Ձեր վստահելի աղբյուրը

Նախագահական նստավայրը` Գերագույն խորհրդի շենքում, Սահմանադրական դատարանը` Երևանի Կենտկոմի փոխարեն, Ազգային ժողովի շենքի տարածքում` գերեզմաններ:

Բաղրամյան պողոտան երևանյան ճարտարապետությունը ամենալավը պահպանած փողոցներից է, այն նախատեսված էր նաև դեսպանատների փողոց լինելու համար:

Երևանյան հին ոճի առանձնատներով և փոքրիկ այգիներով փողոցի դեժավյու` Ճարտարապետների միության նախագահ Մկրտիչ Մինասյանի հետ:

«Կենտկոմի առաջին քարտուղար Գրիգոր Հարությունյանը զգում էր, որ քաղաքը անպայման պետք է ընդարձակվի դեպի հյուսիս` Քանաքեռ, Զեյթուն: Այն ժամանակ գլխավոր ճարտարապետը Մարկ Գրիգորյանն էր: Իրենց մտահղացմամբ, քաղաքի գլխավոր հատակագծի մեջ Բաղրամյան փողոցը կարևոր նշանակություն ունեցավ: Եղավ առաջարկ, որ փողոցը կառուցվի: Հիմքում նաև այն էր, որ չնայած պատերազմը դեռ չէր ավարտվել, բայց պատերազմից հետո Հայաստանում կլինեին նաև դեսպանատներ, դրանից ավելի լավ տեղ չէր կարող լինել: Այդպես էլ հիմքը դրվեց»,- պատմում է Մկրտիչ Մինասյանը:

Նա նկատում է, որ Երևանում շատ բաներ են աղավաղվել, բայց պողոտան պահպանվել է: Նախատեսվում էր կառուցել առանձնատների ձևով երեք-չորս հարկանի շենքեր, որոնք հետ էին դրված կարմիր գծից, իրենց դիմաց փոքրիկ այգիներ ունեին:

Ճարտարապետի բնորոշմամբ, դրանք շատ ներդաշնակ էին մեր կլիմային, պողոտայի ամբողջ մտահղացմանը:

Նոր պողոտայում է դրվում նաև կուսակցության կենտկոմի շենքը, Մարկ Գրիգորյանի հեղինակությամբ այն կառուցվեց, մի քիչ վերև` Գերագույն խորհրդի շենքն էր, որ հիմա նախագահական նստավայրն է:

Պողոտան, որ սկիզբ էր առնում այսօրվա Ֆրանսիայի հրապարակից, 43 թվականից մինչև 50-ականների վերջը ամբողջական կառուցապատվեց: Այդ ժամանակահատվածում էլ պողոտայի մի հատվածը բնակեցվեց գաղթականներով:

Այս պողոտայում հետագայում կառույցներ անելու իրավունքներ են ստանում ճարտարապետները: Մկրտիչ Մինասյանի խոսքով, բոլոր շենքերը շատ զուսպ են արված ու շատ գեղեցիկ են, ռելիեֆի հետ աշխատող են:

«Բոլորը շատ բարձրաճաշակ ճարտարապետական գործեր են: Ազգային մտածողությամբ, ազգային ժառանգությանը հետևողական լինելով, մի նոր հոսանք բերելով` նոր մայրաքաղաքի համար»,- ասում է Ճարտարապետների միության նախագահը:

Մանրամասն` տեսանյութում:

Տեսանյութում օգտագործվել են լուսանկարներ charkhchyan.wordpress.com և hinyerevan.com կայքերից:

«Երևան դեժավյու» նախագծի նախորդ թողարկումները`

«Երևան դեժավյու». Ներքին բակ, փայտյա պատշգամբ, կամար` ազգային ոճը պահպանած փողոցները

«Երևան դեժավյու». Բուզանդի և Արամի` մի շնչառությամբ ապրող փողոցները

«Երևան դեժավյու». Մոդեռնիստական քաղաքի ատրիբուտները` տրամվայ, «Արգիշտի» սրճարան