Ձեր վստահելի աղբյուրը

Վերաքննիչ քրեական դատարանում «Սիվիլիթաս»-ի գործով այսօրվա նիստում նույնպես դատավոր Հենրիկ Տեր-Ադամյանը զարմացավ` բողոք ներկայացնող կողմի սեղանին տեսնելով լրատվամիջոցների ձայնագրիչ սարքերը և մի տեսակ նեղսրտեց, որ դատախազին ու ԱԱԾ քննիչին լրատվամիջոցները ուշադրություն չեն դարձրել ու սարքավորումներ նրանց սեղանին չեն դրել:

«Ցանկալի կլինի, եթե դուք ուզում եք լսել պարոն Գրիգորյանի ելույթը, նաև լսեք հակառակ կողմի պատասխանը», -նկատեց դատավոր Տեր-Ադամյանը: Սակայն լրագրողներն ի պատասխան արձագանքեցին, որ երբ մյուս կողմն էլ խոսի, նրանց մոտ կտեղափոխվեն սարքավորումները:

Վերաքննիչ քրեական դատարան «Սիվիլիթաս» հիմնադրամի ներկայացուցիչ Արթուր Գրգորյանը բողոք է ներկայացրել` խնդրելով բեկանել Կենտրոն և Նորք Մարաշ վարչական շրջանների ընդհանուր իրավասության դատարանի որոշումը: Հիշեցնենք ` Կենտրոն և Նորք Մարաշ վարչական շրջանների ընդհանուր իրավասության դատարանը օգոստոսի 8-ին մերժել էր փաստաբանի դիմումը և չէր վերացրել Ազգային անվտանգության ծառայության կողմից հանցավոր ճանապարհով ստացված առանձնապես խոշոր չափերով եկամուտներն օրինականացնելու (փողերի լվացում) դեպքով (ՀՀ քրեական օրենսգրքի 190-րդ հոդվածի 3-րդ մասի 1-ին կետ) քերական գործ հարուցելու մասին որոշումը:

Փաստաբան Արթուր Գրիգորյանն իր ելույթում ասաց, որ «Սիվիլիթաս» հիմնադրամի գործունեությունը բաց ու թափանցիկ է եղել, հետևաբար հանցավոր ճանապարհով գումարներ ստանալու մասին խոսք լինել չի կարող: Նրա խոսքով, հանցավոր ճանապարհներով գումարներ ստանալու մասին որևէ ապացուցողական բազա չկա, հետևաբար «դատարանի պարտականությունն է վերացնել քրեական գործ հարուցելու մասին ԱԱԾ որոշումը»:

ՀՀ ԱԱԾ քննչական վարչության պետի տեղակալ Միքայել Համբարձումյանն իր խոսքում ասաց, որ «Սիվիլիթաս»-ի ներկայացուցչի բողոքն անհիմն է և ենթակա է մերժման: Նրա խոսքով, քրեական գործ հարուցելու մասին ԱԱԾ որոշումը մեղադրական տարրեր չի պարունակում, ուղղված չէ որևէ անձի դեմ, այլ ուղղակի «դրանով տրվել են նախնական գնահատականներ որոշակի փաստերի վերաբերյալ»: Հետևաբար, այդ պայմաններում քրեական գործ հարուցելու մասին որոշումը դատական պայմաններում բողոքարկելու ենթակա չէ:

Քննիչ Համբարձումյանն ասաց, որ իրենց գործունեության հետևանքով «Սիվիլիթաս» հիմնադրամին և դրա հեղինակությանը որևէ վնաս չի պատճառվել, ընդհակառակը` պաշտպանվել են հիմնադրամի շահերը: Եվ որպես ապացույց, քննիչը նկատեց, որ իրենք բացահայտել են հիմնադրամի շահերին մոտ մեկ միլիոն դոլար վնաս պատճառելու փաստը:
 
«Քրեական գործով պարզված տվյալներով, Հանթսմանների կողմից հիմնադրամին նվիրաբերված մոտ 1,5 մլն ԱՄՆ դոլարը հիմնադրամի նախկին նախագահ Վարդան Օսկանյանի կողմից պահվել և չի փոխանցվել առանց որևէ իրավական հիմքի: Այդ գումարը չի մուտքագրվել հիմնադրամի հաշվեկշիռ և չի արտացոլվել հաշվետվություններում և հիմնադրամի գործունեությանը պատճառվել է էական վնաս», -ներկայացրեց ԱԱԾ քննիչ Միքայել Համբարձումյանը:

Դատավոր Տեր-Ադամյանը «Սիվիլիթաս» հիմնադրամի տնօրեն Սալբի Ղազարյանից հետաքրքրվեց` ինչու են իրենք բողոքարկում և խնդրում վերացնել ԱԱԾ որոշումը, երբ, ինչպես քննիչն ասաց, դրանով վնաս է հասցվում հիմնադրամի շահերին: Ի պատասխան Սալբի Ղազարյանը զարմանք հայտնեց, որ քննիչին մտահոգել է «Սիվիթաս»-ի գործունեությանը հասցված վնասը, շնորհակալություն հայտնեց մտահոգության համար և էլ ավելի զարմացավ, որ քննիչը չի խոսում փողերի լվացման դեպքով հարուցված քրեական գործից:

«Այն որոշումը, որով հարուցվեց քրեական գործը, փողերի լվացման մասին էր, որոնց վերաբերյալ պարոն քննիչը որևէ բան չասաց: Բայց պարոն դատավոր, այսօր քննիչը ձեր առջև խոսում է այն մասին, որ մենք տուժում ենք: Ես ձեզ վստահեցնում են, որ առայսօր ինչ փող փոխանցվել է հիմնադրամին, ծառայել է նպատակին», -հայտարարեց Սալբի Ղազարյանը:

Նա անտեղի է համարում դատարանում խոսել հիմնադրամի շահերից, եթե «նվիրատուն և շահառուն որևէ պրոբլեմ չունեն միմյանց միջև»: «Փողերի փոխանցումը եղել է օրենքի սահմաններում», -նկատեց տիկին Ղազարյանը:

Դատավորն այսօր կողմերին լսելուց հետո անցավ խորհրդակցական սենյակ: Որոշումը կհրապարակվի վաղը, ժամը 10:45-ին: