Ձեր վստահելի աղբյուրը

Ամառը շատերը նախընտրում են անցկացնել ծովում, արևայրուք ընդունել, սակայն արևի ճառագայթները մարդու մաշկի վրա ունեն նաև բացասական ազդեցություն: Հայտնի է, որ ուլտրամանուշակագույն ճառագայթները մաշկի քաղցկեղի առաջացման պատճառ են դառնում:

Շատերի կարծիքով՝ միայն մաշկի բաց գույն ունեցողները պետք է վախենան արևայրուքից։ Ճիշտ է, թեև մաշկի մուգ գույն ունեցողներն ավելի պաշտպանված են արևի վնասակար ճառագայթներից, այնուհանդերձ, նրանք էլ կարող են ունենալ մաշկի քաղցկեղ։

Ըստ վիճակագրության` աշխարհում քաղցկեղով տառապողների մեկ երրորդը հիվանդ է մաշկի քաղցկեղով։ Ամեն տարի գրանցվում է մելանոմայի (մաշկի քաղցկեղի ամենավտանգավոր տեսակ) գրեթե 130 000 դեպք։

Նշենք, որ արևի ամենաուժեղ ազդեցությունը արևայրուքն է, որի ժամանակ ուլտրամանուշակագույն ճառագայթները սպանում են մաշկի վերին շերտի բջիջների մեծ մասը և վնասում են մաշկի ավելի խորը շերտերը։ Մարդու մաշկի գույնի ցանկացած փոփոխություն արդեն իսկ նշանակում է, որ մաշկը վնասված է։

Մասնագետից փորձեցինք պարզել, թե ամառային հանգիստը ծովում անցկացնողներն ինչպես պաշտպանեն իրենց մաշկը, ինչպես արևայրուք ընդունեն, որպեսզի խուսափեն մաշկի հետ կապված խնդիրներից:

Panorama.am-ի հետ զրույցում ալերգոլոգ Աստղիկ Բաղդասարյանը նշեց, որ թեև մաշկային խնդիրներ ունեցողների համար ծովը դրական ազդեցություն է ունենում, սակայն պետք է պաշտպանել մաշկը, մասնավորապես, խուսափել այրվածքներից: Դրա համար, ըստ նրա, պարտադիր պետք է արևից պաշտպանող քսուքներ օգտագործել: Ընդ որում` նրբաքսուք պետք է օգտագործել ո´չ միայն մարմնի այն հատվածներում, որոնք բաց են, այլև պետք է քսել նաև լողազգեստի տակ գտնվող մաշկին, քանի որ այն ևս չորանում է:

Ա. Բաղդասարյանի խոսքերով` արևից պաշտպանող քսուկների օգտագործման և կանոնավոր արևային լոգանք ընդունելու դեպքում, կարելի է խուսափել ծովում ի հայտ եկող մաշկային խնդիրներից:

Մասնագետը նշեց, որ, հատկապես, սպիտակ մաշկ ունեցողները պետք է ավելի զգույշ լինեն, արևային լոգանքների հարցում էլ` չափավոր լինեն: «Բաց մաշկ ունեցողներին խորհուրդ չի տրվում շատ արևային լոգանքներ ընդունել»,- ասաց Ա. Բաղդասարյանը:

Մասնագետի խոսքերով` ծով գնալու առաջին օրը խորհուրդ չի տրվում 5 րոպեից ավելի մնալ ջրում, երկրորդ օրը՝ 10 րոպեից ավելի, իսկ ընդհանրապես խորհուրդ չի տրվում արևի ուղիղ ճառագայթների տակ 30-40 րոպեից ավելի գտնվել: Իսկ եթե օգտագործել եք արևից պաշտպանող քսուք, թույլատրվում է արևի տակ մնալ 1-2 ժամ:

Ալերգոլոգը խորհուրդ է տալիս արևային լոգանքներից հետո ևս  պաշտպանող քսուքներ օգտագործել, քանի որ մաշկը չորանում է և հարկավոր է այն խորանավեցնել: