Միացյալ նահանգները Հայաստանի դատաիրավական ոլորտին կֆինանսավորի 2,5 մլն դոլարով
ՀՀ գլխավոր դատախազ Աղվան Հովսեփյանը և Հայաստանում ԱՄՆ դեսպան Ջոն Հեֆերնը այսօր ստորագրել են Ամերիկայի Միացյալ Նահանգների և Հայաստանի Հանրապետության միջև կնքված թմրամիջոցների հսկողության և իրավապահ ոլորտում համագործակցության նամակ-hամաձայնագրի 14-րդ փոփոխությունը կատարելու մասին արձանագրությունը: Նամակ-համաձայնագրի այս փոփոխությամբ, մոտ 2,5 միլիոն ԱՄՆ դոլարի լրացուցիչ օժանդակություն է նախատեսվում` Հայաստանին դատաիրավական ոլորտում մի շարք աջակցության ծրագրերի իրականացման համար:
Համաձայնագրով տրամադրվող ֆինանսավորումը, ըստ պատասխանատուների, կնպաստի Հայաստանի իրավապահ մարմինների կարողությունների զարգացմանը, կծառայի ՀՀ Կառավարությանն առավել արդյունավետ կերպով պայքարել անդրազգային հանցանքների դեմ, ինչպես նաև աջակցություն կցուցաբերվի դատաիրավական և օրենսդրական բարեփոխումների ողջ գործընթացին:
Հայաստանում գործող կազմակերպությունները և իրականցվող երկկողմ ծրագրերը ներառում են Ամերիկյան փաստաբանների ընկերակցության իրավունքի գերակայության նախաձեռնության, Փի-Էյչ Ինթերնեշնլ ՀԿ-ի ԶԱՆԳ Հայաստանի իրավական սոցիալականացման, ԳԱԱ փորձաքննությունների ազգային բյուրոյի քրեափորձագիտական կենտրոնի զարգացման ծրագրերը: Այս աջակցությունը նաև կնպաստի Հայաստանում փողերի լվացման, մարդկանց թրաֆիքինգի և կոռուպցիայի դեմ ուղղված կարողությունների, ինչպես նաև` նոր քրեակատարողական համակարգի զարգացմանը:
2001 թվականի հունիսի 11-ին սկզբնական Համաձայնագիրը ստորագրելուց ի վեր Միացյալ Նահանգների Կառավարությունը դատաիրավական ոլորտին աջակցելու նպատակով դեսպանության` Թմրամիջոցների դեմ պայքարի ու իրավապահ համագործակցության գրասենյակի միջոցով Հայաստանին է տրամադրել ավելի քան տասնութ միլիոն ԱՄՆ դոլարի օգնություն, որի շնորհիվ ձևավորվել են փորձաքննությունների ազգային բյուրոն, ֆինանսադիտարկումների կենտրոնը, օժանդակություն է ցուցաբերվել անդրազգային հանցագործությունների դեմ պայքարում իրավապահ մարմինների աշխատակիցների վերապատրաստմանը, դատաիրավական բարեփոխումներին:
Լրահոս
Տեսանյութեր
Սուրեն Գրիգորյան, դու փայ ունե՞ս, թե՞ չունես, հարց եմ տալիս. Մ. Մանուկյան
