«Եվրոֆիշ»-ը նախատեսում է ձկնաբուծության ոլորտում ընդլայնել Հայաստանի հետ համագործակցությունը

Տնտեսություն 18:34 15/06/2015

Գյուղատնեսության նախարար Սերգո Կարապետյանն այսօր ընդունել է «Եվրոֆիշ» միջազգային կազմակերպության տնօրեն Աինա Աֆանասևային:

ՀՀ գյուղատնտեսության նախարարության տեղեկատվության և հասարակայնության հետ կապերի բաժնի փոխանցմամբ, հանդիպման նպատակը ՄԱԿ-ի պարենի և գյուղատնտեսության կազմակերպության և «Եվրոֆիշ» միջազգային կազմակերպության հետ hամատեղ վաղը Երևանում կայանալիք ‹‹ԱՀԿ, մուտք դեպի շուկա և ձկնաբուծության բնագավառում առևտրին առնչվող խնդիրներ›› խորագրով եռօրյա սեմինարի վերջին նախապատրաստական աշխատանքների քննարկումն էր:

Սեմինարին ակնկալվում է 20 եվրոպական երկրների շուրջ 40 ներկայացուցիչների մասնակցություն:
Ողջունելով հյուրին` նախարարը ընդգծել է Հայաստանում նմանատիպ լայնամասշտաբ միջոցառման անցկացման կարևորությունը` հույս հայտնելով, որ այն կնպաստի ձկնաբուծության ոլորտում վերջին զարգացումների մասին հայ հանրության իրազեկմանը, ինչպես նաև խթան կհանդիսանա օտարերկրյա մասնագետների հետ նոր գործարար կապերի հաստատման համար:

Շնորհակալություն հայտնելով նախարարին ջերմ ընդունելության համար և ներկայացնելով սեմինարի անցկացման ընթացակարգի մանրամասները` տիկին Աֆանասևան տեղեկացրել է, որ «Եվրոֆիշ» կազմակերպությունը, որին ներկայումս անդամակցում է 12 երկիր, հետագայում նախատեսում է ստեղծել տարածքային ցանց առավել ինտեգրված աշխատանքի համար, ինչպես նաև ընդլայնել ձկնաբուծության ոլորտում համագործակցությունը Հայաստանի հետ` ելնելով երկրի առաջնահերթություններից:

Նախարար Սերգո Կարապետյանը հաջողություն է մաղթել սեմինարի կազմակերպիչներին և համոզմունք հայտնել, որ միջոցառումը կլինի արդյունավետ և օգտակար:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: