Արաբագետ. «Իսլամական պետություն»-ը փորձում է հանդես գալ որպես պետություն` իր բոլոր ատրիբուտներով
«Իսլամական պետություն»-ը փորձում է հանդես գալ որպես պետություն` իր բոլոր ատրիբուտներով: Անդրադառնալով վերջին մեկ տարվա ընթացքում «Իսլամական պետության» գործունեությանը` Panorama.am-ի հետ զրույցում նման տեսակետ հայտնեց արաբագետ Սարգիս Գրիգորյանը:
«2014 թ. հունիսի 29-ին «Իրաքում և Շամում իսլամական պետություն» կառույցը վերանվանվեց «Իսլամական պետություն» (ԻՊ): Արդեն մեկ տարի է` այդ անվամբ կառույցը վերահսկում է տարածքներ Սիրիայում և Իրաքում: Այդ տարածքներում ԻՊ-ը ստեղծել է կառավարման մարմիններ, իրականացնում է հարկահանություն, սոցիալական ծրագրեր, իրականացնում շարիաթի օրենքներով դատավարություն և այլն: Այսինքն, փորձում է հանդես գալ որպես պետություն իր բոլոր ատրիբուտներով: Մյուս կողմից ԻՊ-ին հաջողվում է մի քանի ճակատներով ռազմական գործողությունների մասնակցել: ԻՊ-ի դեմ իրականացվում են օդային հարվածներ, ցամաքային գործողություններ, սակայն, այդ մեկ տարվա ընթացքում, մեծ հաշվով, ԻՊ-ի կողմից վերահսկվող տարածքները փոփոխությունների չեն ենթարկվել, ավելին` ԻՊ-ն ավելի է ընդլայնել իր կողմից վերահսկվող տարածքները»,-նշեց Ս. Գրիգորյանը:
Արաբագետի խոսքով, ԻՊ հայտարարելուց հետո մուսուլմանական երկրներում նորահռչակ խալիֆ Աբու Բաքր ալ-Բաղդադիին հավատարմության երդումներ տալու մի ամբողջ շարք գրանցվեց, որոնց հաջորդեցին Աբու Բաքրի կողմից հավատարմության երդումների ընդունումն ու այդ վայրերում ԻՊ-ի վիլայեթներ ստեղծելու մասին հայտարարությունները:
«Այս պահին ԻՊ-ի 35 վիլայեթներ են գործում իսլամական երկրներում: Վերջին հռչակված վիլայեթը Կովկասի վիլայեթն էր, որի մասին հայտարարեց 2015 թ. հունիսի 23-ին ԻՊ-ի առաջնորդներից Աբու Մուհամմադ ալ-Ադնանին: Հայտարարությունում Ալ-Ադնանին նշեց, որ Կովկասում ձևավորվում է ԻՊ-ի կազմի մեջ մտնող նոր տարածք` Կովկասի վիլայեթ, որի նոր էմիր է նշանակվում` Աբու Մուհամմադ ալ-Կադարին:
Այսինքն, մենք այժմ Կովկասում ունենք ԻՊ-ին պատկանող նոր վիլայեթ, իսկ դա նշանակում է հետևյալը. «ԻՊ-ի խալիֆի կողմից իրեն ուղղված հավատարմության երդումն ընդունելն ու դրան հավելյալ վիլայեթ հռչակելը հենց այնպես չի արվում: Վիլայեթ հռչակվում է այն տարածքներում, որտեղ իսլամականները բավական ակտիվ են եղել և այդ տարածքներում կա բավական ազդեցիկ իսլամական ծայրահեղ արմատական ներուժ, ինչը կարող է ապահովել ԻՊ-ի ազդեցության արդյունավետ տարածումը այդ տարածքներում: Հայտնի են դեպքեր, երբ Աբու Բաքր ալ-Բաղդադիի ուշադրությանն այդպես էլ չեն արժանացել հավատարմության երդումները: Օրինակ` Հնդկաստանում գործող «Թանզիմ Անսար աթ-Թաուհիդ» իսլամական ծայրահեղ արմատական խմբավորման հավատարմության երդումը (կառույցը հավատարմության երդում էր տվել ԻՊ-ի խալիֆին 2014 թ. հոկտեմբերին): Աբու Բաքրը, հավանաբար կարևորություն չտվեց այդ կառույցի ջիհադական պայքարին Հնդկաստանում` խմբավորմանը համարելով ոչ ազդեցիկ և հետևաբար, դրա կողմից իրականացվող պայքարը ոչ արդյունավետ: Արդյունքում, «Թանզիմ Անսար աթ-Թաուհիդ» խմբավորումը սահմանափակվել է Հնդկաստանում ԻՊ-ի գործունեության քարոզչությամբ»:
Արաբագետի կարծիքով` կովկասցի իսլամականների տված հավատարմության երդումն Աբու Բաքրի կողմից հավանության արժանանալը ենթադրում է ոչ միայն ԻՊ-ի գաղափարական, ռազմական, ֆինանսական և այլ բնույթի աջակցություն, այլև Կովկասում շարունակվող ջիհադական պայքարի առավել ակտիվացում:
«Կովկասցիները պետք է ցույց տան խալիֆին, որ վերջինիս կողմից հավատարմության երդումն ընդունելն ու նոր վիլայեթի հռչակումը պետք է արդարացվի հետագա պայքարով: Հետևաբար, մենք կտեսնենք Կովկասյան տարածաշրջանում իսլամական ծայրայեղ արմատական միտումների ավելացում, ինչը չափազանց վտանգավոր է»,- երզրափակեց բանախոսը:
Նախորդող հրապարակում`
Ուղիղ մեկ տարի է անցել «Իսլամական պետության» ստեղծումից, ի՞նչ ունենք այսօր
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
