Ձեր վստահելի աղբյուրը

Հունվարի 12-ին Գյումրիում Ավետիսյանների ընտանիքի հետ կատարված դեպքի վերաբերյալ այսօր նրանց իրավահաջորդների ներկայացուցիչ-փաստաբանները մանրամասներ են ներկայացրել:

Ռուսական զորամասի զինծառայող Վալերի Պերմյակովի կողմից արձակած կրակոցի ժամանակ, Ավետիսյանների իրավահաջորդների ներկայացուցիչ, փաստաբան Լուսինե Սահակյանի ներկայացմամբ, առաջին սենյակում գտնվող Աիդա Ավետիսյանը չի հասցրել տեղաշարժվել, իսկ ընտանիքի մնացած անդամները տեղաշարժվելու փորձեր արել են:

Փաստաբանն այս հայտարարությունն արեց` հիմնվելով դատաբժշկական և դատակենսաբանական եզրակացությունների վրա:

«Սերյոժա և Հասմիկ Ավետիսյանները նույն սենյակում են եղել: Դիրքերը նայելով հստակ երևում է, որ Հասմիկը արթնացած է եղել, նա կարողացել է նույնիկ կանգնել: Պապիկը՝ Սերյոժա Ավետիսյանը, պայքարել է: Նրա վրա, բացի հրազենային վնասվածքից, եղել են բութ գործիքներով վնասվածքներ, քերծվածքներ: Հրացանի փողի վրա հայտնաբերվել է նրա ԴՆԹ-ն: Նա փորձել է բռնել ինքնաձիգի կոթից, սակայն կրակողը խզակոթով հարվածել է նրան: Նրա մոտ շուրջ տասերկու վնասվածք է եղել: Հասմիկ և Սերյոժա Ավետիսյանների վրա վնասվածքները շատ են: Իսկ Աիդա Ավետիսյանը գլխի շրջանում է երկու վնասվածք ստացել»,- ներկայացրեց Սահակյանը:

Նրա խոսքով, այդ ժամանակ Արմեն Ավետիսյանը արթուն է եղել ու փորձել է տեղաշարժվել, իսկ փոքրիկ Սերյոժան եղել է մոր` Արաքս Պողոսյանի գրկում, և նա փորձել է պաշտպանել երեխային մարմնով:

«Արաքս Պողոսյանի ձեռքերի վրա եղել են վնասվածքներ՝ սվին- դանակի երկու կողմում արյան շիթեր են եղել: Արաքսյայի մոտ հինգից-վեց վնասվածք է եղել»,-հավելեց փաստաբանը:

Առայժմ հստակ չի ուրվագծվում պատկերը, թե ինչ դիրքով են գտնվել Ավետիսյանները, երբ հենց նրանց ուղղությամբ կրակոցներ են արձակվել ու նրանք վնասվածքներ են ստացել: Եվ այդ պարզելու համար փաստաբան Միհրան Պողոսյանի տեղեկացմամբ, տուժողների դիրքերի վերաբերյալ նշանակվել է լրացուցիչ համալիր փորձաքննություն:

Հիշեցնենք, որ այս տարվա հունվարի 12-ին ինքնաձիգից արձակած կրակոցներով սպանվել էին Գյումրի քաղաքի Մյասնիկյան փողոցի թիվ 188 տան բնակիչներ՝ 1961-ին ծնված Սերյոժա Ավետիսյանը, 1959-ին ծնված Հասմիկ Ավետիսյանը, 1979-ին ծնված Աիդա Ավետիսյանը, 1981-ին ծնված Արմեն Ավետիսյանը, 1990-ին ծնված Արաքսյա Պողոսյանը: Տան փոքրիկ բնակիչը` 2014-ին ծնված Սերյոժա Ավետիսյանը, հրազենային վնասվածքներով տեղափոխվել էր հիվանդանոց, որտեղ 7 օր մնալուց հետո մահացավ: Կատարվածի համար մեղադրվում է ռուսական ռազմաբազայի զինծառայող Վալերի Պերմյակովը: