Գեղանկարիչներն աջակցում են Օձունի եկեղեցու վերականգնմանը

Մշակույթ 13:20 17/08/2013

Գեղանկարիչներն աջակցում են Օձունի եկեղեցու վերականգնմանը

Օձունի եկեղեցու վերականգնման գործընթացին օժանդակելու համար նկարիչների միության և «Հովհաննես Իմաստասեր Կաթողիկոս Օձնեցի» բարեգործական հիմնադրամի միջև այս տարվա ապրիլի 4-ին վավերացված համաձայնագրի համաձայն` նկարիչները գեղանկարներ և այլ գեղարվեստական աշխատանքներ են նվիրաբերում հիմնադրամին` դրանց վաճառքը կազմակերպելու և հասույթը, հիմնադրամի կանոնադրությամբ նախատեսված, մշակութային արժեքների վերականգնմանն ուղղելու համար: Հիմնադրամի նախաձեռնության շրջանակներում օգոստոսի 15-ին հանդիպում էր կազմակերպվել Վանաձորի կերպարվեստի թանգարանում, որին մասնակցում էր նաև Լոռու մարզպետ Արթուր Նալբանդյանը:

Լոռու մարզպետարանի հասարակայնության հետ կապերի վարչության հաղորդմամբ` հիմնադրամին աշխատանքներ էին նվիրաբերել գեղանկարիչներ Փափագ Ալոյանը, Անատոլի Ավետյանը, Հայկուհի Ավագյանը, Վազգեն Բադալյանը, Կարինե Գլոյանը, Սամվել Խառատյանը, Արփինե Հովհաննիսյանը, Ռոբերտ Հեքիմյանը, Վազգեն Ղաբուզյանը, Արա Ղևոնդյանը, Արմեն Միկոյանը, Արտակ Մկրտչյանը, Արամ Նազարյանը, Ռաֆայել Ջավախյանը, Արմեն Վահրամյանը, Հենրիկ և Սարգիս Գարուկյան եղբայրները:

Աղբյուրը հիշեցնում է, որ 2012 թ.-ի հուլիսի 23-ից «Հովհաննես Իմաստասեր Կաթողիկոս Օձնեցի» բարեգործական հիմնադրամը սկսել է ՀՀ Լոռու մարզի Օձուն համայնքի Սուրբ Մարիամ Աստվածածին եկեղեցու վերականգնման աշխատանքները: Հիմնադրամը նպատակ ունի ՀՀ տարածքում պահպանելու և վերականգնելու պատմամշակութային հուշարձաններ` եկեղեցիներ, մատուռներ, հուշարձան և մահարձան կոթողներ, խաչքարեր, կամուրջներ, ամրոցներ և աղբյուրներ:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: