Ձեր վստահելի աղբյուրը

Թուրքիան պետական մակարդակով աջակցում է Իրանի անջատողական ուժերին: Այդ, ինչպես նաև թուրք-իրանական հարաբերություններում առկա խնդիրների շուրջ Panorama.am-ը զրուցել է իրանագետ Արմեն Իսրայելյանի հետ:

-Ինչպե ՞ ս կգնահատեք թուրք-իրանական ներկայիս հարաբերությունները:
-Թեև Իրանի և Թուրքիայի ղեկավարները պաշտոնական հանդիպումների ընթացքում հայտարարում են, թե երկու երկրներն ունեն բարիդրացիական և բարեկամական հարաբերություններ, սակայն իրականում գոյություն ունեն մի շարք խնդիրներ, որոնք պատճառ են հանդիսանում փոխադարձ անվստահության մթնոլորտի ձևավորմանը:
Չնայած երկկողմ քաղաքական հարաբերություններում առկա մի շարք խնդիրներին՝ տնտեսական պատժամիջոցների պայմաններում Իրանը փորձում է Թուրքիայի հետ պահպանել բնականոն հարաբերություններ, սակայն Անկարայի պահվածքը Թեհրանին ստիպում է երբեմն հանդես գալ կտրուկ քայլերով:
Եթե Իրանի քաղաքական ղեկավարությունը փորձում է Թուրքիայի հետ ունեցած խնդիրները պարզաբանել նուրբ դիվանագիտական հայտարարությունների միջոցով, ապա Իրանի բարձրագույն ռազմական ղեկավարությունը, ի դեմս ԶՈւ ԳՇ պետի, հակված է ավելի կոշտ դիրքորոշմանը:

-Իսկ ի ՞ նչ խնդիրներ գոյություն ունեն երկկողմ հարաբերություններում:
-Տարածաշրջանային հարցերում, մասնավորապես Սիրիայի հարցում Իրանն ու Թուրքիան ունեն միանգամայն տարբեր մոտեցումներ: Անկարան սիրիական ճգնաժամի լուծումը տեսնում է Բաշար ալ-Ասադի իշխանությունը տապալելու մեջ և աջակցում Սիրիայի ընդդիմադիր զինված խմբավորումներին, իսկ Թեհրանը գտնում է, որ սիրիական ճգնաժամը պետք է լուծվի Սիրիայի քաղաքական և հասարակական տարբեր խմբերի ներկայացուցիչների միջև ազգային համաձայնության ճանապարհով, ինչի արդյունքում պետք է ընտրությունների միջոցով ձևավորի անցումային կառավարություն:
Թուրքիան պաշտոնապես Իրանին մեղադրում է «ՊԿԿ» ահաբեկչական խմբավորման անդամներին աջակցելու մեջ: Հենց այդ պատճառով էր, որ Թուրքիայի Էրզրում քաղաքում նախատեսված Իրանի, Թուրքիայի և Ադրբեջանի ԱԳ նախարարների եռակողմ հանդիպման նախօրեին չեղյալ հայտարարվեց հանդիպումը: Իսկ ավելի ուշ, թուրք-սիրիական սահմանին «Պատրիոտ» հրթիռային համակարգերի տեղակայման պատճառով Իրանի նախագահը մերժեց Թուրքիայի վարչապետ Ռեջեփ Թայիփ Էրդողանի՝ Անկարա այցելելու հրավերը:

-Հայտնի է, որ Ադրբեջանում գործող պանթյուրքական ուժերը անընդհատ շահարկում են Իրանի թյուրքալեզու բնակչության՝ ազարիների, խնդիրները: Ի ՞ նչ դեր ունի Թուրքիան այդ հարցում:
-Եթե նախկինում Թուրքիան ցույց էր տալիս, թե ինքն այդ հարցում վարում է չեզոք քաղաքականություն, ապա ներկայում Անկարան պետական մակարդակով սկսել է բարձրաձայնել Իրանի թյուրքալեզու բնակչության խնդիրների մասին: Ըստ իրանական ԶԼՄ-ների՝ օրերս Թուրքիայի պետական «TRT» հեռուստաալիքը նախ Իրանի թյուրքալեզու բնակչություն ունեցող նահանգներն անվանել էր «Հարավային Ադրբեջան», իսկ այնուհետև հավելել, թե Իրանում ապրող 30 միլիոն ազարիները ճնշումների են ենթարկվում:
Բացի այդ, հակաիրանական անջատողական ուղղվածություն ունեցող «Ազարիների ազգային խորհուրդ» և «Հարավային Ադրբեջանի ազգային ազատագրական ճակատ» կազմակերպությունները վերջերս Անկարայում «Հարավային Ադրբեջանի դերը թյուրքական աշխարհում» թեմայով կոնֆերանս էին կազմակերպել, որին ներկա են եղել Թուրքիայի ինչպես նախկին, այնպես էլ ներկա պետական պաշտոնյաներ:
Ավելին, Էրդողանի ենթակայությամբ գործող հեռուստաալիքներից մեկով հեռարձակվող «Գայլերի լեռնահովիտը» բազմասերիանոց ֆիլմի հակաիսրայելական և հակաամերիկյան ուղղվածություն ունեցող սցենարը վերջերս փոխվել է հակաիրանականի:

Թեմային առնչվող` Ռ. Սաֆրաստյան. Թուրքիան հարևանների հետ «զրո խնդիրներ» ունենալու փոխարեն ստեղծեց ավելի մեծ խնդիրներ