Ամենուր մահարձաններ են, մայրաքաղաքը դարձել է Թոխմախի ֆիլիալ. Քանդակագործ

Մշակույթ 13:07 02/06/2014

Ամենուր մահարձաններ են, մայրաքաղաքը դարձել է Թոխմախի ֆիլիալ. Քանդակագործ

Քանդակագործ, արվեստագետ Սահակ Պողոսյանը կարծում է, որ Երևանի կենտրոնում Անաստաս Միկոյանի արձանի տեղադրումը քաղաքական ենթատեքստ ունի: Այսօր լրագրողների հետ հանդիպման ժամանակ նա հայտարարեց, որ այդ արձանի տեղադրումը «անպատկառություն է» բռնությունների արդյունքում զոհված միլիոնավոր մարդկանց հիշատակին:

Նա իր խոսքով, մի վատ միտում է նկատել մայրաքաղաքում. Ամենուր մահարձաններ են տեղադրվում:

«Այդ առումով կարծես մայրաքաղաքը դարձել է Թոխմախի ֆիլիալ, գերեզմանատուն: Օրինակ Ռոդենի արձանը, որն ըստ էության մահարձան էր, տեղադրվեց քաղաքի կենտրոնական հրապարակներից մեկում, առանց մասնագետների հետ քննարկման: Քաղաքը լի է մահարձաններով, սակայն արվեստի իրական արժեք ունեցող արձանները քիչ են», -հայտարարեց քանդակագործը:

Նկարիչ Զարուհի Մուրադյանն ասաց, որ ինքը երեք տարի առաջ Երևանի քաղաքապետարանին առաջարկել է երևանյան մի շարք փողոցներ, որոնք անուններ չունեն, անվանակոչել շատ հայտնի նկարիչների անուններով, սակայն մինչ այժմ քաղաքապետարանից նկարիչին չեն արձագանքել:

«Վախի մթնոլորտը պահպանելու համար ուզում են բերեն մահարձանը կանգնեցնեն կենտրոնում»,- Անաստաս Միկոյանի արձանը կանգնեցնելու վերաբերյալ ասաց Մուրադյանը:

Նա նաև ուղերձ հղեց քաղաքապետարանին` նշելով, որ պետք է շատ գեղեցիկ արձաններ կանգնեցնել և ոչ մահարձաններ:

«Օրինակ, մենք ունենք մայրության տոն, բայց Երևանում կնոջ արձան չունենք, ունենք սիրահարների այգի, բայց սիրահարների արձան չունենք: Նման արձաններ կանգնեցնելու համար պետք է մրցույթ հայտարարել ու ընտրություն կատարել»,- հայտարարեց Մուրադյանը` կամ էլ որպես այլընտրանք առաջարկելով մորատորիում հայտարարել Երևանում արձաններ կանգնեցնելու հարցում:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: