«Զվարթնոց». «Արմավիան» մշտապես խախտում է պարտքի մարման իր իսկ ներկայացրած ժամանակացույցը

Տնտեսություն 18:57 16/03/2011

««Արմենիա» Միջազգային Օդանավակայաններ» ՓԲԸ կողմից օդանավերի սպասարկման ներկայիս գները սահմանվել են 2005թ.` հաշվի առնելով օդանավակայանի զարգացման Մաստեր պլանը և առ այսօր չեն փոփոխվել»,-քիչ առաջ ի պատասխան «Արմավիա« ընկերության հայտարարության հաղորդագրություն է տարածել «Արմենիա» Միջազգային Օդանավակայաններ» ՓԲԸ -ի հանրային կապերի բաժինը:

««Արմենիա» Միջազգային Օդանավակայաններ» ՓԲԸ անհանգստացած է «Արմավիա» ավիաընկերության կողմից երեք ամիս կուտակած պարտքի գումարի աճի կապակցությամբ: Անհանգստացնում է նաև այն հանգամանքը, որ ավիաընկերությունը մշտապես խախտում է պարտքի մարման իր իսկ ներկայացրած ժամանակացույցը:

Ինչ վերաբերում է ավիավառելիքի սակագներին, նշվում է, որ «Արմենիա» Միջազգային Օդանավակայաններ» ՓԲԸ-ն ավիավառելիքը ձեռք է բերում «Արմավիա» ավիաընկերության բաժնետիրոջը պատկանող Միկա Լիմիթեդ ընկերությունից և վաճառքի գին է սահմանում համաձայն ՀՀ Տնտեսական մրցակցության պաշտպանության հանձնաժողովի սահմանած բանաձևի: Ընդ որում ավիավառելիքի դիմաց վճարումը «Արմենիա» Միջազգային Օդանավակայաններ» ՓԲԸ-ն կատարում է ավիավառելիքը ստանալու պահին, նույն օրը, առանց ուշացումների:

«Արմենիա» Միջազգային Օդանավակայաններ» ՓԲԸ-ն ցավում է ուղևորներին ավիաընկերության կողմից պատճառված անհարմարությունների համար և հուսով է, որ ազգային ավիափոխադրողը շուտափույթ միջոցներ կձեռնարկի իրադրությունը շտկելու համար` ժամանակին կատարելով իր ստանձնած պարտավորությունները»,-ասված է հայտարարության մեջ:

Նախորդող նորություն`
«Արմավիան» բողոքում է «Զվարթնոցի» բարձր սակագներից

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: