Ձեր վստահելի աղբյուրը

«Այս պահին մեր ցանկությունն է, որ ՀՀ կառավարությունը հանդես գա հայտարարությամբ և նշի, որ այսօր Իրաքի եզդիների հանդեպ նույն ցեղասպանությունն են գործում, ինչն անում էին 1915 թվականին հայերի հետ»,-Panorama.am-ի հետ զրույցում ասաց Հայաստանում եզդիների միության նախագահ Ազիզ Թամոյանը:

Անդրադառնալով երեկ կառավարության շենքի դիմաց եզդիների կազմակերպած ցույցին և ոստիկանների հետ բախմանը՝ Թամոյանը սխալ համարեց հասարակական կարգը չպահպանելով ցույց անցկացնելը:

«Մարդիկ բորբոքված են, ցանկանում են, որ իրենց հայ բարեկամները աջակցեն և կանգնեն իրենց կողքին այնպես, ինչպես իրենք էին հայերի կողքին արցախյան ազատամարտի ժամանակ»,-նշեց Թամոյանն՝ ավելացնելով, որ ինքը մեծ հարգանք ունի կառավարության ղեկավարի հանդեպ և հասկանում է, որ զբաղվածության պատճառով չկարողացավ հանդիպել կառավարության շենքի դիմաց հավաքված եզդիներին:

Հիշեցնենք, որ ՀՀ կառավարությունը 50 հազար դոլար օգնություն էր տրամադրել իրաքյան եզդիներին:

Եզդիների միության նախագահը հայտնեց, որ այդ գումարը ՄԱԿ-ի միջոցով փոխանցվել է, սակայն Իրաքյան Քրդստանը թույլ չի տալիս, որ այն հասնի եզդիներին:

Նախորդող հրապարակումներ՝
Գերտերությունները կօգնեն Իրաքի եզդիներին. Ազիզ Թամոյան (տեսանյութ)
«Իրաքյան եզդիների ցանկությունն է, որ իրենց զբաղեցրած տարածքը համարվի ԱՄՆ-ի վարչական տարածք»
Հայաստանյան եզդիները մարդասիրական օգնություն են խնդրում իրաքյան եզդիների համար (տեսանյութ)
«ՀՀ իշխանությունները կիսում են եզդիական համայնքի մտահոգությունները»