Ձեր վստահելի աղբյուրը

Այսօր երեկոյան` Երևանի ժամանակով 17:00-ին, չինական խոշորագույն քաղաքում` Շանհայում, պաշտոնապես կբացվի համաշխարհային «Էքսպո-2010» ցուցահանդեսը: Պաշտոնական բացմանը Չինաստանի նախագահի հրավերով մասնակցելու է նաև Հայաստանի Հանրապետության նախագահ Սերժ Սարգսյանը: Այս մասին Շանհայից հայտնում է Panorama.am-ի թղթակիցը: Մինչ այդ նախագահ Սերժ Սարգսյանի մասնակցությամբ բացվել էր ցուցահանդեսում Հայաստանի տաղավարը:

Տեղեկացնենք, որ համաշխարհային «Էքսպո» ցուցահանդեսները կազմակերպվում են հինգ տարին մեկ անգամ: Տնտեսական, գիտատեխնիկական և մշակութային փոխանակման տեսանկյունից համաշխարհային ցուցահանդեսները համարվում են խոշորագույն իրադարձություն, որոնք հարթակ են ոչ միայն երկրի պատմությունը և մշակույթը ցուցադրելու, նորարարական գաղափարներ և նվաճումներ փոխանակելու, այլև` ապագայի գլոբալ խնդիրների նկատմամբ երկրի մոտեցումները ներկայացնելու համար:

«Էքսպո-2010»-ի անցկացման իրավունքի համար Չինաստանը մրցել է Ռուսաստանի, Հյուսիային Կորեայի, Լեհաստանի, Մեքսիկայի հետ:

Ըստ ամենայնի, չինական Շանհայը մրցակիցների նկատմամբ առավելության է հասել վերջին 20 տարում քաղաքաշինության բնագավառում ունեցած տպավորիչ ձեռքբերումների համար:

Հայաստանը «Էքսպո» ցուցահանդեսին այս տարի մասնակցում է երրորդ անգամ: Մինչ այդ մեր երկիրը հաջողությամբ մասնակցել է Հաննովերում (Գերմանիա) կայացած «Էքսպո-2000» և Աիչիյում (Ճապոնիա) կայացած «Էքսպո-2005» ցուցահանդեսներին:

«Շանհայ-Էքսպո-2010» համաշխարհային ցուցահանդեսը տևելու է կես տարի` 2010թ. մայիսի 1-ից հոկտեմբերի 31-ը: Ցուցահանդեսի խորագիրն է ՙԲարեկեցիկ քաղաք, բարեկեցիկ կյանք՚:

Կազմակերպիչների ներկայացմամբ, թեմայի ընտրությունը համաշխարհային ցուցահանդեսների 154-ամյա ավանդույթների շարունակությունն է.

«Էքսպո»-ների թեմաները միշտ էլ արտացոլել են տվյալ պատմական ժամանակաշրջանի համայն մարդկության հետաքրքրությունը:
Ըստ այդմ` այսօր քաղաքային միջավայրերում կենսամակարդակի բարձրացումը առանցքային հարց է դարձել թե ազգային կառավարություններում և թե ամբողջ աշխարհում: Մասնավորապես ժողովրդագրական կանխատեսումների համաձայն, արդեն այս տարի մոլորակի բնակչության մեծ մասը` շուրջ 55%-ը, ապրելու է քաղաքներում:

Այս հանգամանքը քաղաքներին լուրջ մարտահրավերներ է նետում. խցանումներ, օդի և շրջակա միջավայրի աղտոտում, սոցիալական կոնֆլիկտներ, մշակութային բախումներ: Հենց այդ խնդիրների լուծմանը, դրանց վերաբերյալ տարբեր երկրների տեսլականների ներկայացմանն է ուղղված «Շանհայ-Էքսպո-2010» համաշխարհային ցուցահանդեսը:

Ցուցահանդեսին մասնակցում է 192 պետություն և 50 միջազգային կազմակերպություն: Կազմակերպիչներն ակնկալում են, որ վեցամսյա ցուցադրությունների ընթացքում կհյուրընկալեն մոտ 100 մլն այցելուի:

Եթե այս կանխատեսումներն իրականանան, համաշխարհային ցուցահանդեսների պատմության մեջ ամենամեծաթիվ հավանական մասնակցությունը կգրանցվի:

Միջոցառումը պատշաճ մակարդակով կազմակերպելու, այցելուների հարմարավետությունն ապահովելու նպատակով Չինաստանը հսկայական ներդրումային ծրագիր է իրականացրել: Որոշ գնահատականներով ցուցահանդեսի տարածքի կառուցման, ենթակառուցվածքների ապահովման վրա չինական կողմը մոտ 22 մլրդ դոլարի ներդրում է կատարել: