Ձեր վստահելի աղբյուրը

Այգեպարցի Արշալույս Գևորգյանի ընտանիքը, ում տունն ամբողջությամբ այրվել էր հակառակորդի կողմից գնդակոծության հետևանքով, հարևանի տանն է գիշերում, ուտում:

Panorama.am-ի հետ զրույցում Արշալույս Գևորգյանն ասաց, որ հրդեհից կարողացել են միայն մեքենան փրկել:

«Հրդեհից հետո քաշել, կանգնացրել էի դռանը, որ մեջը քնեինք, ես, կինս ու երկորդ կարգի հաշմանդամություն ունեցող տղաս: Իմ ողջ ունեցվածքը լրիվ մոխիր է դարձել, հողին հավասարվել, ես էլ ասելու բան չունեմ»,-ասաց Արշալույսն ու չկարողացավ շարունակել խոսակցությունը:

Հեռախոսը վերցրած գյուղապետ Անդրանիկ Այդինյանը Panorama.am-ին պատմեց, որ հրդեհի ժամանակ ընտանիքի բոլոր անդամները տանը քնած են եղել, գյուղացիները կարողացել են դուռը ջարդել, նրանց դուրս բերել:

«Ոչ մի բան տնից չենք կարողացել հանել, տանը քնած են եղել, դուռը ջարդեցինք, բան արինք, որ դուրս գան»,-ասաց գյուղապետը:

Հակառակորդի կրակոցների հետևանքով Այգեպարում նույն օրը ևս մեկ տուն է այրվել: Արարատ Վարդազարյանի տանը մարդ չի եղել: Այդինյանը պատմեց, որ այդ ընտանիքը մի քանի օր առաջ գնացել է Ռուսաստան՝ թոռնիկի կնունքին մասնակցելու, «էս մի քանի օրը հետ են գալու, նրանք էլ ոչ մի բան տնից հանած չեն եղել»:

Հրդեհի հետևանքով Արշալույսն ու տղան այրվածքներ են ստացել: Գյուղապետն ասաց, որ նրանց առաջին օգնություն է ցուցաբերել գյուղի բուժքույրը, ապա տեղափոխվել են Բերդի հիվանդանոց:

Առողջապահության նախարարությունից Panorama.am-ին հայտնեցին, որ այսօր առողջապահության նախարարն այրվածքաբան է ուղարկել Այգեպար՝ տուժածներին տեղում անհրաժեշտ օգնություն ցուցաբերելու համար:

Գևորգյանի ընտանիքին օգնել ցանկացողներին Սմբատ սարկավագ Խանվելյանը ֆեյսբուքյան իր էջում կոչ է արել կապվել իր հետ:

«Անցած գիշեր Տավուշի մարզի Այգեպար գյուղում թշնամու կրակոցներից այրվել է Արշալույս Գևորգյանի տունը: Իմ հետ զրույցում Արշալույսը ասեց հետևյալը. «Ես էլ եմ էրվել, Էրեխիս էլ վիզն ա վառվել: Տունս տակից կլյուխ մոխիր ա դարձել, ինչ ասեմ»: Այս ընտանիքին շտապ օգնել է պետք, խնդրանքս է, ով ցանկություն ունի օգնելու՝ կապվի իմ հետ»:
Ընտանիքին օգնելու համար Կոնվերս բանկում հաշվեհամար է բացվել՝ 1930044804170100, իսկ իրեր և այլ օգնութունը ուղարկելու համար սարկավագը կոչ է անում բերել Իջևան՝ «այնտեղից ես իրենց կտանեմ կամ կարող ենք միասին տանել»: