Ձեր վստահելի աղբյուրը

Այս պահի դրությամբ e-register.am կայքում գրանցված է 765 հիմնադրամ, որոնցից միայն 265 են ներկայացրել հաշվետվություն ԱՆ աշխատակազմի օրինականության վերահսկողության տեսչություն: Մնացած 500 հիմնադրամների մասով, համաձայն «Վարչական իրավախախտումների վերաբերյալ» օրենսգրքի կազմել են համապատասխան որոշումներ` վարչական տույժ նշանակելու մասին և տրվել է մեկամսյա ժամկետ` հաշվետվություն հրապարակելու համար: Այդ 500 հիմնադրամներից է նաև «Սիվիլիթաս» հիմնադրամը: Այս մասին ասուլիսում ասաց ԱՆ օրինականության վերահսկողության տեսչության պետ Նորայր Փանոսյանը:

«Սիվիլիթաս» հիմնադրամը նախորդ տարվա իր ծավալած գործունեության վերաբերյալ մինչև սույն թվականի մարտ 25-ը թերթում կամ ազդադարում, ինչպես նախատեսված է օրենքով, տեղեկություն չի հրապարակել և մինչև ապրիլի 25-ը չի ներկայացրել արդարադատության նախարարություն: 500-ի մեջ կան այնպիսի կազմակերպություններ, որոնք որևէ քաղաքական ուժի ներկայացուցչի չեն պատկանում, օրենքի առջև բոլորը հավասար են: Մենք նախազգուշացումից հետո տվել ենք մեկ ամիս ժամանակ` հաշվետվություն ներկայացնելու համար: Ժամկետը լրանում է հուլիսի 8-ին»,- ասաց նա` շարունակելով, որ եթե չներկայացանեն այդ ժամկետում էլ, ապա արդեն «Վարչական իրավախախտումների վերաբերյալ» օրենսգքրի համաձայն կենթարկվեն դրամական տույժ` 50 հազար դրամ: Նրա խոսքով, իրենք «Սիվիլիթասի» հարցով չեն դիմել ԱԱԾ:

Նշենք, որ «Սիվիլիթաս» հիմնադրամի շուրջ ստեղծված աղմուկի վերաբերյալ տեղեկությունն առաջինը տարածեց հենց Վարդան Օսկանյանը` ֆեյսբուքյան իր էջում գրելով, որ իրեն հարուցված քրգործի շրջանակներում կանչել են Ազգային անվտանգության ծառայություն հարցաքննության: Օսկանյանը մի կողմից պնդում էր, որ «հարուցված քրեական գործի հետևում քաղաքական պատվեր կա», իսկ մյուս կողմից հայտարարության մեջ որևէ մանրամասն չի ներկայացնում գործի հանգամանքների մասին և ընդամենը պնդում է, թե «հիմնադրման օրվանից՝ Սիվիլիթաս հիմնադրամի գործունեությունը եղել է թափանցիկ և օրենքի տառին ու ոգուն համապատասխան»: Այս հայտարարությունն ընդամենը արդարացում է և իր նկատմամբ անարդարացի վերաբերմունքի մասին բարձրագոչ հայտարարություն:

Երկրորդ արարն արդեն ԱԱԾ-ի ձեռամբ էր: Տարածված հաղորդագրությամբ ԱԱԾ-ն ներկայացնում է իր քայլերի հիմքերը. «Քրեական գործով նախաքննություն է իրականացվում` ԱՄՆ-ում գրանցված «Պոլիմեր Մատերիալս» և «Հանթսման Ինթերնեյշնլ» կորպորացիաներին պատկանող, Հայաստանի Հանրապետությունում հիմնադրված «Հանթսման Բիլդինգ Փրոդաքթս» ՍՊ ընկերության 100% բաժնեմասը շուրջ 2.000.000 ԱՄՆ դոլարով փաստացի վաճառելու, սակայն գործարքը ոչ ճիշտ պայմանագրային ձևակերպումների արդյունքում հարկային մարմնին չներկայացնելու, դրանից հնարավոր առաջացող հարկային պարտավորությունները չկատարելու, ամերիկյան կողմի ցանկությամբ Հայաստանի Հանրապետությունում թողնված և բացառապես բարեգործության համար նախատեսված այդ գումարից մոտ 1.135.000 ԱՄՆ դոլարը իրականում բարեգործական նպատակներին չուղղելու, չօգտագործելու, այդ գումարը «Սիվիլիթաս» հիմնադրամի հիմնադիր և նախագահ Վարդան Օսկանյանի ու նույն հիմնադրամի հոգաբարձուների խորհրդի անդամ Տիգրան Կարապետյանի անվամբ բացված հաշվեհամարներին փոխանցելու, ինչպես նաև գումարների մի մասն անձնական նպատակներով ապօրինի օգտագործելու դեպքերով»:

Այս հայտարարությանը հետևում է Վարդան Օսկանյանի մեկնաբանությունը, որտեղ բառացի ասված է հետևյալը. «Դա միանշանակ քաղաքական պատվեր է և ուզում եմ ասել հետևյալը՝ «փողերի լվացում – Օսկանյան -Հանթսման» բառերը մեկ նախադասության մեջ չեն կարող լինել»: Իսկ ներկայացված դրվագների վերաբերյալ նախկին արտգործնախարարը բավարար է համարել պայմանագրի համապատասխան կետը մեջբերելը. «Ստացողին փոխանցվելիք գումարները դիտարկվում են որպես նվեր, որը Ստացողն իրավունք ունի օգտագործել իր հայեցողությամբ և իր կանոնադրական նպատակների իրականացման համար»: Միայն քաղաքական նպատակ հետապնդողը կարող է բարի մարդու բարի գործը վերածել քաղաքական մանրադրամի»:

Որքանով կարելի է դատել երկուստեք տարածված տեղեկատվությունից, ԱԱԾ-ն պնդում է, որ 1 մլն 135 հազար ամերիկյան դոլարի չափով գումարը տրամադրվել է «Սիվիլիթաս» հիմնադրամին, որը հետագայում հայտնվել է ֆիզիկական անձանց անձնական հաշվեհամարների վրա: