Ձեր վստահելի աղբյուրը

Հայաստանի պաշտպանության համակարգի սպառազինության համար Ռուսաստանի Դաշնության կառավարության կողմից Հայաստանին տրամադրվող 200 մլն ԱՄՆ դոլար վարկից որևէ լումա չի տրամադրվի այլ ծախսերի համար: Այդ մասին այսօր Ազգային ժողովի արտահերթ նիստում հայտարարեց վարկ տրամադրելու մասին համաձայնագրի հիմնական զեկուցող Պաշտպանության փոխնախարար Արա Նազարյանը՝ պատասխանելով ԱԺ ՀԱԿ խմբակցության ղեկավար Լևոն Զուրաբյանի հարցին:

Պատգամավորը հետաքրքրվում էր, թե վարկային այս պայմանագրի պայմանները հնարավորություն տալի՞ս են ՀՀ կառավարությանը օգտագործել գումարները նաև այլ նպատակով, ասենք էլեկտրաէներգիայի բարձրացված սակագնի սուբսիդավորման համար:
«Որևիցե ցենտ, որևիցե լումա չի կարող ուղղվել այդ նպատակներին: Նշված գումարը ռուսական արտադրության զինամթերքի համար է, միմիայն սպառազինություն ձեռք բերելու համար է», -վստահեցրեց փոխնախարարը:

Ի դեպ, Նազարյանը համաձայնագիրը ներկայացնելիս նշեց, որ ձեռք է բերվելու ռուսական արտադրանքի այնպիսի զինամթերք, որը երբևէ ՀՀ պաշտպանության համակարգը չի ունեցել:

Նշենք, որ Համաձայնագրով Հայաստանի Հանրապետությունն ստանձնում է մասնավորապես, հետևյալ պարտավորությունները`

օգտագործել վարկը 2015-2017թթ. ընթացքում՝ ռուսական ռուբլով հաշվարկված արտադրանքի մատակարարման վերաբերյալ պայմանագրերից յուրաքանչյուրի արժեքի 90 տոկոսի ֆինանսավորման համար, վարկի օգտագործման ժամկետը լրանալիս 30 օրացուցային օրվա ընթացքում ռուսական կողմի օգտին իրականացնել ռուսական ռուբլով կոմիսիոն վճարում` վարկի չօգտագործված գումարի 1 տոկոսի չափով:

Նույն համաձայնագրով, 2018 թ. փետրվարի 15 -ից՝ 10 տարվա ընթացքում, հավասարաչափ կիսամյակային վճարումներով՝ յուրաքանչյուր տարվա փետրվարի 15-ին և օգոստոսի 15-ին, մարել վարկի փաստացի օգտագործված գումարը: Վարկի յուրաքանչյուր գումարի օգտագործման ամսաթվից մինչև հիմնական պարտքի մարման վերջնական ամսաթիվը՝ յուրաքանչյուր տարվա փետրվարի 15-ին և օգոստոսի 15-ին կատարել տոկոսների վճարում `տարեկան 3 տոկոս տոկոսադրույքով:

Նախորդող հրապարակում՝

Էլէներգիայի բարձր սակագինը կսուբսիդավորեն 200 մլն վարկի՞ց. ՍԴ-ն հաստատել է, ԱԺ-ում լռում են