Ձեր վստահելի աղբյուրը

Արվեստագետն առհասարկ, իսկ նկարիչը` մասնավորապես, չի ապրում այն բարեկեցիկ կյանքով, որին արժանի է: Այսօր Հայաստանի նկարիչների միության համագումարից առաջ լրագրողների հետ զրույցում նման կարծիք հայտնեց միության նախագահ Կարեն Աղամյանը:

Ըստ նրա` աա է թիվ մեկ խնդիրը. «Հույս ունեմ, որ բոլոր հարցերին կպատասխանենք և կփորձենք լուծումներ գտնել»:
Անդրադառնալով միության նախագահի ընտրության հարցին և իր թեկնածությանը, Կարեն Աղամյանը նշեց, որ եթե համագումարը գտնի, որ իր արած գործը բավարար է և ինքը կարող է շարունակել նույն գծով, կշարունակի, եթե ոչ, ապա կընտրի մեկ այլ հավակնորդի:

«Հակասական կարծիքներ ես իսկապես շատ եմ լսել, բայց ընդամենը երկու-երեք հոգուց: Տպավորություն է ստեղծվում, որ շատ լարված, անտանելի վիճակ է: Կարծում եմ, որ նկատում եք` մթնոլորտը հանգիստ է ավելի: Հուսով եմ, որ կլինի շատ կառուցողական համագումար»,- ասաց նա:

Կարեն Աղամյանի ծրագրում կարևոր տեղ է զբաղեցնում ստեղծագործական միությունների մասին օրենքի հարցը, որը մեր երկիրը չունի. «Երբ կարողանանք հասնել նրան, որ այդ օրենքն ընդունվի, ամեն ինչ իր տեղը կընկնի»:

Panorama.am-ի հարցին, ո՞րն է այս հինգ տարիների ամենակարևոր ձեռքբերումը, Կարեն Աղամյանը պատասխանեց. «Նկարիչների միությունը կարողացավ ունենալ հոյակապ ցուցասրահներ: Անկախության տարիներին Հայսատանում բազմաթիվ շենքեր են կառուցվել, սակայն մշակութային նպատակի ծառայող երկու կառույց է ստեղծվել` Մատենադարանի հետնամասի կցորդը և Հայաստանի նկարիչների միության ցուցասրահները: Փոխարենը հազարավոր, հարյուրավոր` ռեստորաններ և կազինոներ: Այդ ցուցասրահներով մենք շատ հպարտանում ենք»:

Նախորդիվ`

Մեկնարկել է Հայաստանի նկարիչների միության 18-րդ համագումարը

«Նկարիչների միությունը գնալով մեռնում է». Արդյո՞ք Հաղթանակ Շահումյանը կառաջադրի իր թեկնածությունը միության նախագահի պաշտոնում

Առաջիկայում Նկարիչների միության անդամները նախագահ են ընտրելու. «Եթե դնեմ թեկնածությունս ու պարտվեմ, կափսոսեմ»