Ձեր վստահելի աղբյուրը

Հայաստանի Սահմանադրական դատարանը հունիսի 30-ին կայացած նիստում որոշել է, որ Ռուսաստանի կողմից Հայաստանին 200 մլն դոլար վարկ տրամադրելու մասին համաձայնագիրը համապաստախանում է ՀՀ Սահմանադրությանը: Համաձայնագիրը հուլիսի 2-ին կքննարկվի Ազգային ժողովի արտահերթ նիստում: Համաձայնագիրը, հիշեցնենք, կնքվել էր Երևանում, հունիսի 26-ին տեղի ունեցած Հայաստանի և Ռուսաստանի միջև տնտեսական համագործակցության միջկառավարական հանձնաժողովի նիստի շրջանակներում և վերաբերում էր Հայաստանի պաշտպանական համակարգի սպառազինության ձեռքբերմանը:

Թե տեղական, թե ռուսական մամուլը գրում է, որ 200 մլն դոլարից Հայաստանի կառավարությունը ծրագրում է շուրջ 50 մլն դոլարը վճարել Հայաստանի էլեկտրական ցանցեր ընկերությանը` սուբսիդավորելով Հայաստանի քաղաքացիների համար էլեկտրաէներգիայի բարձրացված սակագինը (6.93 դրամը): Պաշտոնական շրջանակները, սակայն, այդ մասին լռում են:

Հունիսի 30-ին և վարչապետ Հովիկ Աբրահամյանը, և էներգետիկայի ու բնական պաշարների նախարար Երվանդ Զախարյանը հարցին, թե կսուբսիդավորվի՞ արդյոք բարձրացված սակագինը 200 մլն դոլար տրամադրվելիք վարկով հստակ ոչինչ չէին պատասխանել, հորդորելով սպասել ևս մի քանի օր: Ավելին, նախարար Զախարյանը նույնիսկ ասել էր, թե տեղյակ չէ` ինչ միջոցներով է փոխհատուցվելու էլեկտրաէներգիայի սակագինը:

Համաձայնագիրը վաղը կքննարկվի Ազգային ժողովի արտահերթ նիստում, բայց Հանրապետական խմբակցության անդամ, ԱԺ ֆինանսավարկային հարցերի մշտական հանձնաժողովի նախագահ Գագիկ Մինասյանը դեռ ծանոթ չէ համաձայնագրի բովանդակությանը: Ի դեպ, ենթադրվում է, որ հենց այս հանձնաժողովում է քննարկվելու համաձայնագիրը` ԱԺ արտահերթ նիստի օրակարգ մտնելուց առաջ: Համաձայնագրի վերաբերյալ Panorama.am-ի հարցերին Մինասյանը բացասական պատասխան էր տալիս, կտրուկ նշելով, որ տեղյակ չէ համաձայնագրի բովանդակությանը և տեղյակ չէ, թե արդյոք այդ գումարից է կատարվելու սուբսիդավորումը:

Փոխարենը համաձայնագրից տեղյակ է, և ավելին` դրան կողմ է քվեարկելու «Բարգավաճ Հայաստան» խմբակցությունը, քանի որ «դա Հայաստանի համար ստրատեգիական նշանակություն ունի»:

«Սովորաբար մենք վարկային ծրագրերին դեմ ենք լինում, բայց սա վերաբերում է երկրի անվտանգությանը», -ասաց Միքայել Մելքումյանը:

Փորձեցինք հասկանալ, թե արդյոք կողմ կլինեն, եթե վարկային գումարից ուղղվի էլէներգիայի սուբսիդավորմանը, Մելքումյանը պատասխանեց, որ այդ մասին այս պահին գրավոր որևէ տեղեկություն չկա:

«Մենք մինչև գրավոր չտեսնենք արձանագրված, չենք կարող ոչինչ ասել: Բայց ամեն դեպքում մենք միշտ էլ կողմ ենք եղել, որ ՀԷՑ-ի պարտքի փոխհատուցումը չկապեն սակագնի բարձրացման փաստի հետ: Եթե իշխաննությունը գտնում է, որ ինքն է հայթայթում այդ գումարները, մենք ինչո՞ւ պետք է դեմ լինենք: Եթե վարկ է, ինչ տարբերություն, մեկ է վճարելու են», -նկատեց Մելքումյանը` հորդորելով սպասել մինչև վաղը:

Մինչ վաղը խորհրդարանականները որոշում կկայացնեն, վարկային համաձայնագիրը, ինչպես վերևում նշեցինք, համարվել է ՀՀ Սահմանադրությանը չհակասող: Հարցը քննվել է ՍԴ դռնբաց նիստում, բանավոր ընթացակարգով: ՍԴ-ն մասնավորապես, պարզել է, որ Համաձայնագրով Ռուսաստանի Դաշնության կառավարությունը Հայաստանի Հանրապետության կառավարությանը տրամադրում է 200 մլն ԱՄՆ դոլար գումարի չափով պետական արտահանման վարկ բացառապես ռուսական արտադրության ռազմական նշանակության արտադրանքի մատակարարումների ֆինանսավորման համար: Վարկի գծով պարտքի հաշվառումը կատարվում է ԱՄՆ դոլարով:

Համաձայնագրով Հայաստանի Հանրապետությունն ստանձնում է մասնավորապես, հետևյալ պարտավորությունները`

օգտագործել վարկը 2015-2017թթ. ընթացքում՝ ռուսական ռուբլով հաշվարկված արտադրանքի մատակարարման վերաբերյալ պայմանագրերից յուրաքանչյուրի արժեքի 90 տոկոսի ֆինանսավորման համար, վարկի օգտագործման ժամկետը լրանալիս 30 օրացուցային օրվա ընթացքում ռուսական կողմի օգտին իրականացնել ռուսական ռուբլով կոմիսիոն վճարում` վարկի չօգտագործված գումարի 1 տոկոսի չափով:

Նույն համաձայնագրով, 2018 թ. փետրվարի 15 -ից՝ 10 տարվա ընթացքում, հավասարաչափ կիսամյակային վճարումներով՝ յուրաքանչյուր տարվա փետրվարի 15-ին և օգոստոսի 15-ին, մարել վարկի փաստացի օգտագործված գումարը: Վարկի յուրաքանչյուր գումարի օգտագործման ամսաթվից մինչև հիմնական պարտքի մարման վերջնական ամսաթիվը՝ յուրաքանչյուր տարվա փետրվարի 15-ին և օգոստոսի 15-ին կատարել տոկոսների վճարում `տարեկան 3 տոկոս տոկոսադրույքով:

«Հայաստանի Հանրապետության սահմանադրական դատարանն արձանագրում է, որ Համաձայնագրում ամրագրված պարտավորությունները բխում են բարիդրացիական և փոխշահավետ հարաբերությունների հաստատման սահմանադրական սկզբունքների էությունից և նպատակաուղղված են Հայաստանի Հանրապետության պաշտպանունակության հետագա ամրապնդմանը», -իր որոշման մեջ նշել է Սահմանադրական դատարանը: