Ձեր վստահելի աղբյուրը

Այսօր Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում շարունակվեց Ոստիկանության քրեական հետախուզության գլխավոր վարչության նախկին պետ Հովհաննես Թամամյանի, ինչպես նաև ոստիկանության նախկին պաշտոնյաներ Վահան Խանզադյանի ու Արմեն Պողոսյանի դատավարությունը:

Նախորդ դատական նիստում մեղադրող դատախազ Հարություն Հարությունյանը պահանջել էր Թամամյանին ազատազրկել 4 տարի ժամկետով, ինչը, սակայն փաստաբան Վաղինակ Գևորգյանն այսօրվա իր պաշտպանական ճառում շատ խիստ գնահատեց: «Դատախազի միջնորդությունը արդարացի չէ, առավել ևս այն դեպքում, որ գործում ծանրացնող հանգամանքներ չկան», -հավելեց պաշտպան Գևորգյանը:

Որպես մեղմացուցիչ հանգամանք, Վաղինակ Գևորգյանը հայտարարեց, որ Հովհաննես Թամամյանը նպաստել է օբյեկտիվ քննություն անկացնելուն, ունի անչափահաս տասնչորս տարեկան երեխա, համաձայնել է մեղադրանքի հետ, նախկինում դատապարտված չի եղել, չի խոչընդոտել գործի քննությանը, բնութագրվել է դրական և ունի բազմաթիվ պարգևներ:

Փաստաբանի հաստատ համոզմամբ, Հովհաննես Թամամյանին երկարատև ժամանակով ազատազրկելով` սոցիալական արդարությունը չի վերականգնվի և միջնորդեց պայմանականորեն չկիրառել պատիժը, ազատ արձակել ու մեկ տարի ժամկետով փորձաշրջան նշանակել:

Օգտվելով վերջին խոսքի իր իրավունքից Հովհաննես Թամամյանը դատարանի դահլիճում հայտարարեց. «38 տարի ծառայել եմ ոստիկանության համակարգում, և ես մնում եմ նվիրյալ Հայաստանի Հանրապետությանն ու ոստիկանությանը»:

Դատավոր Արշակ Վարդանյանը անցավ խորհրդակցական սենյակ, և վճիռը կհրապարակվի այսօր, րոպեներ անց:

Նախորդող հրապաարկում. Թամամյանի գործով մյուս ամբաստանյալներին մեղադրողը միջնորդեց ազատել դատարանի դահլիճից. Փաստաբանը ապշած է