Ձեր վստահելի աղբյուրը

Սահամանդրության նախագծով, կարծես, ընդգծվում է Վճռաբեկ դատարանի անդամների կարևորությունը, ինչը ողջունելի է: Այդ մասին Panorama.am-ի թղթակցի հետ զրույցում մեկնաբանելով Սահմանադրության նախագծի դատական համակարգին վերաբերող հատվածը, ասաց նախկին դատավոր, այժմ Հանրապետական կուսակցության անդամ Պարգև Օհանյանը:

Նշենք, որ Սահամանադրության նախագծի 164 հոդվածի 3-րդ կետի համաձայն, Վճռաբեկ դատարանի դատավորների ընտրությունն իրականացվում է մրցութային կարգով: Բարձրագույն դատական խորհուրդը մրցույթի արդյունքներով Ազգային ժողովին ներ-կայացնում է Վճռաբեկ դատարանի դատավորների` յուրաքանչյուր տեղի համար երեք թեկնածու: Ազգային ժողովի կողմից` պատգամավորների ընդհանուր թվի առնվազն երեք հինգերորդի ձայների մեծամասնությամբ ընտրված թեկնածուին պաշտոնի է նշանակում Հանրապետության նախագահը:

Ինչ վերաբերում է Վճռաբեկ դատարանի նախագահին, ապա նույն հոդվածի 5-րդ կետի համաձայն, Վճռաբեկ դատարանի նախագահին Վճռաբեկ դատարանի կազմից` վեց տարի ժամկետով, առանց վերանշանակման իրավունքի, նշանակում է Ազգային ժողովը` Բարձրագույն դատական խորհրդի առաջարկությամբ, պատգամավորների ընդհանուր թվի ձայների մեծամասնությամբ:

Պարոն Օհանյանի կարծիքով, այդպես դատավորներն ավելի հաշվետու կլինեն: «Գիտեք` օրենքը չէ, որ պետք է հարց լուծի: Կարող ենք անընդհատ փոխել նշանակման կարգը, բայց ինքներս չփոխվենք: Ոչ թե բարեփոխում է պետք, այլ վերափոխում: Դատական իշխանությունը այն իշխանությունն է, որտեղ արդար մարդիկ պետք է աշխատեն, այնտեղ մարդը պետք է ուղղակի արդար լինի իր խղճի, պետության, մարդկանց, Աստծո առջև: Իհարկե, յուրաքանչյուր դատավոր, ինչպես ցանկացած մարդ, սխալական է: Բայց եթե ինքը լինի խղճով, չի քաշքշի, չի ձգձգի գործերը և ակնհայտ անարդար որոշումներ չի կայացնի: Այնպես, որ ոնց ուզում եք նշանակեք, ոնց ուզում եք հսկեք, դատավորին չի կարելի հսկել, դատավորին, հակառակը, պետք է անկախություն տալ, որ ինքը համարձակ արդարադատություն իրականացնի», -հավելեց նախկին դատավորը:

Նրա խոսքով, դատավորին անկախություն պետք է տան «վերևները», իսկ այդ «վերևը» նոր Սահմանադրության ընդունման պարագայում դառնում է Ազգային ժողովը: Օհանյանն ասում է, որ լավատես է և «երբեք չի պատկերացնի», որ Ազգային ժողովը կարող է այնպես անել, որ դատավորներն իրենից կախման մեջ լինեն: «Մեկ բան է, որ դատավորների վախը չափողի դերում նախագահն է, այլ բան, որ այդ դերը ստանձնում է Ազգային ժողովը, քանի որ այստեղ մեկ անձ չէ, այլ մի քանիսն են: Հույս ունեմ, լավատես եմ, որ Ազգային ժողովի նախագահը կամ վարչապետը միջամտություններ չեն անի դատական իշխանության գործերի մեջ: Երբեք չեմ պատկերացրել նման միջամտություն: Մենք մի քիչ այլ միջամտությունների սովոր ենք եղել», -հավելեց Օհանյանը:

Հարցին, թե գուցե Հանրապետական կուսակցության անդամ լինելու հանգամա՞նքն է ստիպում իրեն լավատես լինել, պարոն Օհանյանը ի պատասխան նկատեց, որ պետք չէ հեգնել և հավելեց. «Գուցե ավելի ճիշտ կլինի ասել, որ իմ քրիստոնեական դաստիարակությունն է հիմք տալիս նման բան ասել: Լավատեսությունը լավ բան է, իսկ հոռետեսությունը կործանարար է»:

Նրա դիտարկմամբ, Սահմանադրության նախագծում խմբագրական ճշգրտումներ կատարելու կարիք կա, որոնք հակասություններ են առաջացնում հոդվածներում:

Թեմային առնչվող հրապարակումներ`