Ձեր վստահելի աղբյուրը

Հայաստանի ազգային վիճակագրական ծառայության հրապարակած 2015-ի հունվար-հունիս ամիսների սոցիալ-տնտեսական ցուցանիշների համաձայն, Հայաստանի տնտեսական ակտիվության ցուցանիշը (ՏԱՑ) նախորդ տարվա հունվար-հունիսի համեմատ աճել է 3,8 տոկոսով։ Այս տարվա միայն հունիսին նախորդ տարվա` 2014-ի հունիսի համեմատ աճը կազմել է 7,9 տոկոս, իսկ նախորդ ամսվա` մայիսի նկատմամբ աճը երկնիշ է` 15,8 տոկոս:

Հիշեցնենք, որ ՀՀ պետական բյուջեում դրված է տարվա կտրվածքով 4,1 տոկոս տնտեսական աճի ցուցանիշը, ՀՀ ԿԲ-ն կանխատեսում է մինչև 2 տոկոս տնտեսական աճ, ՀՀ կառավարության միջնաժամկետ ծախսային ծրագրում կանխատեսվում է 1 տոկոս տնտեսական աճ, Համաշխարհային բանկի կողմից` 0,8 տոկոս, իսկ Արժույթի միջազգային հիմնադրամը` անգամ մինչև 1 տոկոս անկում է կանխատեսում:

ԱՎԾ-ի հրապարակած տվյալների համաձայն՝ տնտեսական ակտիվության ցուցանիշի աճին նպաստել են բոլոր ճյուղերը, բացառությամբ առևտրի շրջանառության, որը նախորդ տարվա հունիսի համեմատ կրճատվել է 6,6%-ով, հունվար-հունիսին՝ 8,2 տոկոսով: Սակայն ամսական կտրվածքով՝ հունիսը մայիսի նկատմամբ, առևտրաշրջանառության ծավալներն աճել են 16,4 տոկոսով:

Աճի տեմպի ավելացումը մեծապես պայմանավորված է գյուղատնտեսական համախառն արտադրանքի ավելացմամբ, ինչպես նաև արդյունաբերության արտադրանքի ծավալների աճով: Որոշակի աճ է արձանագրվել ծառայությունների ոլորտում, շինարարությունում աճը չնչին է: Մասնավորապես, գյուղատնտեսության արտադրանքի ծավալները տարվա առաջին կեսին աճել են երկնիշ թվով` 14,5 տոկոսով, արդյունաբերությանը` 5,1 տոկոսով, ծառայություններինը` 3,3 տոկոսով, շինարարությանը` 0,6 տոկոսով:

Ըստ տնտեսության ճյուղերի, հունիսին մայիսի նկատմամբ գյուղատնտեսությունն աճել է 79,2 տոկոսով (էական դեր ունի սեզոնային գործոնը), արդյունաբերությունը` 10,2 տոկոսով, շինարարությունը 21 տոկոսով, ծառայությունները` 9,2 տոկոսով:

Ինչ վերաբերվում է 2015-ի հունիսի ցուցանիշների համեմատությունը 2014-ի հունիսի հետ, ապա արդյունաբերության աճը կազմել է 8,1 տոկոս, գյուղատնտեսությանը` 38 տոկոս, ծառայությունները` 1,5 տոկոս, շինարարությունը` 1 տոկոս: Ամենամեծ ծավալները պահպանում են առևտուրն ու արդյունաբերությունը:

2015 թ.-ի հունվար-հունիսին արձանագրված 3,8 տոկոս տնտեսական ակտիվության աճի պարագայում, գումարային առումով ամենամեծ ծավալները, չնայած այս տարվա սկզբից արձանագրվող նվազմանը, շարունակում են պահպանվել առևտրի շրջանառությունում` 973 մլրդ 735 մլն դրամ: Երկրորդը արդյունաբերության արտադրանքի ծավալն է` 613 մլրդ 639 մլն դրամ, երրորդը`ծառայությունների ծավալը` 537 մլրդ 899 մլն դրամ: Գյուղատնտեսության համախառն արտադրանքի ծավալները կազմել են 235 մլրդ 551 մլն դրամ, շինարարությանը` 134 մլրդ 914 մլն դրամ:

Ինչ վերաբերում է առևտրաշրջանառությանը, ապա արտաքին առևտրաշրջանառությունը 2015-ի հունվար-հունիսին 2014-ի հունվար-հունիսի նկատմամբ նվազել է 29,8 տոկոսով և կազմել 1 մլրդ 932 մլն դոլար։ Արտահանումը կազմել է 624,8 մլն դոլար, նվազելով 11,2 տոկոսով, ներմուծումը կազմել է գրեթե 1 մլրդ 308 մլն դոլար, նվազելով 36,2 տոկոսով։

Արտաքին առևտրի այս տվյալները հրապարակելով, Ազգային վիճակագրական ծառայությունը կրկին տեղեկացրել է, որ ցուցանիշները ամբողջական չեն «պայմանավորված ԵՏՄ երկրների միջև փոխադարձ առևտրի ցուցանիշների ոչ ամբողջական հավաքագրմամբ»: Ըստ վիճծառայության, տեղեկատվության ոչ ամբողջականությունը պայմանավորված է ՀՀ կառավարության 2014թ. ապրիլի 23-ի թիվ 447-Ն որոշման 2-րդ հավելվածով հաստատված «Ապրանքների փոխադրման հաշվառման վիճակագրական ձև»-ի՝ դեռևս ոչ բոլոր ռեսպոնդենտների կողմից մաքսային մարմիններին ներկայացման հետ, քանզի դրանց ներկայացման էլեկտրոնային համակարգը, տարեսկզբից ի վեր, դեռևս գործարկված չէ:

Ըստ ԱՎԾ-ի՝ միայն հունիսին մայիսի համեմատ արտահանումն աճել է 21,3 տոկոսով, ներմուծումը` 26,2 տոկոսով: 2014-ի հունիսի համեմատ արտահանումն աճել է 7 տոկոսով, իսկ ներմուծումը` նվազել 36,6 տոկոսով: