Ձեր վստահելի աղբյուրը

«Հայոց լեզու և գրականություն» առարկայի միասնական քննության արդյունքների բողոքարկման գործընթացը կշարունակվի այսօր մինչև ժամը 18:00-ն: Panorama.am-ի հետ զրույցում ԳԹԿ Արտաքին համագործակցության բաժնի պետ Արայիկ Իսպիրյանն ասաց, որ մինչ այս պահը այս առարկայի թեստերի բովանդակության հետ կապված որևէ դիմում-բողոք չեն ստացել:

«Բողոքները տեխնիկական բնույթի են: ԵՊՀ-ում տեղակայված քննական կենտրոնից տեղեկացա, որ արդեն ութ դիմում-բողոք կա»,- ասաց նա՝ հավելելով, որ վիճակագրությանը ցույց է տալիս, որ նախորդ տարվա համեմատ դիմում-բողոքների թիվը նվազել է:

Օրինակի համար ԳԹԿ ներկայացուցիչը նշեց, որ «Կենսաբանություն» առարկայից ստացել են տեխնիկական բնույթի 43 դիմում-բողոք. «Եթե դիմորդի մտավախությունը ճիշտ է, որ թիվը գրել է ճիշտ, բայց համակարգչի կողմից չի ճանաչվել, խնդիրը կլուծվի ի օգուտ դիմորդի: Բոլոր բողոք-դիմումները հավաքելուց հետո նորից կհրապարակենք միավորները»:

Նշենք, որ «Հայոց լեզու և գրականություն» առարկայի քննության արդյունքները հրապարակվել են նախօրեին: Ա. Իսպիրյանը տեղեկացրեց, որ քննությանը մասնակցել է 7328 դիմորդ, որից 9,5 տոկոսը ստացել է անբարար, 114 հոգի՝ առավելագույն՝ 20 միավոր:

Միջին միավորը կազմել է 13,24: Նախորդ տարվա համեմատ, միջին միավորը բարձրացել է 0,24-ով, 20 միավոր ստացողներն ավելացել են 13-ով:

Հիշեցնենք նաև, որ հունիսի 10-ին դիմորդները հանձնել են քննություն «Ֆիզիկա» առարկայից: «Ֆիզիկա» առարկայի միասնական քննության արդյունքները կուղարկվեն քննական կենտրոններ հունիսի 15-ին: Քննության արդյունքները կարելի է բողոքարկել հունիսի 16-ին, ժամը 9:00-18:00-ն:

Դիմորդները հունիսի 13-ին հանձնելու են միասնական քննություն «Օտար լեզու» առարկայից:

Նախորդող հրապարակումներ՝

ԳԹԿ. Բողոքարկումները մոտ հինգ անգամ նվազել են

ԳԹԿ. Նվազել է «Կենսաբանություն» առարկայի միջին գնահատականը