Ձեր վստահելի աղբյուրը

Կարտոֆիլի հիվանդության ու Հայաստանից Վրաստան կարտոֆիլի արտահանումն արգելելու մասին լուրերը Panorama.am-ի հետ զրույցում Ագրարագյուղացիական միավորման նախագահ Հրաչ Բերբերյանը պրովոկացիա ու արհեստական որակեց:

Երեկ ողջ օրվա ընթացքում Գեղարքունիքի ու Շիրակի տարբեր տարածաշրջանների բնակիչներ զանգել են Բերբերյանին` պարզելու, ճիշտ են այն տեղեկությունները, որ Վրաստանը հրաժարվում է Հայաստանից կարտոֆիլ ներկրել: Միավորման նախագահն ասել է, սուտ է: Նա կարծում է, որ ստեղծված իրավիճակում պետք է հայտարարությամբ հանդես գա գյուղատնտեսության նախարարությունը` տեղեկացնելով, որ սահմանի վրա որևէ պրոբլեմ չկա:

«Հանրապետությունից արտահանվել է մոտ 10 հազար տոննա կարտոֆիլ, արտահանման գործընթացը շարունակվում է, խոսքը վերաբերում է 475 տոննա կարտոֆիլին, որը կազմում է ընդամենը արտահանման ծավալի 4-5 տոկոսը: Ինձ շատ հետաքրքիր է, թե ում են ձեռնտու այս հերյուրանքները, թե սահմանը փակ է»,-ասաց Բերբերյանը:

Նրա խոսքով, ստեղծված իրավիճակը ձեռնտու է մի խումբ մարդկանց, ովքեր գյուղացիների հաշվին թալան են իրականացնում. «կոպեկներով ձեռք են բերում գյուղմթերքը, արտահանեն, որ գերշահույթներ ստանան»:

Ձեռագիրը Բերբերյանին հիշեցրել է այս տարվա գարնանը ծիրանի շուրջ ստեղծված պատմությունը, երբ ծիրանը մնացել էր դաշտերում, ինչի հետևանքով այն սկսեցին գյուղացուց գնել շատ ցածր գնով, նույնը, նրա կարծիքով, կպատահի կարտոֆիլի դեպքում, երբ վարկերի տակ կքած գյուղացիները կշտապեն օր առաջ թեկուզ էժան գնով վաճառել պահեստներում մնացած կարտոֆիլը:

«Մինչև այս 90 դրամով էին տանում կարտոֆիլը, վերջին մի քանի օրվա ընթացքում` 120 դրամով: Վերջապես գյուղացին կարողանում էր մի կոպեկ աշխատել: Էլի փորձում են թալանել գյուղացուն, սա թուրքի արած է: Մի զարմացեք, Վրաստանի այդ շուկան Թուրքիան է ապահովում, ես պատահական չեմ ասում, թուրքի արած է»,-բարկացած ընդգծեց միավորման նախագահը, ավելացնելով, որ չի բացառում, որ հանրապետության որոշ տարածքներում հնարավոր է վարակ լինի, բայց այսօր մենք ունենք շատ առողջ ու հիանալի բերք:

«Հնարավոր է բերքի 2-3 տոկոսն էլ հիվանդ ու անորակ լինի, և այսօր նման հերյուրանք տարածել, որ 1-2 թափթփուկ փող աշխատեն, չեմ թողնելու: Ես չեմ փորձում որևէ մեկին մեղադրել, բայց որ չեմ թողնի, որ հայ գյուղացուն թալանեն, դա միանշանակ է: Մի մոռացեք, որ անցած տարի կորտոֆիլագործ ֆերմերները լուրջ կորուստներ ունեցան, գոնե թողեք էս տարի մարդիկ 1-2 կոպեկ աշխատեն, որ հայրենիքում մնան, չլքեն, գնան»,-ասաց նա:

Բերբերյանն ասաց, որ շուտով կոչով դիմելու են գյուղացիներին, նախ տեղեկացնելով, որ կարտոֆիլի գները միջազգային շուկաներում բարձրացել են, ապա հանգստացնելով, որ եղած կարտոֆիլը հազիվ մեզ բավարարի:
«Ընդհանրապես ողջ աշխարհում հիմա կարտոֆիլի կրիզիս է, և այսօր փորձել  հայ ֆերմերներին ահաբեկել, խաբել` կարտոֆիլը էժան գնով ձեռք բերելու համար, դա առնվազն թուրքի արած է: Առանց այդ էլ տնտեսությունից միայն գյուղատնտեսությունն է մնացել, սա՞ էլ են ուզում փակել»,-ասաց նա:

Բերբերյանը շատ ճիշտ քայլ է որակում ԳՆ սննդամթերքի անվտանգության պետական ծառայության պետ Աբրամ Բախչագուլյանի` Վրաստան մեկնելու և առաջացած խնդիրները տեղում լուծելու որոշումը:

Հիշեցնենք, որ «Ագրեգատոր» ինտերնետային կայքէջն ու մի քանի լրատվամիջոցներ տեղեկատվություն էին հրապարակել, որ Վրաստանը Հայաստանին վերադարձնելու է ավելի քան 470 հազար կգ վարակված կարտոֆիլ: Վրաստանի եկամուտների նախարարության լրատվական ծառայությունը հայտնել էր, Սադախլո անցակետում հայտնաբերվել է, որ կարտոֆիլը վարակված է եղել փտախտով ու քաղցկեղով:

Ըստ լրատվամիջոցի, կարտոֆիլի նմուշներն ուղարկվել են հատուկ լաբորատորիա, հետազոտության արդյունքում պարզվել է, որ 114 500 կգ կարտոֆիլ վարակված է եղել, իսկ մնացածն ուսումանասիրության փուլում է:

Նախորդող հրապարակումներ`

Վրաստանը Հայաստանից ներկրվող կարտոֆիլը վարակված է համարում. Բախչագուլյանը խնդիրը տեղում հասկանալու համար կմեկնի Վրաստան

Պիպոյանը` վարակված կարտոֆիլի մասին. «Եթե Վրաստանը անօրինական է գործում, պետք է բողոքել համապատասխան ատյաններ»