կմ/ժ լիներ, հնարավոր չէր մեքենան նման աստիճանի տակ պտտվեր: Ես նման բան չեմ պատկերացնում»:

Տուժող կողմի ներկայացուցիչը Panorama.am-ի թղթակցի հետ զրույցում չբացառեց, որ արագությունը Վարդան Պետրոսյանը գերազանցել է ալկոհոլ օգտագործելու հետևանքով: «Ոչ միայն շշուկներ կան, այլ նաև Վարդան Պետրոսյանի վերաբերյալ դատաբժշկական փորձաքննություն է կատարվել, և փորձագետը իր հետևություններ բաժնում արձանագրել է այդ փաստը, որ երբ առաջին օրը Վարդան Պետրոսյանին տարել են «Էրեբունի» բժշկական կենտրոն, այնտեղ իրեն զննող նեյրովիրավույժը հիվանդության պատմության մեջ նկարագրառել է, որ Պետրոսյանը գտնվել է ոգելից խմիչքի ազդեցության տակ, ավելացրել է, որ վրայից ոգելից խմիչքի հոտ է գալիս»,- փոխանցեց տուժող կողմի ներկայացուցիչը:

Պաշտպանական կողմի այն հայտարարությանը, թե «Նիվա» մակնիշի մեքենայի հետդիտարկման հայելիները տեղում չեն եղել, փաստաբան Գինոսյանը հակառակն է արձագանքում:

«Եղել են, անպայման եղել են, ես դա լսել եմ տուժող վարորդից: Իմ լսելով կողային հայելիներից մեկը կոտրված սալոնում թափված է, մյուսն էլ, եթե չեմ սխալվում, ծռված վիճակում դռան վրա է մնացել, դռներն էլ ահավոր դեֆորմացիայի են ենթարկվել», -հայտարարեց Գինոսյանը:

Ավելին, նա փոխանցեց «Նիվա»-ի վարորդի խոսքերը, որ կողային հայելիների միջոցով է հետևից ինքը տեսել է Վարդան Պետրոսյանի վարած «ԲՄՎ» մակնիշի մեքենայի լույսերը: Փաստաբանի պնդմամբ, «Նիվան» գտնվել է կանգնած վիճակում և հետընթաց շարժում չի արել: «Ես այդպես եմ ասում ըստ վարորդի հայտարարության, իսկ փորձաքննությունը չի ասել` նա շարժման մեջ է գտնվել, հետընթաց է արել, թե կանգնած է եղել: Փորձագետը պատասխանել է քննիչի հարցերին, թե որ դեպքում ինչ արագություն կլիներ և այլն: Նա ընդամենը պատասխանել է քննիչի հարցադրումներին», -հավելեց մեր զրուցակիցը:

Նրա խոսքով, Հակոբյանները Պետրոսյանի նկատմամբ թշնամանք որպես էդպիսին չունեն, սակայն, ինչպես ասաց փաստաբանը, պետք է նրանց էլ հասկանալ` վշտի մեջ են. երկու երիտասարդ է մահացել, մեկն էլ հիվանդանոցում ծանր վիճակում է: «Վրդովմունք կա, ատելություն կա, բայց թշնամություն նրա նկատմամբ չկա: Նրանց ցանկությունն է, եթե մեղավոր է պետք է պատժվի»,- նշեց Գինոսյանը:

Ինչ վերաբերում է այդ հատվածում ճանապարհային նշանի բացակայությանը, ապա,Գինոսյանի պնդմամբ, դա չի կարող պատահարի հետ պատճառահետևանքային կապի մեջ լինել:

«Նիվա» մակնիշի մեքենայի մեջ դեպքի օրը 6 ուղևոր է եղել, ինչը չի ժխտում նաև տուժող կողմը: «Հետևում չորս հոգի է նստած եղել, ինչը վարչական պատասխանատվության ենթարկելու հարց է: Եթե անգամ հետևում նստած 4 ուղևորները թույլ չտային ներսի հայելիով նայել հետևից եկող մեքենային, ապա կողային հայելիներ են եղել և դրանց միջով վարորդը նայել է հետևից եկող մեքենային», նկատեց փաստաբան Գինոսյանը:

Նախորդող հրապարակումներ.

Վ. Պետրոսյանի մասնակցությամբ վթարի ենթարկված «Նիվա»-ի կողային հայելիները բացակայել են. Փաստաբան

«Դեռասանն, մեյմունություն է անում». Վ. Պետրոսյանի փաստաբանը ոստիկանապետին խնդրում է պատժել քննիչ Հակոբյանին

Վարդան Պետրոսյանի կալանքի մասին որոշումը դատարանը ընդունել է խախտումներով. Փաստաբանը թվարկում է դրանք