Ձեր վստահելի աղբյուրը

Տաքսու վարորդները որոշել են հերթական բողոքի ակցիան անցկացնել։ Այն տեղի կունենա այսօր՝ ոստիկանության տուգանային հրապարակի դիմաց («Փոսի գայի»)։ Ակցիան կրելու է «Տաքսիների կայանատեղիների հարցը մնում է չլուծված» կարգախոսը։ Տաքսու վարորդների համար այսօր դա լուրջ խնդիր է, քանի որ կայանատեղերի բացակայության պատճառով ստիպված են լինում կայանել անհարմար վայրերում:

Ինչպես Panorama.am-ի թղթակցի հետ զրույցում նշեց տաքսու վարորդ Էմիլ Սահակյանը, իրենք պահանջում են, որպեսզի տաքսիների համար կայանատեղիներ ստեղծեն: Դա, ըստ նրա, կնպաստի նաև մայրաքաղաքում ծանրաբեռնվածության թեթևացմանը:

Է.Սահակյանի խոսքերով՝ ինքն ավելի քան քսան տարի աշխատում է որպես տաքսու վարորդ և հիմնականում կայանում է Մաշտոց-Թումանյան փողոցների հատվածում, սակայն այսօր այդտեղ կայանելն արգելվում է: Բացի այդ, տեսախցիկները նկարում են և բազմակի անգամ տուգանվում են կայանման համար: Ընդ որում, լինում են դեպքեր, երբ մինչև տուգանքի առաջին ծանուցում ստանալը, անձը տուգանվում է 3-4 անգամ միևնույն խախտման համար:

«Մենք ասել ենք, որ մեզ համար տեղ հատկացնեն, բայց ոչ մի քայլ չեն ձեռնարկում: Ստիպված նորից կանգնում ենք այդ տարածքում, որից հետո տանում են տուգանային հրապարակ, ակտ են գրում, իսկ ամեն ակտը 5 հազար դրամ արժե: Մինչև ակտի գումարը չենք մուծում, մեքենաները տուգանային հրապարակից թույլ չեն տալիս հանենք»,- նշեց Է.Սահակյանը:

Նրա խոսքերով՝ իրենք պահանջում են, որպեսզի համապատասխան պաշտոնյաները այդ հարցը քննարկեն, տաքսիների համար կայանատեղիներ հատկացնեն և ոչ մի անօրինակ գործողություն իրենց հանդեպ չլինի:

«Մենք պահանջում ենք, որ ամեն ինչ լինի օրենքի շրջանակներում»,- ասաց Էմիլ Սահակյանը: