Ձեր վստահելի աղբյուրը

ԵԽ նախարարների կոմիտեն մտադիր է հասնել ադրբեջանցի լրագրող Էյնուլլա Ֆաթուլլաևի ազատ արձակմանը:
Այս մասին, «Թուրան» լրատվական գործակալության փոխանցմամբ, «Объектив ТВ»ի հետ զրույցում նշել է լրագրողի փաստաբան Էլչին Սադիխովը:

Կազմակերպության կանոնադրության համաձայն, այն բանից հետո, երբ Ադրբեջանի Գերագույն դատարանն անհիմն կերպով հրաժարվել է կատարել Եվրոպական դատարանի (ՄԻԵԴ) վճիռը, Կոմիտեն մեկ ամսվա ընթացքում իրավունք ունի պահանջելու Ֆաթուլլաևի նկատմամբ այլընտրանքային պատժի կիրառում, որը չի նախատեսում նրան կալանքի տակ պահել:

Էյնուլլա Ֆաթուլաևի հայրը նշել է, որ լրագրողի մայրը շաքարային դիաբեթ հիվանդությամբ է տառապում այն բանից հետո, երբ պարզ դարձավ, որ Ադրբեջանի դատական իշխանությունները գործը մտցրել են փակուղի: Տարբեր ատյանների դատարանները, այդ թվում՝ վերաքննիչ, ՄԻԵԴ-ի որոշումը համարում են արդար, սակայն որոշ պատճառներ են փնտրում, որպեսզի լրագրողին ազատ չարձակեն:
Ֆաթուլլաևի փաստաբան Էլչին Սադիխովը համոզված է, որ Ադրբեջանի Գերագույն դատարանի գործողությունները հակասում են Եվրոպական կոնվենցիայի 5-րդ հոդվածին (Ազատության և անձնական անձեռնամխելիության իրավունք):

Հիշեցնենք, որ դեռևս 2007 թվականին, Խոջալուի դեպքերի վերաբերյալ, զրպարտություններ կատարելու մեղադրանքով, վերջինս Յասամալի շրջանային դատարանի կողմից դատապարտվել էր 2.5 տարվա ազատազրկման: Սակայն հետագայում իշխանությունները դրանով չէին սահամանփակվել և ևս մեկ շինծու մեղադրանքի հիման վրա դատապարտել 8.5 տարվա ազատազրկման:

Սակայն, 2010 թվականի ապրիլի 22-ին, Մարդու իրավունքների եվրոպական դատարանը որոշում ընդունեց, որի համաձայն՝ ադրբեջանական դատարանների գործողությունները համարվեցին անօրինական: Ինչից հետո, դատարանը կոչ արեց՝ լրագրողին անհապաղ ազատ արձակել:

Սակայն ադրբեջանական իշխանությունները, հաշվի չառնելով Մարդու իրավունքների եվրոպական դատարանի որոշումը, ինչպես նաև մի շարք երկրների, միջազգային կառույցների և իրավապաշտպան կազմակերպությունների հորդորները, հակառակ քայլերի գնացին:

Իսկ սրանից գրեթե կես տարի առաջ, 2009 թվականի դեկտեմբերի 29-ին, խցում, որտեղ պահվում էր «Ռեալնի Ազերբայջան» թերթի գլխավոր խմբագիրը՝ Էյնուլա ֆաթուլաևը, ստուգումներ իրականացվեցին, ինչի արդյունքում Ֆաթուլաևի կոշիկի և հագուստիի մեջ թմրանյութեր «հայտնաբերվեցին»: Դեռևս այդ ժամանակ լրագրողը հայտարարել է, որ դա իրենը չէ, և իր նկատմամբ հաշեհարդար են տեսնում:

Չնայած այդ հանգամանքին, մի շարք իրավապաշտպան կազմակերպություններ հանդես եկան հայտարարությամբ, որում մասնավորապես նշվում էր, թե Ֆաթուլաևի նկատմամբ շինծու գործ է հարուցվել, որով իշխանությունները ցանկանում են կրկին երկարացնել Ֆաթուլաևին ազատազրկման վայրում պահելու ժամկետը:

Հատկանշականն այն է, որ Ֆաթուլաևի գործով դատավճիռը կայացվեց ու հրապարակվեց ԱՄՆ պետքարտուղար Հիլարի Քլինթոնի Բաքու կատարած այցից անմիջապես հետո: Եվ դա այն դեպքում, որ Հիլարի Քլինթոնը հայտնել էր, որ Ադրբեջանի իշխանությունների հետ քննարկել և հորդորել էր վերանայել բլոգերներին ու լրագրողներին հանիրավի դատապարտելու որոշումները:

Սեպտեմբերին Ադրբեջանի և ԱՄՆ նախագահներ Իլհամ Ալիևի ու Բարաք Օբամայի հանդիպման ժամանակ ևս ԱՄՆ նախագահը խոսելով Ադրբեջանում ժողովրդավարական բարեփոխումների անհրաժեշտության մասին, Ադրբեջանի նախագահին կոչ է արել՝ լրագրողին ազատ արձակել: