Սյունիքի մարզում խոշոր ներդրումներով նոր պոչամբար են կառուցելու. Վստահ է բնապահպանը
Սյունիքի մարզի 3 պոչամբարների վերամշակման մասին օրինագիծը, որն այս օրերին քննարկվում է Հայաստանի Ազգային ժողովում, ոչինչ չասող երևակայական փաստաթուղթ է: Այդ մասին Panorama.am-ի թղթակցի հետ զրույցում կարծիք հայտնեց Կանաչների միության նախագահ Հակոբ Սանասարյանը:
«Բախտախնդիրներ են, ոչինչ չխոստանալով ուզում են գործը անել: Ասում են` եկեք հաստատեք այս փաստաթուղթը, սեփականության իրավունքով տիրանանք պոչամբարներին և մեկ տարի հետո Մաստեր պլանը կառավարությունը կհաստատի, նոր կսկեն աշխատել»,- ասաց Սանասարյանը:
Հիշեցնենք` խոսքը «Ողջիի, Փխրուտի, Արծվանիկի պոչամբարներում կուտակված և կուտակվող արտադրական լցակույտերի մշակման ներդրումային ծրագրի մասին» օրինագծի վերաբերյալ է: Օրենքով, պոչամբարների վերամշակումն իրականացնելու է «Ալյոտիգ» ՍՊԸ-ն է, որի ղեկավարը զանգեզուրցի Վարդան Շահնազարյանն է: Ծրագրին ֆինանսական խոշոր աջակցություն` շուրջ 300 մլն ԱՄՆ դոլար, տրամադրում է միջազգային VSEI ձեռնարկությունների խումբը: Պոչամբարների վերամշակման արդյունքում ընկերությունը խոստանում է, որ պոչամբարների ռիսկայնությունը կնվազի, մասսայականորեն կոմպոզիտային թելերից կարտադրվեն գյուղատնտեսության համար հակակարկտային ցանցեր և մոտ 400-450 հա գյուղատնտեսական հողատարածքներ կդրվեն ոռոգման տակ: Եվ ամենակարևորը` նրանք խոստանում են Սյունիքի մարզում շուրջ 1500 աշխատատեղ բացել:
Օրինագծով մշակվելիք «Մաստեր պլան»-ը, որը դեռ պետք է ապագայում հաստատվի կառավարության որոշմամբ, անցնի բնապահպանական փորձաքննություն, դառնալու է «Ալյոտիգ»-ի գործունեության հիմքը:
«Գործունեության նախագիծը պետք է հենց սկզբում ներկայացվեր, որ հասկանալի լիներ, թե ինչ տեխնոլոգիաներով են աշխատելու, ինչ երաշխիք կտա, որ տնտեսությունը կզարգանա, ինչ երաշխիք կտա, որ շրջակա միջավայրը կբեռնաթափվի ծանր մետաղներից, քանի որ մենք ինքներս միշտ փափագել ենք, որ թափոններ չլինեն: Սա մի անհասկանալի երևույթ է և, հավանաբար, կառավարությունը և Ազգային ժողովի որոշ ազդեցիկ պատգամավորներ, մտած են այս գործի մեջ, հակառակ դեպքում այսպիսի նախագիծ ներկայացնողին պատասխանատվության պետք էր կանչել: Ով է լսել, որ պառլամենտը հաստատի, հետո ներկայացնեն մաստեր պլան, սա ի՞նչ բան է»,-նախագիծն ուսումնասիրելուց հետո այս եզրահանգման է եկել բանապահպան Սանասարյանը:
Օրինագծին Ազգային ժողովում դեմ է արտահայտվել միայն ԱԺ «Ժառանգություն» խմբակցության անդամ Զարուհի Փոստանջյանը, որը ինչպես Սանասարյանը, հայտարարել էր, թե հայտնի չէ` ինչ գիտական հիմքի ու ինչ ծրագրի հիման վրա է իրականացվելու ծրագիրը: Խորհրդարանական մեծամասնությունը` ՀՀԿ-ն, նաև «Բարգավաճ Հայաստան» խմբակցությունը հայտարարել էին, որ կողմ են ծրագրին, քանի որ այդպիսով խոշոր ներդրումներ են իրականացվելու Հայաստանի տնտեսության մեջ:
Մինչդեռ բնապահպանի խոսքով, երկար տարիների փորձը կարող էր դաս լինել իշխանությունների համար և պետք էր արգելել նման ներդրումները:
«Ինչ է նշանակում ներդրում, սա ի՞նչ անասնական մոտեցում է, չեմ հասկանում: Մի՞թե մեր 25 տարիների փորձը ցույց չտվեց, որ Հայաստանում մեռյալ դաշտ են ստեղծում հենց ներդրումները: Սուտ, կողոպուտ: Խոստանում են 500 մլն ներդրում, բայց հետո տեսնում ես` տակը բան չկա, հակառակը, ոչ միայն չեն ներդրել, գողացել են ու պարտքեր առաջացրել»,- հայտարարեց Սանասարյանը` նկատելով, որ իրական կյանքում պետք է փաստերին հավատալ, այլ ոչ թե խոստումներին:
Բնապահպանի համար տարօրինակ է` ինչպես են եթե ծրագիրն իրականացնողները հայտարարում, որ պոչամբարները մշակելու են` առանց նոր պոչամբար ստեղծելու:
«Էդ ինչ մեթոդներ, տեխնոլոգիաներ պետք է կիրառի, որ պոչամբար չստեղծի: Արմանիսի օրինակը մեր աչքի առաջ է, պոչամբարներ չունեցա՞վ Արմանիսը, գնացեք, տեսեք` ինչ է կատարվում այնտեղ», -նկատեց բնապահպանը:
Սանասարյանի մյուս մտավախությունը ծրագրի իրականացման վերաբերյալ այն է, որ հայտնի չէ, թե պոչամբարների որքան տոկոսն են կորզելու, մինչդեռ հայտնի է, որ դրանցում կան օգտակար տարրեր:
«Ես վստահ եմ, որ նրանք նոր պոչամբար են կառուցելու և դա նշանակում է, որ մենք կունենանք ևս մեծագույն տարածք, որը կկորի», -նկատեց Սանասարյանը:
Մեր դիտարկմանը, թե խորհրդարանում նախագիծը ներկայացնող Էներգետիկայի և բնական պաշարների փոխնախարար Արեգ Գալստյանը հայտարարել էր, որ «Մաստեր պլանը» բնապահպանական փորձաքննության ենթարկելու ժամանակ հանրային մեծ քննարկում կանցնի, Սանասարյանն ի պատասխան նկատեց, որ «միայն հիմարների հետ կարելի է այդպես խոսել» ու հավելեց. «Հիմա բնապահպանական փորձաքննությունը կաշառքով է արվում հանքարդյունաբերության հետ կապված, իսկ լսումները միակողմանի քարոզչություն են, որը ոչ մի արդյունք չի տալիս»:
Հարակից հրապարակումներ`
1500 նոր աշխատատեղ. Սյունիքի մարզում 3 պոչամբար կազատվի թափոններից, կկառուցվեն գործարաններ
ԱԺ-ն սկսել է քննարկել Հայաստանի 3 խնդրահարույց պոչամբարներին վերաբերող օրինագիծը
Սա օրենք է մենաշնորհ տրամադրելու մասին. Փոստանջյանը` պոչամբարները մշակելու վերաբերյալ օրինագծի մասին
ԲՀԿ-ական պատգամավորը Փոստանջյանին մեղադրեց դիլետանտության մեջ
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
