Ձեր վստահելի աղբյուրը

Այսօր ամբողջությամբ չենք կարող հրաժարվել հատուկ դպրոցներից, որովհետև կան որոշակի առողջական խնդիրներ, որոնք թույլ չեն տալիս բոլոր երեխաներին դառնալ ներառական կրթության շահառու: Այս մասին հայտարարել է ԿԳ նախարար Արմեն Աշոտյանը՝ ներառական կրթություն իրականացնող Ջ. Կիրակոսյանի անվան Երևանի թիվ 12 հատուկ և Երևանի թիվ 20 դպրոցներ այսօր կատարած այցելության ժամանակ:

«Ակնհայտ է, որ ներառական համակարգի ներդրման պարագայում, ըստ նախնական հաշվարկների, այդպիսի երեխաների շուրջ 90 տոկոսի համար կարող ենք ստեղծել հավասար հանրային մատչելի պայմաններ նաև կրթության համար: Եվ այստեղ խնդիրը միայն կրթության որակի մեջ չէ. դպրոցից է սկսվում բարի հասարակություն կառուցելու այն գաղափարախոսությունը, որը դրված է ներառականության հիմքում»,-ասել է Աշոտյանը:

Նախարարի խոսքով, այս երեխաները վերադարձվում են հասարակություն` որպես լիարժեք անդամ:

«Ներառական համակարգում ներառված մանկավարժական և ծնողական համատեղ աշխատանքի տեսանելի արդյունք տված երեխաները լավագույն պատասխանն են բոլոր այն մարդկանց քննադատական կարծիքներին, ովքեր թերահավատ են մոտենում այս բարեփոխմանը»,-ասել է Աշոտյանը, ավելացնելով, որ դեռ հսկայական աշխատանք կա կատարելու: