Ձեր վստահելի աղբյուրը

Սեպտեմբերի 1-ից հանրապետությունում դպրոց կհաճախեն 40 հազար առաջին դասարանցիներ: Այս մասին այսօր ՀՀ կառավարության այսօրվա նիստում ներկայացնելով նոր ուսումնական տարվա նախապատրաստական աշխատանքները՝ հայտարարեց ՀՀ կրթության և գիտության նախարար Արմեն Աշոտյանը:

Նա միաժամանակ նշեց, որ առաջին դասարանցիների թիվը կամփոփվի մինչ սեպտեմբերի վերջ: Նախարարի խոսքերով` այժմ ընթանում է դասագրքերի բաշխման գործընթացը: Այս տարի լույս են տեսել 29 անուն նոր դասագրքեր:

Նշվեց նաև, որ ըստ սահմանված ժամանակացույցի՝ ավարտվել են նաև մի շարք դպրոցների վերանորոգման աշխատանքները, որոնք պատրաստ են ուսումնական տարվա մեկնարկին: Նոր տուսումնական տարվա ընթացքում կփոխվի նաև բոլոր ավագ դպրոցների ուսումնական գույքը՝ Համաշխարհային բանկի տրամադրած վարկի շրջանակներում:

Ա.Աշոտյանը հայտնեց, որ այս տարի իրենց հաջողվել է խուսափել ուսուցիչների կազմի կրճատումից, իսկ հուլիսի 1-ից վերջինների աշխատավարձերը բարձրացել են 9 տոկսով:

Նախարարի փոխանցմամբ` Վայոց Ձորի և Սյունիքի մարզերում մեկնարկելու է նաև «Կայուն սնունդ» ծրագիրը:

«Այս ծրագիրը ոչ միայն կրթական բնույթ ունի, այլև սոցիալական, առողջապահական հետևանքներ»,- ասաց Ա.Աշոտյանը:

Նշվեց նաև, որ փորձնական կարգով 10 դպրոցներում ներմուծվել է նաև ազգային երգ ու պար առարկան, որը մշակվել է համապատասխան ոլորտի մասնագետների կողմից: Ուսումնական տարվա ընթացքում ավագ և հիմնական դպրոցները կստանան ութ վիրտուալ լաբորատորիաներ, որոնց միջոցով երեխաները կկարողանան կիրառել իրենց գիտելիքները:

Ըստ Աշոտյանի՝ հանրապետության քոլեջներում և ուսումնարաններում պետությունն այս տարի տեղադրել է 50 տոկոսով ավելի պետպատվեր, ինչը բավականին աժիոտաժ է առաջացրել: Նախարարի խոսքերով `երիտասարդների մոտ նախնական և միջին մասնագիտական կրթություն ստանալը պահանջված է և աննախադեպ ընդունելություն տեղի կունենա:

Նախարարը նշեց նաև, որ հանդիպել է բուհերի ռեկտորների հետ՝ քննարկել կոռուպցիոն ռիսկերի նվազեցմանը, միջազգային ծրագրերում ներգրավելուն և կազմակերպչական այլ հարցեր: