Ձեր վստահելի աղբյուրը

Արամավիրի մարի Նորապատ գյուղից «Սուրբ Աստվածամայր» ԲԿ տեղափոխված փոքրիկի վիճակը շարունակում է մնալ ծայրահեղ ծանր:

«Երեխայի մոտ առաջընթաց չկա, կոմայից դեռ դուրս չի եկել».-Panorama.am-ին երեխայի վիճակի մասին տվյալներ հաղորդեց ԲԿ վերակենդանացման բաժանմունքի վարիչ Չոբանյանը:

Առողջապահության նախարարությունից երեկ հայտնեցին, որ համակարգչային տոմոգրաֆիական հետազոտության արդյունքում երեխայի մոտ ախտորոշվել է ուղեղի այտուց։ Երեխային զննել է նաև այս օրերին Հայաստանում գտնվող Սանկտ Պետերբուրգի Պոլենովի անվան նյարդավիրաբուժության գիտահետազոտական ինստիտուտի մանկական կլինիկայի ղեկավար, անվանի նյարդավիրաբույժ, պրոֆեսոր Վիլյամ Խաչատրյանը։

Նրա մասնակցությամբ գիշերը կազմակերպվել է կոնսիլիում։ Վիրահատության կամ որևէ այլ միջամտության անհրաժեշտություն չի եղել։ Երեխան շարունակում է ստանալ ինտենսիվ բուժում կյանքի ֆունկցիաները պահպանելու և վերահսկելու ուղղությամբ։ Նշենք, որ տղան ծնվել է առողջական խնդիրներով, մի քանի անգամ երկարատև բուժում է ստացել հանրապետության և Լեռնային Ղարաբաղի տարբեր հիվանդանոցներում:

Երեխայի ընտանիքի ևս երկու երեխա տեղափոխվել է Արմավիր քաղաքի ինֆեկցիոն հիվանդանոց: Նրանց երեկ այցելել էր նախարարը:

Նախորդող հրապարակումներ`
Նորապատ գյուղից հիվանդանոց տեղափոխված երեխան կոմայի մեջ է
ԱՆ. Երեխաների թունավորման դեպքերի միջև փոխկապակցվածություն չկա 
Արմեն Մուրադյանն այցելել է Արմավիրի բժշկական կենտրոնում բուժվող երեխաներին (լուսանկարներ)