Ձեր վստահելի աղբյուրը

Ինչպես արդեն տեղեկացրել ենք, ԱԺ արտահերթ նստաշրջանում քննարկվում է «Ակցիզային հարկի մասին» ՀՀ օրենքում փոփոխություններ ու լրացումներ կատարելու մասին նախագիծը, որի հիմնական զեկուցողն է ՀՀ ֆինանսների փոխնախարար Վախթանգ Միրումյանը։

Փոխնախարարի խոսքերով՝ նախագծով նախատեսվում է վերանայել և բարձրացնել ակցիզային հարկով հարկման ենթակա մի շարք ապրանքատեսակների ակցիզային հարկի դրույքաչափը: Խոսքը առաջին հերթին ծխախոտի և օղու արտադրության համար սահմանված ակցիազային հարկի դրույքաչափի մասին է:

ԱԺ պատգամավոր Էդմոն Մարուքյանը նշեց, որ ուշադիր հետևում է քննարկմանը, բացի այդ, կարդացել է նախագիծը, սակայն չի կարողանում հասկանալ, թե նման թանկացումն ինչ իմաստ ունի:

«Էս նեղ մաջալին ի՞նչ իմաստ ունի նման թանկացումների բերել վառելիքը, դիզվառելիքը, բացի այդ տեղական արտադրությանը դա մեծ հարված է հասցնելու: Առանց այն էլ մենք գիտենք, որ ԵՏՄ-ին անդամակցելուց հետո բավականին էժան գներով Հայաստան է ներմուծվում ռուսական օղի, որի արդյունքում տեղական արտադրողը լուրջ խնդիրներ ունի: Հիմա տեղական արտադրողի ակցիզները թանկացնում ենք, արդյոք վերլուծություններ կան, թե այս ամենն ի՞նչ ազդեցություն կունենա տեղական արտադրողի վրա: Հնարավոր է, որ տեղական արտադրողները փակեն իրենց արտադրամասերը, էլ չաշխատեն, հանրային տրանսպորտը կարող է թանկանալ: Ինձ հետաքրքիր է՝ ազդեցությունը գնահատվա՞ծ է, թե՞ ոչ»,- հարցրեց Է.Մարուքյանը:

Վ.Միրումյանը նախ հիշեցրեց, որ օրենքն ուժի մեջ է մտնելու 2016թ-ի հունվար 1-ից: Ըստ նրա՝ այն ոլորտները, որոնք մեր տնտեսությունում համարվում են գերակա, այդտեղ նախագիծը որևէ առնչություն չի ունենալու: Խոսքը, ըստ նրա, միայն վերաբերում է օղու և ծխախոտի արտադրությանը:

Ինչ վերաբերում է նրան, թե օրենքի ուժի մեջ մտնելուց հետո տեղական արտադրողները զգալի վնասներ կկրեն, Վ.Միրումյանն ասաց, որ ազդեցությունների գնահատման տեսնակյունից խոր վերլուծություն են կատարել և եկել են այն եզրակացության, որ որևէ մտահոգություն չկա, թե կարող են վնասել տեղական օղի արտադրողներին:

«Օղու արտադրանքի համար մենք ունենք ակցիզային հարկի արժեքային և նվազագույն դրույքաչափ: Որպեսզի մենք պաշտպանենք տեղական արտադրողին, մեր առաջարկը վերաբերում է ոչ միայն նվազագույն, այլ նաև արժեքային չափը բարձրացնելուն: Դա պայմանավորված է այն հանգամանքով, որ ներմուծվող օղին ավելի թանկ է, քան տեղական արտադրության օղին, ուստի ակցիզային հարկը բարձրացնելով մենք տեղական արտադրողին դնում ենք ավելի շահեկան վիճակում»,- նշեց Վ.Միրումյանը:

Է.Մարուքյանն էլ ասաց, որ 2016թ-ի հունվարից օրենքի ուժի մեջ մտնելը դեռ սփոփանք չէ: «Ես խոսել եմ տեղական արտադրողների հետ, մարդիկ ուղղակի սարսափած են: Ես չգիտեմ, թե դուք ինչն եք վերլուծել, որ չի ազդելու: Նրանք առանց այդ էլ ասում են, որ 50 տոկոսով շրջանառությունը ընկել է: Տեղական արտադրողները բազմաթիվ խնդիրներ ունեն, հիմա էլ էս նեղ մաջալին բերում ենք թանկացնում ակցիզային հարկը: Սա լուրջ խնդիր է, եթե դուք ասում եք, որ ազդեցություն չի ունենա, բա ինչո՞ւ են մարդիկ վախեցած, ինչն է պատճառը, որ անհանգստանում են, մտածում են աշխատատեղեր կկրճատվեն»,- ասաց Է.Մարուքյանը:

Ֆինանսների փոխնախարարն անդրադառնալով ազդեցությանը, նշեց, որ վատագույն սցենարի դեպքում օղու արտադրության ծավալները հնարավոր է կրճատվեն 2.1 տոկոսով: «Սա վատագույն սցենարի դեպքում է և վերաբերում է ամբողջ շուկային: Սակայն յուրաքանչյուր դեպքում, եթե խոսում ենք դրույքաչափի բարձրացման մասին՝ արտադրող-ներմուծող հարաբերակցության մեջ, ապա դա ի օգուտ արտադրողի է: Այս նախաձեռնության արդյունքում պահանջարկի նվազումը տեղի է ունենում ի հաշիվ ներմուծման, քան արտադրության»,- նշեց փոխնախարարը:
 

Նախորդող հրապարակում՝
Հայաստանում բենզինը, օղին և ծխախոտը կթանկանան