«Ոսկե ծիրանն» այս տարի հարուստ է նաև արտամրցութային ծրագրերով. Միքայել Ստամբոլցյան
«Հայ և միջազգային մշակութասեր հասարակայնությունը սիրով է սպասում հուլիսի 12-ից մեկնարկող «Ոսկե ծիրան» 12-րդ Երևանի միջազգային փառատոնին: «Ոսկե ծիրան»-ն այս 12 տարիների ընթացքում դարձել է Երևանի խորհրդանիշներից մեկը: Փառատոնն ամենաճանաչված, ամենահեղինակավոր միջազգային ստուգատեսն է, և մեր յուրահատուկ այցեքարտը»,-այսօր լրագրողների հետ հանդիպման ժամանակ ասաց ՀՀ մշակույթի նախարարի տեղակալ Արթուր Պողոսյանը:
Նա տեղեկացրեց, որ փառատոնն այս տարի նույնպես պահպանելու է իր անվանակարգերը, լինելու են նաև արտամրցութային ծրագրեր:
«Փառատոնի մեխերից են Հայոց ցեղասպանության 100-ամյակին նվիրված ֆիլմերի ցուցադրությունները, անցկացվելու են կինոսիրահարների և ուսանողների համար նախատեսված վարպետության դսեր, իսկ «Ռեժիսորներ առանց սահմանների» ծրագրին մասնակցելու են մի շարք երկրների մշակույթի նախարարներ»,-նշեց նախարարի տեղակալը:
Երևանի քաղաքապետի տեղակալ Արամ Սուքիասյանն էլ շեշտեց, որ մայրաքաղաքը պատրաստ է բազմաքանակ հյուրեր ընդունելու և բացի դահլիճային միջոցառումներից ու կինոդիտումներից, քաղաքի կենտրոնում կլինեն նաև մի շարք բացօթյա դիտումներ, իհարկե կցուցադրվեն ոչ ժյուրիի համար նախատեսված ֆիլմերը, սակայն սա նույնպես կինոմթնոլորտին էապես կնպաստի:
«Ուրախ եմ, որ «Ոսկե ծիրան» 12-րդ Երևանի միջազգային փառատոնը համարում ենք կայացած, ուրախ եմ, որ այս տարիների ընթացքում համառորեն և հաստատակամ ՎիվաՍել-ՄՏՍ-ը կանգնած է եղել փառատոնի կողքին, որովհետև մենք հավատում ենք, որ այն միայն միջազգային կինոփառատոն չէ, այլ այն կատարում է առաքելություն, ձգտում է ավելի ու ավելի ճանաչելի դարձնել մեր երկրի անունը: Տարեց տարի այն ավելի հաջողված է դառնում, որի մասին է վկայում դիմորդների քանակի աճը»,-նշեց Փառատոնի գլխավոր գործընկեր ՎիվաՍել-ՄՏՍ-ի տնօրեն Ռալֆ Յիրիկյանը:
Նշենք, որ այս տարի 105 երկրից 1600 հայտ է ներկայացվել փառատոնին մասնակցելու:
«Ոսկե ծիրան» Երևանի միջազգային կինոփառատոնի հիմնադիր տնօրեն Հարություն Խաչատրյանն էլ հայտնեց, որ փառատոնի այս տարվա ազդագրի հեղինակն է Լիլիթ Մալխասյանը:
«Բացի մրցութային ծրագրերից, այս տարին հարուստ է նաև արտամրցութային ծրագրերով: Երկու ծրագիր կա՝ նվիրված Հայոց ցեղասպանության 100-ամյակին՝ «Մենք կանք» և «Այլևս երբեք»: Բացի այդ, կներկայացնենք նոր ֆրանսիական և նոր գերմանական կինոն»,-նշեց փառատոնի ծրագրերի տնօրեն Միքայել Ստամբոլցյանը:
Նա ավելացրեց, որ «Երևանյան պրեմիերաներ» ծրագրի ընթացքում կցուցադրվեն խոշորագույն փառատոնների մասնակցած և տարվա ընթացքում աչքի ընկած ֆիլմերը:
Փառատոնի գեղարվեստական ղեկավար Սուսաննա Հարությունյանն էլ ասաց, որ ընդլայնվում է փառատոնին հայտ ներկայացնող երկրների աշխարհագրությունը: Ըստ նրա, այս տարվա ժյուրին շատ հետաքրքիր մարդիկ են գլխավորում՝ «Խաղարկային ֆիլմերի միջազգային մրցույթ»-ը որպես ժյուրիի նախագահ կղեկավարի Ռոբեր Գեդիգյանը (Ֆրանսիա), «Վավերագրական ֆիլմերի միջազգային մրցույթ»-ի ժյուրին՝ Մարեկ Հովորկանը (Չեխիա) , «Կորիզ» կարճամետրաժ ֆիլմերի միջազգային մրցույթ»-ի ժյուրին՝ Հովիկ Հաբեշյանը (Լիբանան), իսկ «Հայկական համայնապատկեր ազգային մրցույթ»-ի ժյուրին կղեկավարի Ալեքսանդր Գրոզևը (Բուլղարիա):
Փառատոնը կմեկնարկի Ռոբերտ Գեդիգյանի «Ինձ մի ասեք, թե տղան խելագար էր» (պայմանական թարգմանություն է) ֆիլմի ցուցադրությամբ»:
Նախորդող հրապարակումներ՝
«Այլևս երբեքը» աշխարհի տարբեր երկրներում պատմել է Հայոց ցեղասպանության մասին ճշմարտությունը
«WEB ԾԻՐԱՆ» 4-րդ համահայկական առցանց կինոփառատոնի արդյունքները
«Ոսկե ծիրան» փառատոնի շրջանակում չորս հատուկ ծրագիր նվիրված է լինելու Հայոց ցեղասպանությանը
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
