Ձեր վստահելի աղբյուրը

ՀՀ Սփյուռքի նախարարության աջակցությամբ այսօր «Էրեբունի» հյուրանոցի բիզնես կենտրոնի նախասրահում կազմակերպվեց սիրիահայերի համար Աշտարակ քաղաքում «Նոր Հալեպ» թաղամասի կառուցման աջակցմանը միտված հայ անվանի նկարիչների հավաքածուի նախնական ցուցադրությունը: Ինչպես լրագրողներին հայտնեց Սփյուռքի նախարար Հրանուշ Հակոբյանը, սիրիահայերին աջակցելու կոչին արձագանքել են անվանի հայ նկարիչներ, որոնց թվում՝ Վահրամ Դավթյանը, Նիկոլ Աղաբաբյանը, Էդիկ Պետոյանը, Վահան Ռումելյանը, Հարութ Աղաջանյանը, ընդհանուրը՝ 30 նկարիչ `36 նկարով:

«Այս նկարիչները մի քանի նկար նվիրեցին սիրիահայերին՝ հուլիսի 17-ից 22-ը Մարսել քաղաքում «Ֆրանս-հայկական գերազանցության շաբաթ» մշակութային օրերի շրջանակներում հիշյալ նկարների ցուցահանդես – վաճառքին, որի ողջ հասույթը կտրամադրվի թաղամասի շինարարական աշխատանների իրականացմանը», - ասաց Հ.Հակոբյանը` հիշեցնելով, որ ՀՀ կառավարությունն արդեն ընդունել է թաղամասի կառուցման մասին համապատասխան որոշում և հատուկ հանձնարարական է տրված ՀՀ նախագահ Սերժ Սարգսյանի կողմից:

Հրանուշ Հակոբյանը շնորհակալություն հայտնեց նաև գործարար Հրանտ Վարդանյանի ընտանիքին՝ հօգուտ սիրիահայերի՝ թաղամասի համար ստեղծված հիմնադրամին շուրջ 43 միլիոն դրամ է փոխանցելու համար:

«Հուսով եմ, որ մեր այս նախաձեռնությունը հուսալի արդյունք կունենա», - եզրափակեց նախարարը՝ ներակյացնելով ցուցահանդեսի մասնակից հեղինակներին: