Ձեր վստահելի աղբյուրը

Հուլիսի 24-ին ՀՀ առողջապահության նախարարությունը տեղեկատվություն է ստացել, որ Նորագավիթ 10-րդ փողոցի տներից մեկում արձանագրվել է աղիքային վարակին բնորոշ գանգատներով հիվանդության դեպք, տեղեկացնում են ԱՆ լրատվական ծառայությունից:

Նախարարության մասնագետներն իրականացրել են դեպքի համաճարակաբանական հետազոտություն, որի արդյունքում պարզվել է, որ հարակից տներում նույնպես կան նման գանգատներով անձինք: Անմիջապես կազմակերպվել են բակային համայցեր, որոնց արդյունքում ևս հայտնաբերվել են մի շարք հիվանդներ: Բոլորի մոտ դիտվել են նույն ախտանշանները` սրտխառնոց, փսխում, ոչ բարձր ջերմություն, ջրային բնույթի լուծ: Ընդհանուր թվով արձանագրվել է տարբեր տարիքի 40 հիվանդ:

Նշվում է, որ բոլորի վիճակը թեթև է: Ներկայումս հոսպիտալացված հիվանդներ չկան:

Ըստ աղբյուրի, կատարվել է դեպքերի քարտեզագրում, համաճարակաբանական վերլուծություն, իրականացվել են նմուշառումներ հիվանդների կենսաբանական նյութից, հոսող և պահեստավորված ջրից:

«Դեպքերի թեթև կլինիկական ընթացքը, տարբեր տարիքային խմբերի ընդգրկումը, որոշակի տարածքում միաժամանակյա դեպքերի արձանագրումը, բնակչության շրջանում իրականացված հարցախույզերի արդյունքերը վկայում են, որ բռնկման հավանական պատճառը ջուրն է: Աշխատանքները շարունակվում են»,- նշվում է ԱՆ տարածած հաղորդագրության մեջ: