Եվրոպական ժառանգության օրեր՝ Հայաստանում

Մշակույթ 12:45 25/09/2015

Եվրոպական ժառանգության օրեր՝ Հայաստանում

Հայաստանում այս տարի Եվրոպական ժառանգության օրերը կանցկացվեն սեպտեմբերի 26-27-ին՝ «Հիշատակի ժառանգությունը» խորագրի ներքո: Հայաստանի Հանրապետության և Լեռնային Ղարաբաղի Հանրապետության մշակութային կազմակերպություններն այս տարի ևս հանրությանը կներկայանան բազմաթիվ միջոցառումներով:

Մշակույթի նախարարության հասարակայնության հետ կապերի վարչության փոխանցմամբ, Եվրոպայի Խորհրդի կողմից «Եվրոպական ժառանգության օրեր» միջոցառումը պաշտոնապես հաստատվել է 1991 թ.: 1999 թ. սկսած միջոցառումների շարքը իրականացվում է Եվրոպայի Խորհուրդ-Եվրամիություն համագործակցությամբ՝ «Եվրոպա. միասնական ժառանգություն» կարգախոսով:

Եվրոպական ժառանգության օրերն անցկացվում են յուրաքանչյուր տարի՝ աշնանը, Եվրոպական մշակութային կոնվենցիային (1954 թ.) միացած 50 Եվրոպական երկրներում:

Հայաստանը «Եվրոպական ժառանգության օրեր» ծրագրին միացել է 2000 թվականին: 2015 թ. «Հիշատակի ժառանգությունը» խորագրով միջոցառումները նվիր-ված են Հայոց ցեղասպանության 100-րդ տարելիցին:

Հայաստանի Հանրապետության տարածքում և արտերկրի հայկական գաղթoջախներում վեր են խոյանում Հայոց ցեղասպանության զոհերի հիշատակին նվիրված բազմաթիվ հուշակոթողներ, հուշաղբյուրներ, ստեղծվել են թեմատիկ թանգարաններ, գիտահետազոտական, կրթական հաստատություններ, որոնք հայ ժողովրդի պատմական հիշողության, սեփական պատմության նկատմամբ հարգանքի և մոռացության դեմ պայքարի վառ դրսևորում են, հավաստումը՝ նրա ապրելու, արարելու կամքի:

Եվրոպական ժառանգության օրերի մանրամասների վերաբերյալ կարող եք ծանոթանալ նաև ծրագրի պաշտոնական կայքէջում:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: