Ձեր վստահելի աղբյուրը

Այսօր Ազգային ժողովում կառավարության ծրագրի քննարկման ընդմիջման ժամանակ ՀՀ վարչապետ Հովիկ Աբրահամյանը, երբ դուրս եկավ նիստերի դահլիճից, լրագրողները հնարավորություն ունեցան մի քանի հարց ուղղել նրան

-Պարոն Աբրահամյան, փաստորեն մինչև հիմա հավասար դաշտ ստեղծված չէ՞ր գործարարների համար:
-Ես նման բան չեմ ասել: Ուղղակի ասում եմ, որ ոչ մեկը չվիրավորվի, դրա համար ասում եմ՝ առաջինն ինձանից եմ սկսելու: Մենք հիմա ասում ենք, որ օրենքի շրջանակներում բոլորը… Մենք բոլորս արձանագրում ենք չէ՞, որ կա ստվեր: Բոլոր երկրներում կա, բայց մեզ մոտ շատ է: Չգիտեմ՝ 10 տոկոս է, 20 տոկոս է, 30 է, ամեն դեպքում մենք տեսնում ենք, որ կա հնարավորություն հարկային դաշտ բերել ստվերը: Ինչքան հնարավոր է, մեք փորձելու ենք բերել՝ օգտագործելով մեր բոլոր հնարավորություններն ու լծակները:

-Ինչո՞ւ եք շեշտում «մերձավորներ» արտահայտությունը, այսինքն՝ որոշ պաշտոնյաների մերձավորներ արտոնյա՞լ են:
-Պարզ չէ՞, թե ինչի համար եմ ասում: Սինգապուրի վարչապետին հիշո՞ւմ եք, որ հարց էին տվել՝ ո՞նց արեցիք, որ ձեր երկիրը կառուցեցիք: Ասում էր՝ սկսեցինք մեր մերձավորներից, մեր ընկերներից: Ես ի նկատի ունեի, որ նաև մեր բոլոր ընկերները, մերձավորները հասկանան, որ առաջինն իրենք պարտավոր են որևէ խախտում թույլ չտալ իրենց աշխատանքի ընթացքում, հարկային դաշտ գան բոլորը, և մեր բոլորիս նպատակը դա է: Իմ կարծիքով՝ ես շատ հստակ եմ ասել, և որևէ տողատակ փնտրել չաժե:

-Իսկ մոնիթորինգ արե՞լ եք ստվերի հետ կապված:
-Մոնիթորինգ կանեն պատկան մարմինները և բոլորին կհրավիրեն հարկային դաշտ: Իմ կարծիքով՝ մենք շատ լավ գործ ենք նախաձեռնել և հաստատ ունենալու ենք հաջողություն:

-Ինչպե՞ս եք պայքարելու ստվերի դեմ, եթե հստակ հաշվարկներ չկան:
-Ստվերը հաշվարկելը շատ դժվար է, մենք փաստաթղթավորում, որ իրականացնենք, ստվերն ակնհայտ կերևա: Եթե չկա փաստաթղթավորում, հաշվառում, հնարավոր չէ հաշվել: Տարբեր թվեր են հնչեցնում ստվերի՝ 25-30 տոկոս:

-Դա Հայաստանի նման երկրի համար արդյոք մեծ թիվ չէ՞:
-Ճոխություն է, ճոխություն:

-Արդյոք դա չի՞ վկայում, որ բիզնեսն ու իշխանությունը սերտաճած են:
-Դե դրան կանդրադառնանք հետո, հիմա մենք փորձենք մեր գործն անենք, գնահատականներ չտանք: Մենք փորձենք աշխատենք, արդյունքներն արձանագրենք, հետո գնահատական կլինի: Դուք կտեսնեք, որ եթե այսքան հարկեր ու եկամուտներ ավելացել են, ուրեմն պարզ է, որ ստվերից է, քանի դեռ նոր ներդրումներ ու աշխատատեղեր չկան: Բայց մեր խնդիրը նորից եմ ասում՝ երկու մասից է՝ առաջինը մենք կայունություն պետք է ապահովենք: Դուք գիտեք, որ 2014 թվականի բյուջեն պետք է իրականացնենք և եկամուտների, և ծախսերի մասով: Մենք փոփոխություններն ակնհայտ կիրականացնենք միջնաժամկետ ծրագրում՝ 2015-17 թվականներին: Ամեն ինչ անելու ենք, որ այն ինչ ծրագրում հնչեցրել ենք, փորձենք այս տարիների ընթացքում իրականացնել:

-Դուք հավատո՞ւմ եք, որ Գագիկ Խաչատրյանն ասում է բիզնես չունի:
-Դե եթե ունի, նա նախ պաշտոնից կհրաժարվի, օրենքով ինքն իրավունք չունի զբաղվելու գործարարությամբ: Իմ կարծիքով՝ յուրաքանչյուր մարդ կհասկանա, որ պաշտոնն ու բիզնեսով զբաղվելն անհամատեղելի է: Եվ նաև կստուգեմ:

-Գործարարները շարունակում են արտագաղթել, քանի որ հույսեր չեն կապում կառավարության հետ, ինչպե՞ս կմեկնաբանեք սա:
-Դա մեզ ավելի պարտավորեցնում է, որ պետք է ամեն ինչ անենք, որ հավատը վերականգնվի մեր նկատմամբ:

-Իսկ տեղյա՞կ եք, որ գործարարներից ու պատգամավորներից ոմանց մոտ հեգնանք է առաջացրել այն հայտարարությունը, թե Գագիկ Խաչատրյանը բիզնեսով չի զբաղվում:
-Դա ձեր կարծիքն է: Նորից եմ ասում՝ անձերից հեռու մնացեք, ով զբաղվելու է գործարարությամբ, նա իրավունք չունի նախարար աշխատի: Բարդ բա՞ն եմ ասել, եթե կհիմնավորվի, որ զբաղվում են, ուրեմն պաշտոն չեն ունենա: Ես ինչ որ ասում եմ, նախ դուք հավատացեք իմ ասածներին, ես ձեզ խնդրում եմ: Ժամանակ տվեք, երբ որ կտեսնեք, որ մեր ասածներն իրականություն չեն դառնում, այն ժամանակ կասեք:

-Եթե չարաշահումներ հայտնաբերեք նախկին կառավարության աշխատաոճում, դիմելո՞ւ եք իրավապահներին:
-Այդ քայլը ես արդեն արել եմ, եթե հիշում եք, Վերահսկիչ պալատի հաշվետվության ընթացքում ամբողջ փաթեթն ուղարկել եմ Գլխավոր դատախազին:

-Բայց ընթացք չկա:
-Դրա համար էլ եմ ես պատասխանատո՞ւ:

-Ձեզ կհաջողվի՞ բավարարել ԲՀԿ-ի պահանջները: ԲՀԿ առաջնորդ Գագիկ Ծառուկյանն ասում է, որ դեռ չեն պահանջի ձեր հրաժարականը, բայց եթե ծրագիրը չկատարվի, ապա կպահանջեն նաև ձեր ղեկավարած կառավարության հրաժարականը:
-ԲՀԿ-ն որևէ պահանջ իմ նկատմամբ չի ներկայացրել: Ի՞նչ պահանջ է ներկայացրել, ես չգիտեմ, ձեզ ներկայացրե՞լ է նման պահանջ: Ասում է՝ տեսնենք, եթե ծրագիրը նորմալ կիրականացնի, նորմալ կաշխատի, չենք պահանջի, չի աշխատի, կպահանջենք: Շատ նորմալ գնահատական է, ես գոհ եմ:

-Տիգրան Սարգսյանը չէ՞ր աշխատում, որ պահանջեցին:
-Ինչի՞ եք ուզում, որ ես Տիգրան Սարգսյանի աշխատանքի գնահատականը տամ:

-Կարո՞ղ ենք արձանագրել, որ դուք խափանել եք քառյակի գործունեությունը:
-Ես որևէ գործ խափանելու տրամադրություն չունեմ, ի՞նչ ա եղել, թող աշխատեն: