Համալիրում խաղատուն կկառուցվի, եթե 40 մլրդ դրամից ավելի ներդրում կատարվի. Արման Սահակյան
«Համալիրն այնքան թանկ է և կարևոր բոլորիս համար, որ այնտեղ որևէ բան անել առանց շենքի ճարտարապետների պատկերացումների, այդ հոյակերտ շենքին հակառակ կամ խոչընդոտող, կարծում եմ հնարավոր չէ»,-ի պատասխան Panorama.am-ի հարցի՝ ասաց ՀՀ կառավարությանն առընթեր Պետական գույքի կառավարման վաչության պետ Արման Սահակյանը՝ անդրադառնալով Մարզահամամերգային համալիրի մասնավորեցմանը:
«Սա ակնհայտ է, և կարծում եմ, սրա մասին խոսելը նույնիսկ անհարիր է»,- ասաց նա:
Ինչ վերաբերում է գործարքին, ապա, ըստ Ա.Սահակյանի, գործարքի հիմքում դրված է ծրագիր, որը նոր շունչ և կյանք է հաղորդելու համալիրին, ինչպես նաև ամուր հիմքերի վրա է դնելու մարզահամերգային համալիրի կենսաապահովումը:
«Աչքի լույսի պես պահելով, մենք պետք է կարողանանք համալիրը դարձնենք մեր քաղաքի ամենաակտիվ կառույցներից մեկը: Հիմնական ծրագիրը սա է և ես վստահեցնում եմ, որ այս ծրագիրը իրականանալու է խիստ հսկողության ներքո»,- ասաց Ա.Սահակյանը՝ հավելելով, որ ՄՀՀ-ի պարտավորությունները ևս դրված են Պետական գույքի կառավարման վարչության վրա:
Ըստ նրա՝ իր ղեկավարության ժամանակ չի եղել մի դեպք, որ որևէ մեկը՝ անկախ դիրքից, չկատարի իր առջև դրված պարտավորությունները:
Ինչ վերաբերում է համալիրում կառուցվող խաղատան մասին լուրերին, Ա.Սահակյանը նախ ասաց, որ այնտեղ խաղատուն չի լինելու, ապա ավելացրեց. «Այո, մեր օրենքը չի արգելում խաղատուն կառուցել: Շահումով խաղ կարող է կազմակերպվել ՀՀ կառավարության կողմից հավանության արժանացած 40 մլրդ դրամից ավելի ներդրումային ծրագրերի դեպքում: Այսինքն՝ եթե 100 մլն դոլարի ներդրում իրականացվի, ապա խաղատունը կլինի, եթե չիրականացվի, բնականաբար, խաղատուն չի լինի: Բայց դա չի խոչընդոտելու համալիրի ճարտարապետական տեսքին»:
Կառուցապատումը, ըստ նրա, հիմնականում իրականացվելու է Հրազդան մարզադաշտից դեպի Լենինգրադյան փողոց տանող հարակից տարածքում, որը բավականին հեռու է լինելու համալիրից:
«Մենք պետք է ամեն ինչ անենք, որպեսզի ապահովենք ֆինանսական հոսքեր Մարզահամերգային համալիրի պահպանման և բնակականոն գործունեությունը ապահովելու համար: Համալիրը մեր քաղաքի գանձն է և մենք իրավունք չունենք գցել այն մարդկանց ձեռքը, որոնք տարիների ընթացքում ոչ թե մի բան ավելացնում են, այլ պակասեցնում»,- ասաց Ա.Սահակյանը՝ հավելելով, որ ցանկացած կառուցապատում միմիայն օժանդակելու է Մարզահամերգային համալիրի պահպանման ծախսերը և ֆինանսական մուտքերը:
Ինչ վերաբերում է ներդրողին, Ա.Սահակյանն ասաց, որ իրենք անձերի հետ չեն շփվում, բանակցություններ են վարում միայն այն ընկերության հետ, որը պետք է ներդրում իրականացնի:
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
