Ձեր վստահելի աղբյուրը

Չաշխատող կանանց նպաստներ տրամադրելը լուրջ խթան կհանդիսանա ծնելիության համար: Այս մասին ԱԺ-ում հայտարարեց ԱԺ Սոցիալական հարցերի մշտական հանձնաժողովի նախագահ Հակոբ Հակոբյանը՝ «Ժամանակավոր անաշխատունակության նպաստների մասին» ՀՀ օրենքում փոփոխություններ կատարելու մասին օրինագծի քննարկման ժամանակ:

Նրա խոսքով` ի սկզբանե թյուր կարծիք էր ձևավորվել, թե քաղաքական մեծամասնությունը կառավարության հետ համատեղ փորձում են հղի կանանց գումարները կրճատել, բայց նման բան չկա: Հակառակը` այս օրինագծի նպատակն է աջակցել չաշխատող կանանց, ինչն անչափ կարևոր է:

«Չգիտես` ինչու այնպիսի հարցադրումներ եղան ու այնպիսի տպավորություն է, թե մենք ուտում- խմում ենք, մայրերի փողն էլ կտրում ենք: Բայց խնդրում եմ, թող մեկը ասի, թե այդ ո՞ր մոր փողն ենք կտրում կամ ո՞ւմ փողն է կտրվում»,- վրդովված հայտարարեց նա` մատնանշելով, որ չորսը տարի է պայքարում են, որպեսզի սոցիալական համակարգը համարվի ոչ թե առանձին դեպքի համար փող բաժանող, ոչ թե երեխա ունենալու, այլ աղքատ ընտանիքում երեխա ունենալու նախապայման ստեղծող համակարգ:

Ինչ վերաբերում է գործընկեր որոշ պատգամավորների մտահոգությանը, թե կառավարության կողմից առաջ քաշվող դրույթը, որ 1 մլն դրամ և ավելի աշխատավարձ ստացող կանանց նպաստները գործատուների կողմից պետք է փոխհատուցվեն խտրական մոտեցում կձևավորեն կանանց նկատմամբ Հ.Հակոբյանը որակեց չհիմնավորված: Նա անգամ վիճակագրություն ներկայացրեց, համաձայն որի` 2014թ-ի 9-ը ամիսների տվյալներով կա ընդամենը 24 ծննդաբերող կին, որ ստանում է մեկ միլիոն դրամից բարձր աշխատավարձ:

Պատգամավորի խոսքով` յուրաքանչյուր ձեռնարկություն ունի սոցիալական ֆոնդեր և եթե հարկ լինի` կանայք կարող են այդտեղից վճարվել:

«Լուծումը թողնում ենք կամավոր, բայց մեկ տարի հետո գուցե և վերանայենք, ու դարձնենք այդ սկզբունքը պարտադիր»,- ընդգծեց ՀՀԿ-ական Հ.Հակոբյանը:

Նշենք, որ ավելի վաղ նման մտահոգությամբ հանդես էր եկել պատգամավոր Էդմոն Մարուքյանը` նկատելով, որ այդ դրույթը կարող է հանգեցնել նրան, որ գործատուները գերադասեն տղամարդկանց վերցնել աշխատանքի, քան պրոֆեսիոնալ կանանց, ում հետագայում նաև ծննդաբերության նպաստ պետք է ապահովեն: Առավել ևս, որ այսօր էլ , գործող օրենքի պայմաններում հղի կանայք շատ անգամ խտրական վերաբերմունքի են արժանանում գործատուների կողմից: Սակայն Աշխատանքի և սոցիալական հարցերի նախարար Արտեմ Ասատրյանը նշեց, թե նման մտավախություն չունի, քանի որ եթե գործատուն պատրաստ է 1մլն-ից ավելի աշխատավարձ վճարել , պատրաստ կլինի նաև իր աշխատողին փոխհատուցել:

Նախորդիվ``
Հղի կանանց նպաստների քննարկում