Տիգրան Սարգսյան. «Պարոն Բագրատյանի առաջարկությունները համահունչ են կառավարության քաղաքականությանը»

Տնտեսություն 13:30 02/05/2013

ՀՀ կառավարությունը դեմ արտահայտվեց Ազգային ժողովի ՀԱԿ խմբակցության պատգամավոր Հրանտ Բագրատյանի ներկայացրած «Օֆշորային գոտիներում գրանցված ընկերությունների գործունեությունը Հայաստանի Հանրապետության հանքարդյունաբերության ոլորտում կարգավորելու մասին» ՀՀ օրենքի նախագծին:

Ինչպես կատավարության նիստում նշեց ՀՀ ֆինանսների նախարարի պաշտոնակատար Վաչե Գաբրիելյանը, իրականում կառավարությունը կողմ է հանքարդյունաբերության ոլորտն օֆշորային գոտիներում գրանցված ընկերությունների մուտքի սահմանափակմանը, այդուհանդերձ, կարծում են, որ այս օրենքի նախագիծը չունի այն իրավական կառուցվածքը և տեխնիկան, որպեսզի հնարավորություն տա այդ սահմանափակումները իրականացնել: «Դրա փոխարեն մենք ԱԺ կներկայացնենք այլ օրինագծեր, որոնք ավելի մանրամասն կլուծեն առկա բացերը: Դեմ ենք պարոն Բագրատյանի օրենսդրական նախաձեռնությանը՝ միաժամանակ ամբողջովին համաձայնելով դրա ոգուն»,- նշեց Վ. Գաբրիելյանը:

ՀՀ վարչապետ Տիգրան Սարգսյանի խոսքերով՝ Կառավարությունն այն տեսակետին է, որ խստագույն վերահսկողության ներքո գտնվեն օֆշորային ձեռնարկությունները, որոնք ներդրումներ են կատարում Հայաստանում, որոնք զբաղվում են Հայաստանից ապրանքների արտահանմամբ և իրացմամբ, քանի որ լրջագույն ռիսկեր են տեսնում: «Այդ ընկերությունների նպատակն է խուսափել Հայաստանի առջև ունեցած իրենց ֆինանսական պարտականություններից և պարտավորություններից: Այդ տեսակետից, պարոն Բագրատյանի առաջարկությունները համահունչ են այն քաղաքականությանը, որ մենք պետք է իրականացնենք: Եւ Վաչե Գաբրիելյանի տեսակետները հիմք են ստեղծում, որպեսզի մենք կարողանանք պարոն Բագրատյանի հետ առավել արդյունավետ օրենքներ մշակել, որպեսզի այդ վերահսկողությունը կարողանանք պատշաճ ձևով իրականացնել: Սա է մեր քաղաքական դիրքորոշումը այս նախաձեռնության վերաբերյալ»,- նշեց Տ. Սարգսյանը:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: