«Արարատ ցեմենտ»-ի հետ կապված խնդիրը իմաստ չունի քաղաքականացնել. Արամ Հարությունյան

Տնտեսություն 10:50 27/02/2014

ՀՀ կառավարության նիստի սկզբում վարչապետ Տիգրան Սարգսյանը բնապահպանության նախարար Արամ Հարությունյանին խնդրեց պարզաբանումներ ներկայացնել, թե իրականում ինչ տեսչական գործողություններ են իրականացնում «Արարատ Ցեմենտ» գործարանում, ինչպես նաև` Արարատյան դաշտավայրում ստեղծված իրավիճակը:

Բնապահպանության նախարարը վերջին օրերի մեկնաբանությունները անհիմն ու անհեթեթ համարեց` նշելով, որ, ըստ էության, Արարատյան դաշտավայրում իրենք ջրօգտագործման խնդիրների հետ կապված միջոցառումներ են իրականացնում, որոնց մասին տեղեկացրել են համայքներին, մարզպետարանին:

«Ըստ էության, խնդիրը, որ բարձրացվել է կապված «Արարատ ցեմենտ» ընկերության հետ` իրականությանը չի համապատասխանում»,- ասաց նախարարը:

Ա. Հարությունյանի խոսքերով` գործարանն արտադրական նպատակով գործունեություն չի ծավալում և քանի որ ոռոգման սեզոնը դեռևս չի սկսվել, այդ իսկ պատճառով թեստային անջատումներ են կատարվել:

«Մենք թեստային անջատում ենք կատարել, կրկնում եմ ցամաքուտային համակարգից, որը նախատեսված է ջրային հորիզոնների համար: Արդյունքում` հայտնաբերել ենք մի շարք անօրինական ջրօգտագործողներ, այդ թվում` ձկնաբուծական տնտեսություններ»,- ընդգծեց նախարարը:

Ըստ նրա` «Արարատ ցեմենտ» գործարանն արտադրական նպատակով վայրկյանում օգտագործում է ընդամենը 16 լիտր ջուր, սակայն այս պահին այդ համակարգում վայրկյանում շուրջ 2000 խմ լիտր ջուր է հոսում:

«Այստեղից պետք է մեկ եզրակացություն անել, որ գործողությունները ուղղակի տալիս են իրենց արդյունքները, իմաստ չունի անհարկի քաղաքականացնել գործառույթները»,- ասաց Ա.Հարությունյանը:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: