Ձեր վստահելի աղբյուրը

«Վերջին օրերին ավելորդ շահարկումներ են տեղի ունենում, թե դրոշմապիտակների ներդրման հետևանքով այդ ապրանքների գները բարձրանում են կամ կարող են բարձրանալ: Այդ լուրերն իրականությանը չեն համապատասխանում»,-Panorama.am-ին ասաց ՊԵԿ նախագահի առաջին տեղակալ Արմեն Ալավերդյանը` անդրադառնալով այն լուրերին, թե հուլիսի 1-ից գործածության մեջ մտած դրոշմակնիքների հետևանքով թանկացել են այն ապրանքները, որոնց վրա փակցվում է պիտակը:

Հիշեցնենք, որ հուլիսի 1-ից ջուր, ըմպելիք, գարեջուր, մինչև 9% սպիրտայնությամբ խմիչք, հյութ ներմուծող կազմակերպություններն ու անհատ ձեռնարկատերերն ու ՀՀ-ում այդ ապրանքներն արտադրողները պարտավոր են դրանց իրացումը կազմակերպել բացառապես դրոշմապիտակներով:

Արմեն Ալավերդյանի ներկայացմամբ, մեկ պիտակի արժեքը 3.5 դրամ է, ընդ որում այդ 3.5 դրամ պիտակի համար վճարելով տնտեսվարող սուբյեկտը վճարման ենթակա իր հարկը պակասեցնում է 3.5 դրամի չափով:

«Այսինքն պիտակավորումը գնի վրա որևէ ազդեցություն չի ունենում: Կազմակերպությունները պիտակների վրա կատարած ծախսը 100 տոկոսով պակասեցնում են իրենց վճարման ենթակա հարկից»,-ասաց ՊԵԿ փոխնախագահը:

Ալավերդյանի խոսքով, պիտակների 12 օրվա կիրառումը ցույց է տվել, որ տնտեսվարողների մոտ շրջանառության աճ է արձանագրվել:

«Պիտակավորումը հենց այն նպատակով է ներդրվել, որ ստվերային շրջանառությունը բերվի հարկման դաշտ: Արդեն իսկ առանձին սուբյեկտների մոտ երևում են նախանշաններ, որ ծավալների աճ է արձանագրվում: 3-րդ եռամսյակի ավարտից հետո հանրությանը մենք կտեղեկացնենք, թե ինչ աճի մասին է խոսքը»,-ասաց Ալավերդյանը` ձեռնպահ մնալով, այս պահին կոնկրետ անուններ հրապարակել:

«Նախնական գնահատականներ կան, նախնական վերլուծություններ կան: Ընդամենը 12 օր է` ինչ ներդրվել է պիտակավորումը: Հիմա մենք իրականացնում ենք հսկողական գործողություններ, հույս ունենք հանրությանը ևս ներգրավել այդ գործում, որովհետև չպիտակավորված ապրանքերը ոչ այլ ինչ են, եթե ոչ ստվերային, եթե իհարկե դրանք առաքվել են հուլիսի 1-ից հետո»,-ասաց նա ու բացատրեց, որ խոսքը չի վերաբերում այն ապրանքներին, որոնք տնտեսվարողների մոտ կային մինչև հուլիսի 1-ը չպիտակավորված, և նրանց պիտանելության ժամկետը թույլ է տալիս, որպեսզի դրանք իրացվեն երկրորդ կիսամյակի ընթացքում:
Այդ ապրանքները, ըստ նրա, կարելի է իրացնել մինչև տարեվերջ, սակայն չպիտակավորված ապրանքների /հիմնականում ներմուծված/ քանակները կնվազեն ու կգա ժամանակը, որ առանց պիտակավորման վերոհիշյալ ապրանքներից չի լինի, հակառակ դեպքում, սպառնում է օրենսդրությամբ նախատեսված պատասխանատվություն:

Ալավերդյանի խոսքով, հետևաբար տնտեսվարողների գնային քաղաքականությունը կապված է այլ վարքագծի հետ:
«Հավանաբար ստվերային շրջանառությունը հայտարարագրելով նրանց մոտ հարկային պարտավորություններ են առաջանալու, և հավանաբար այդ հաշվարկն առանձին սուբյեկտներ իրենց մոտ անում են»,-ասաց Ալավերդյանը, ավելացնելով, որ գազի ու էլեկտրաէներգիայի թանկացումը շահարկող ընկերությունները պետք է իրատեսական գնահատեն ու համաչափ բարձրացնեն իրենց արտադրանքի գները:

«Նշված արտադրություններում գազի ու էլետրաէներգիայի ծախսը տեխնոլոգիական առումով մեծ տեսակարար կշիռ չի կազմում»,-նկատեց ՊԵԿ պաշտոնյան:

Արմեն Ալավերդյանը չբացառեց, որ ստվերի կրճատման գործում հաջողություն գրանցելու դեպքում օրենսդրական առաջարկություն ներկայացնեն պիտակավորման ենթակա արտադրանքի տեսականին ընդլայնելու վերաբերյալ: